Tirama Ena Mamoe Toꞌuna Katoiha ꞌIninakia.
5
Wai baiatamiai Tirama ena marea kiro haumi nabahi ahinimi,
au abomo kiro hauꞌu,
Keriso ehau haiara hanona au mahaꞌuai aihana,
nuabina kewaira tina aonai au mai eꞌu itau.
2 Tirama ena mamoe toꞌuna iꞌimakia haumiai katoao katoiha ꞌini harainakia Tirama ena nuatae ihobonai.
Baoao baoaoai aꞌi katobabaina,
ia aomi mai nuatae tohanai katobabai.
Moni paunai aꞌi katoaka ia aomi mai aonamonai katoiha ꞌininakia.
3 Wai katoiha ꞌininakia haukia herekiai ekia poki haumiai aꞌi katoao,
ia herekiai ibabatai namokia haumiai katoao.
4 Weiana mamoe iꞌima poki hauna Keriso kekaraꞌau raninai wai hanona ꞌara ibahuabunaa nuabina aꞌi keꞌakauma ꞌapua hauna katoaꞌina.
5 Hau ꞌaruꞌarumi e,
taeara ihobonai kiro haukia aiakia katona,
ikoimiai kipomi ꞌaiaunu ai katobarainimi,
pokina Puka robenai ererena etibaha,
“Tirama hanona apa haukia
niwaeꞌe ainakia,
ꞌa ꞌaiaunu haukia hanona
keaokoꞌo ainakia.” Aot 3.34
6 Ua buonai kipomi katobaꞌaera ꞌaeranimi Tirama ena hiabu baꞌanai katoꞌaiaunu,
rani kemai aonai ia kehore wai keaꞌi taeanimi.
7 Aomi ekia aroꞌari ikoikiai Tirama herenai katohorotinakia,
pokina ia hanona wai neꞌimanimi.
8 Katoraona harai katoꞌima ꞌima harainimi.
Emi ꞌou hauna tiaporo hanona wai heremiai nikabanai kabanai neiki matoha mahi apaꞌuana atana laiona ꞌabana nibaitabu hau ha petonona hanona niraonana.
9 Emi aꞌikakaumai katokori ꞌini tiaporo katokaiabuna,
pokina ṯoꞌiobina uahoꞌabami maikoinai hanopaka neiana aonai hanona hau haiara ihobona mo tihoaina.
10 Aokoꞌo hoana ikoinai pokina Tiramana weiana Keriso aonai eaparinimi ena miaho banaibanai nuabina aonai kebaka totonimi hauna kehore wai rani papana mo katohau haiara,
murinai ia kipona kebabero ꞌaunimi,
keba pahihinimi,
kebataburanimi,
keba kori ꞌini harainimi.
11 Hiabu ikoikiai hanona Tirama ꞌeuna keaomo banaibanai.
Amen.
Banamo ꞌAbina Orena.
12 Sila ena baraibarai ai au marere papana neiana arere koꞌona.
Au aihana ia hanona uahoꞌabaka tohana.
Au arere benimi hanona aomi kabataburana mai kahina pouna Keriso paunai kahahau haiara hanona Tirama ena aokoꞌo hoana tohana.
Wai aokoꞌo hoana neiana aonai katokori ꞌini.
13 Tirama ena marea maearimakia Babulono ai ṯemiaho wai kipokia Tirama eaꞌi taeanimi haukia tehore ekia banamo ꞌabikia tebenimi,
Mareko aꞌikakaumai nahaꞌu abomo ena banamo ꞌabina ebenimi.
14 Raonaꞌau hoana baipaunai ha ha emi banamo katobaibeni.
Au nabahubaꞌari Keriso aonai ṯomiaho haumi ikoimiai baibua aonai katomiaho.