Hawainibe Haukia Mai Babiꞌekia Ekia ꞌAbi.
3
Babiꞌe e,
ihobona taꞌaraꞌi haukia ekia poki haukia aiakia tikaꞌaina ꞌabana,
atawami aiakia katokaꞌainakia,
weiakia Obiapaka ena ꞌabi aꞌi tiaꞌi taeana haukia hanona ꞌabiai ahaꞌi iamo wai emi babai haraiai katobaraona kabenakia,
2 emi babai berokia mai mariki akakia kateiha paukiai.
3 Wai emi taitai hanona hauanimi kapena ibataitaina paunai ahaꞌi,
buimi taitaikia ꞌao haiami ꞌabakia gold ꞌao taba ꞌimarekia ꞌao emi ibatoto ꞌarakia rarikia ꞌabakia ahaꞌi.
4 ꞌA aomi tohakia haukia,
raona namona ꞌaiaununa ena namo aꞌi keꞌakauma haunai katoba taitainakia hanona Tirama wairanai ena namo eapaꞌua.
5 Pokina ꞌuaina raninai robe babiꞌekia weiakia ekia buabeni Tirama herenai haukia ua tetaitai aiho,
atawakia aiakia tekaꞌai harainakia.
6 Sara atawana Aberahamo aiana eona mai eaparina ena obia.
Wai abomo bero akana katobabaina mai rani ikoinai aꞌi katotaꞌu hanona nahuna babiꞌemiai katoao.
7 Hau e,
taeara ihobonai wai abomimo atawami kipokia katomiaho haeamo mai ꞌiobi haraimi ia hanona hauani akakiai teꞌabeꞌabe katomariki ainakia,
pokina Tirama ena mauri tohana beruberuna kipokia katoaꞌi haeamona,
ua homanai emi bahubaꞌari taearana aꞌi mekaiabu marikina.
Aka Bero Paunai Kahahaiara.
8 ꞌAbi orena neiana,
ikoimiai aomi kehamomo,
kipokia katoraonaraona,
katoraonaꞌau ainimi uahoꞌaba ꞌabakia,
katoaokoꞌo ainimi,
abomo kato ꞌaiaunu.
9 Ekia aka kiꞌa aꞌi katoba muena herekiai aꞌi katoaka kiꞌa,
ꞌao ekia ꞌabi kiꞌa ꞌarakia aꞌi katohore herekiai aꞌi katoꞌabi kiꞌa,
ꞌa tiaꞌi kiꞌanimi haukia hanona katoba namonakia,
pokina weiana paunai eaparinimi Tirama ena banamo katoaꞌina.
10 Pokina Puka robenai aba tererena,
“Hau ha kenuatae mauri namona
mai rani namona keihana hanona
maeana keꞌima haraina pinanai
kiꞌa ꞌabina aꞌi kehinana,
pinana paruanai baiꞌoi ꞌabina
aꞌi kehina ꞌapuana.
11 Kiꞌa kehabonakia aka
namokia kebabainakia,
baibua ketabuna murinai keꞌau.
12 Pokina Obiapaka mahana hanona
aka bero haukia neihanakia,
haiana hanona ekia noinoi
nibahubahu ainakia,
ꞌa Obiapaka wairana hanona
aka kiꞌa haukia niwairanakia
niꞌoatanakia.” Sal 34.12-16
13 Wai aka namona ṯonuakiꞌaina katobabaina hanona tai kehore wai keba haiaranimi?
14 Ia aka berokia katobabainakia mo katohau haiara raninai wai hanona katonamo Tirama wairanai.
“Ekia baiꞌoata ꞌabikia aꞌi katotaꞌu ainakia aomi aꞌi kearoꞌari.”
15 ꞌA Keriso hanona aomiai katomariki aina emi Obiapaka robena.
Ba rani ikoinai katobaꞌoru,
emi buabeni weiana aomiai nemiaho hauna anina katebakai bakai aina maearimakia ekia bakaibakai ꞌabina katobamuena mai baibuami abomo mai marikimi.
16 Rani ikoinai emi mauri aonai aomi kebero Tirama wairanai.
Weiana maearima weiakia emi aka namokia Keriso aonai tubabai haukia ṯehinabe kiꞌanimi haukia aka weiakia katehore kateba haumaeanakia.
17 Pokina Tirama ena nuatae raninai aka namonai katohau haiara hanona enamo,
emi aka kiꞌa paunai katohau haiara hanona aꞌi enamo.
18 Pokina Keriso rani hamonai eꞌari kiꞌa iaꞌiobokia akakia ikoinai paunai,
ia beho ahaꞌi hauna ehore beho haukia ꞌekakiai eꞌari pokina keaoainaka Tirama herena.
Hauanina teahu ꞌarina,
ia aubai emauri mue.
19 Keriso hanona aubai eao tekaiabunakia aubakia herekia eiroronakia.
20 Auba weiakia hanona ꞌuaina ꞌakinai Noa aunohi ebabaina raninai,
maearima weiakia Tirama aiana aꞌi tekaꞌaina ia aona eba pahihina ebaiꞌima kateraona kabe haukia.
Ia aunohi weiana aonai hanona aꞌi teboꞌo,
haukia ꞌababani mo bei weiana aonai ebamaurinakia.
21 Ibabataina bei hanona ꞌuere robe weiana Iesu Keriso ena mikiri mue paunai wai nibamaurinimi hoana,
hauanimi ꞌopuna katoutuna paunai ahaꞌi ia katoꞌabiꞌuaia aomi mai mahamahakia Tirama wairanai.
22 Keriso hanona aba kupai ekaraꞌau,
bariu Tirama itipana tainai marikiaina ꞌekanai emiati,
aneru,
obia aubakia mai hiabu haukia ikoikiai nipoki ainakia.