2
Ua buonai wai kipomi kiꞌa akakia ikoikiai,
baiꞌoi,
ahu ꞌoiꞌoi,
wamuru,
ꞌuahiꞌuahi ikoikiai katoneꞌe ꞌakaumanakia.
2 Miori ꞌoruꞌoruna niramahi ꞌae nenuatae ꞌabana,
rani ikoinai auba ena bamarere namona katonuatae aina,
weianai katoapaꞌua keaomo bamauri katoaꞌina.
3 Pokina wai hanona Obiapaka ena banamo aba tonobai ꞌapuana.
Obiapaka Hanona Pihara Maurina, Wai Hanona Tirama Ena Maearima.
4 Katomai Obiapaka Iesu herena,
ia hanona pihara maurina,
hanopaka maearimakia tebaoaoaina ꞌa Tirama ehore pihara weiana etinaꞌana,
ba eihana hanona enamo kiꞌa baha ia herenai.
5 Wai abomo pihara maurikia ꞌabana,
Auba Robe ena hiabuai Tirama ena marea robenai katoao,
wai hanona ia ena robe haumi emi mauri katobena baibeni tabanai keao Tirama kehore mai aonamona keaꞌi taeanimi Iesu Keriso paunai.
6 Puka Robenai ṉa erere aihona,
“Katoihana au pihara ha aꞌitaeana
weiana hanona ꞌuniꞌuni piharanaa
namona ꞌakina
Siona oeonai nahorotina,
taba ikoikiai ia ahanai
katebakori ꞌaunakia,
ia keaꞌikakaumana hauna hanona
aꞌi kehaumaea.” Isa 28.16
7 Ua buonai tuaꞌikakaumana haumi heremiai hanona enamo kiꞌa baha,
ꞌa ia aꞌi tiaꞌikakaumana haukia herekiai hanona pihara ꞌabaeana aba tererena ꞌabana,
“Itu ibakorina haukia tebakiꞌana
piharana hanona aba itu
ꞌuniꞌunina piharanai eao.” Sal 118.22
8 Abomo,
“Maearima pihara weianai
tikai tiehe herea
haeamona tiehe taꞌerai tiꞌeho.”
Isa 8.14
Tirama ena ꞌabi aꞌi teona aꞌi tekaꞌaina paunai ia tiꞌeho, weiana hanona ia itaukia Tirama ena raona ihobonai.
9 ꞌA wai hanona Tirama etinaꞌanimi maearimami,
obia ꞌarana ena robe haumi,
robe itubuna,
maearima weiakia Tirama ꞌeuna haumi.
Tirama eaꞌi taeanimi hanona ena hoahoa namokia katohina pounakia paunai,
weiana ia hanona wai wapura aonai eapari ahinimi ena ea namona ꞌakina aonai ebakatotonimi.
10 ꞌUainai wai hanona Tirama ena maearima ahaꞌi ꞌa bariu hanona wai aba Tirama ena maearima,
ꞌuainai wai hanona Tirama aꞌi eaokoꞌo ainimi ꞌa bariu hanona Tirama ena aokoꞌo aba toaꞌina.
Tirama Ena Taꞌaraꞌi Hauka.
11 Eꞌu raonaꞌau haumi e,
wai hanona hano haea mai kaoao ꞌabaea haumi hanopaka neiana aonai,
nabahi ahinimi,
hauanimi ekia hoahoa opukia aꞌi katobabai,
weiakia tihore aubami ṯehuarina.
12 Aꞌi tiaꞌikakauma haukia baiatakiai emi hoahoa katobaberona,
tiaꞌi kiꞌanimi aka kiꞌa haumiai tibaonimi haukia emi hoahoa namokia kateiha,
weiana Tirama atana katebanamona ia ena mai raninai.
13 Maearima ekia hiabu haukia ikoikiai aiakia katokaꞌainakia,
weiana hanona Obiapaka imarikiaina paunai,
hanopaka obia ꞌarana aiana katona ia hanona poki hauna,
14 abomo kabamani haukia aiakia katona,
ia hanona poki hauna euhunakia tiaka kiꞌa haukia kateba haiaranakia,
ꞌa babai harai haukia kateba namonakia.
15 Pokina Tirama ena nuatae hanona emi babai haraiai bapoꞌo poꞌo haukia ekia aotipa ꞌabikia kekaiabunakia.
16 Rauhubu herenai toꞌabaea haumiai katomiaho,
ꞌa emi miaho ꞌabaea weiana aka kiꞌa ikaikauna tabanai aꞌi keao,
wai hanona Tirama taꞌarana iaꞌinai katoao.
17 Maearima ikoikiai katomariki ainakia,
ꞌabami kato raonaꞌau ainakia,
Tirama katotaꞌu aina,
obia arana katomariki aina.
Keriso Ehaiara Ihobonai Kahahaiara.
18 Taꞌaraꞌi haumi e,
emi poki haukia aiakia katokaꞌaina mai taꞌumi,
namo ꞌao ꞌabi bero haukia herekiai mo ahaꞌi ia aibara haukia herekiai abomo.
19 Ena kiꞌa ahaꞌi ia Tirama niraonana paunai hauhaiara nihoaina hauna weiana hanona Tirama ia kebanamona.
20 Katoaka kiꞌa kateahunimi aonai katobapahihi ena namo hanona taba?
ꞌA aka namokia katobabai katohaiara aonai katobapahihi weiana hanona mai banamona Tirama wairanai.
21 Neiana paunai Tirama wai eaparinimi.
Keriso hanona ehau haiara wai paumiai,
ehabonimi ibabataiai eao wai murinai katoao ꞌapunai katokaꞌa.
22 “Keriso hanona kiꞌa ha
aꞌi ebabaina abomo pinanai
baiꞌoi ꞌabina ha aꞌi
tetabu ahina.” Isa 53.9
23 Tehinabe kiꞌana ia aiakia aꞌi ebamuena,
haiara eonobaina ia aꞌi ebaro ꞌarinakia,
ꞌa ikoinai hanona beroai nibakai Tiramana imanai eutanakia.
24 Keriso hauaninai eka kiꞌa ehoainakia matiu ibiri ropo ubinai eꞌari hanona kiꞌa ꞌeunai kahaꞌari ꞌa bero ꞌeunai kahamauri.
Ena imoa maniꞌakiai wai aba ebanamonimi.
25 ꞌUainai wai hanona eꞌakauma mamoena ꞌabana,
ia bariu hanona aba tomue tomai aubami iꞌimakia mai ihaꞌinikia hauna herena.