Eka Mauri Katehaeai.
4
Keriso hauaniai ehaiara buonai,
wai abomo raona weiana ihobonai aomi katoba taburanakia,
pokina hauani kehaiara hauna hanona kiꞌa kehabonakia.
2 Ua buonai emi mauri ranikia ikoikiai aokiai hauani ena nuatae kiꞌa obokia aꞌi katobabai,
ia Tirama ena nuatae akakia katobabainakia.
3 ꞌUainai wai hanona rama haeai haukia ekia nuatae ihobokiai tomiaho.
Maha porepore,
nuatae kiꞌa obokia akakia tobabai,
toinu ꞌari,
tobaripu ripu,
tobapoꞌo poꞌo,
kaibaꞌuku tokuti ainakia.
4 Bariu maearima weiakia hanona tetaꞌutaꞌu huri tehinabe kiꞌanimi,
pokina wai ia kipokia aꞌi tubahamomo aꞌi tubaripu ripu paunai.
5 ꞌA ia hanona ekia babai paukiai aba ebaꞌoru mauri mai ꞌari haukia kebakainakia Tiramana wairanai katekoroti ekia pou katehina.
6 Weiana paunai pou namona ꞌari haukia herekiai eiroro aina,
ia abokiamo hauanikia hanona bakai teaꞌina maearima ikoikiai ꞌabana,
ꞌa aubakia hanona katemauri Tirama ena nuatae ihobona.
Tirama Ena Aokoꞌo Hoakia Iꞌima Haraikia Haukai Kahaeao.
7 Taba ikoikiai ekia pua hanona aba nimai,
ua buonai kipomi katoraona harainimi aomi katoba kironakia ba katobahubaꞌari.
8 ꞌA apaꞌuana tohana hanona ꞌabami katoraonaꞌau ainakia mai aomi ikoikiai,
pokina raonaꞌau hanona kiꞌa boꞌona nibahu abunakia.
9 Emi ituai ꞌabami ha ha katoaꞌi taeanakia ia aꞌi katoururu ainakia.
10 Tirama wai ha ha ena aokoꞌo hoanai beruberu ebenimi,
weianai ha ha katobarainimi Tirama ena aokoꞌo hoana haeai haeai iꞌimana haumi namomiai katoao.
11 Hau ha keiroro raninai ia hanona ꞌabi weiana Tirama herenai nimai hauna ihobonai keiroro aina,
haeamona hau ha nenuatae kebarai barai,
weiana hanona Tirama tabura ebena hauna ihobonai keakaina.
Taba weiakia ikoikia aokiai Tirama atana kahabanamona Iesu Keriso paunai.
Nuabi mai hiabu ia ꞌeuna keaomo banaibanai.
Amen.
Kahahaiara Keriso Ena Maearimai Nahaeao Paunai.
12 Eꞌu raonaꞌau haumi e,
baihobo haiarana ꞌeumi katerama hanona aꞌi katokaiꞌau kaiꞌau aꞌi katoraonana taba haeai ha ꞌeumiai erama.
Ahaꞌi.
13 ꞌA katoaonamo,
pokina wai hanona Keriso ehau haiara ꞌabanai tuhau haiara,
Keriso ena nuabiai kewaira tina aonai katoaonamo wairai.
14 Wai Keriso ena maearimai paunai ṯehinabe kiꞌanimi raninai,
banamona hanona wai ꞌeumi pokina Tirama ena Auba weiana nuabi Auba Robena hanona wai ahamiai.
15 Aꞌi enamo wai ha kehau haiara ahuahu paunai ꞌao bainao paunai ꞌao aka kiꞌa paunai ꞌao maearima haeai ekia aka aokiai nitoto paunai.
16 ꞌA wai ha kehau haiara Keriso ena maearima paunai,
ia hanona aꞌi kehaumaea ꞌa Tirama kebanamona ata weiana eaꞌina paunai.
17 Pokina ranina aba ekaraꞌau Tirama ena maearima herekiai bakai keaꞌi ramana.
Aika kebaꞌuai ainaka raninai weiakia Tirama ena pou namona aꞌi teaꞌi taeana haukia herekiai hanona aea kepua aiho?
18 Puka robenai ṉa terere aihona,
“Aka bero haukia bamauri
iaꞌinai katearoꞌari raninai
Tirama aꞌi tiaꞌi taeana haukia
mai kiꞌa haukia aea
katekori ꞌini aiho?” Aot 11.31
19 Ua buonai weiakia Tirama ena nuatae paunai tihau haiara haukia hanona aka namokia mo katebabai,
aubakia hanona ebabainakia Tiramana aia nibabua ꞌauna hauna imana aonai kateutanakia.