Marere Ibaruana
PETERO
Ererena Hauna
Banamo ꞌAbina.
1
Au,
Simona Petero,
Iesu Keriso ena taꞌaraꞌi mai Iuhubeau hauꞌu,
eꞌu marere narerena niwahi weiami eka Tirama mai ibamaurika hauna Iesu Keriso ekia bero paunai aꞌikakauma namo abuna toaꞌina ihobona ai ꞌabamai haumi heremi.
2 Nabahubaꞌari emi aotipa Tirama mai eka Obiapaka herekiai keapaꞌua,
weiana aokoꞌo hoana mai baibua ꞌeumiai hauna hanona keapaꞌua hao apaꞌua hao.
Tirama Ena Apari Mai Ena Aꞌitaea.
3 Keriso hanona Tirama ena hiabuai taba ikoikiai kahanuatae ainakia haukia ebenaka weiakiai aika mauri tohana aonai kahamiaho mai Tirama ikutiainai kahamiaho,
weiana hanona aika eaparinaka ena namo mai nuabi ebenaka Tiramana haꞌiobina paunai etaina.
4 Taeara neianai ia ehore ibeni rarikia mai namoabukia eꞌabiꞌuai ainakia haukia ebenaka,
weiana ibeni neiakia katehore hanopaka ena raonaraona kiꞌa obokia kateaꞌi kiꞌanaka haukia herekiai kateba kaparenaka kahamai Tirama ihaihana aonai kahamiaho haeamo.
5 Ibeni neiakia paukiai katobatabura,
emi aꞌikakauma ahanai babai namo katohore ꞌauna,
haeamona emi babai namo ahanai aobero katohore ꞌauna,
6 emi aobero ahanai bakiro katohore ꞌauna,
emi bakiro ahanai bapahihi katohore ꞌauna,
emi bapahihi ahanai Tirama imarikiaina akana katohore ꞌauna,
7 emi aka Tirama imarikiaina hauna ahanai uahoꞌaba hoahoana katohore ꞌauna,
emi uahoꞌaba hoahoana ahanai raonaꞌau katohore ꞌauna.
8 Babai namokia neiakia katobabai taburanakia ꞌeumiai kateao raninai,
emi ꞌiobi eka Obiapaka Iesu Keriso herenai hanona katetabura haeamona katebatohana.
9 Ia maearima ha neiakia aꞌi kebabainakia raninai ia hanona mahana tekiꞌa,
aꞌi neihaiha haeamona ena kiꞌa ꞌaiꞌaikia Tirama ehina haonakia haukia hanona aba ereanakia.
10 Ua buonai uahoꞌabaꞌu e,
Tirama eaparinimi mai etinaꞌanimi ena maearimai toao weianai kato tabura haeamona katobatohana.
Weiana katobabaina raninai aꞌi katoꞌeho.
11 Taeara neianai wai hanona bero maikoina kebenimi eka Obiapaka mai bamauri hauna Iesu Keriso ena obia aiarana nemiaho banaibanai hauna aonai katokatoto.
12 Ua buonai wai Tirama ena ꞌabi tohana aba toꞌiobi haraina haeamona toaꞌina haunai aba tuaꞌi toꞌo,
iamo rani ikoikiai hanona taba neiakia ikoikiai kabaraonanimi.
13 Au maurimauriꞌu hauaniꞌuai namiaho oho aonai naraonana taba neiakia aomiai kabaraona muenimi hanona ebero.
14 Pokina eka Obiapaka Iesu Keriso ehinabe harainaꞌu ihobonai aꞌiobina hauaniꞌu neiana hanona aba kahabona paunai.
15 Eꞌu tabura tohana kahorotina emi taeara ha kababaina ba eꞌu ꞌari murinai hanona taba neiakia ikoinai katoraona ꞌininakia.
Keriso Ena Nuabi Mahamai ai Taihana Haumai.
16 Eka Obiapaka Iesu Keriso ena hiabu mai ena mai hanopakai hauna ꞌabina ṯabaꞌiobinimi aonai hanona hanopaka ena aotipa orina ha aꞌi ṯakikipana,
ia hanona ai mahamai tohanai mai ena hiabu hauna taihana.
17 Iesu mariki hoana mai nuabi Hamana Tirama herenai eaꞌina aonai aia ha ea nuabina tohana aonai eriri emai etibaha,
“Neiana hanona au Nahaꞌu,
eꞌu raonaꞌau hauna,
naonamoai kiꞌa bahana.”
18 Weia oeo robenai Iesu kipokia tamiaho aonai ai kipomai tohana aia neiana kupai emai hauna taona.
19 Ua buonai mahabanai haukia ꞌabi tehinana hauna tabatohana.
Wai abomo ekia ꞌabi katobahuai haraina hanona kenamo matoha ramepa eana wapura aonai niꞌara ꞌabana,
keaomo kupa kebaeana ba raurani bihiuna aomiai kerara.
20 Taba ikoikiai ꞌarakiai neiana hanona katoraona ꞌini apaꞌuana,
Puka robena ꞌabikia hanona mahabanai hauna ha kipona ena raona ꞌabina aꞌi ehinana.
21 Pokina mahabanai ꞌabina hanona maearima ha ena nuataeai aꞌi emai,
ia maearima weiakia Auba Robe ena hiabu aonai ṯemiaho haukia tehore Tirama raona ebenakia haukia ꞌabikia tehinana.