Hanopaka Ihatiaꞌana Hanona Tirama Iꞌoatana.
4
Baiatamiai ꞌau mai baiara ikoikiai hanona aeꞌeai timai?
Ekia mai ꞌekana hanona oi aomu ena nuatae uhorena weiakia haukia oi aomuai tiꞌau toꞌo baihana.
2 Ṯonuatae taba katoaꞌi iamo aꞌi tuaꞌinakia,
ua buonai tubaꞌoru katoahuahu,
taba ṯonua kiꞌainakia iamo aꞌi tuaꞌinakia,
ua buonai tubaiara mai tuꞌau.
Taba ṯonuatae ainakia haukia aꞌi tuaꞌinakia pokina wai hanona Tirama aꞌi tunoina.
3 Haeamona taba tunoi ai haukia aꞌi tutabu ahinakia pokina emi raonaraona hanona aꞌi tebero,
ṯonuatae kipomi aomi katoba namonakia tabakia mo tunoiainakia.
4 Tirama herenai aia aꞌi tubabua ꞌau haumi e,
wai matoha nabau kiꞌa babiꞌekia ꞌabakia,
hanopaka ihatiaꞌana hanona Tirama iꞌoatana,
wai weiana aꞌi toꞌiobina,
ꞌu?
Maearima tabana hanopaka kehauna hanona ia kipona Tirama ena ꞌou haunai niao.
5 Puka robenai ererena etibaha,
“Tirama Auba Robe aika aokai ehorotina hauna nihore aika neuhore ainaka.”
Wai turaonana ꞌabi neiana hanona anina ahaꞌi,
ꞌu?
6 ꞌA Tirama ena aokoꞌo hoana nibaibeni hauna hanona nitabura hao tabura hao,
Puka robenai ererena etibaha,
“Tirama hanona
apa haukia niꞌoatanakia,
ꞌa ꞌaiaunu haukia hanona
ena aokoꞌo hoana nibenakia.” Aot 3.34
7 Ua buonai katoꞌaiaunu kipomi emi mauri Tirama katobena,
ꞌeunai katoao,
ia tiaporo katoꞌoatana hanona heremiai kebeau ꞌakaumana.
8 Tomai Tirama herena,
ia abomo kemai heremiai.
Kiꞌa haumi e,
emi mauri aonai kiꞌa ṯemiaho haukia tomoutu obonakia matoha imami ṯoutunakia ꞌabana,
aomi tubaruanakia haumi e,
aomi tomoaꞌiaꞌi harainakia emi hoahoa katebero.
9 Tomobabirabira,
tomohai,
tomohai ꞌari kiꞌa,
emi iriri hanona hai ai meao,
emi aonamo hanona ao aroꞌariai meao.
10 Obiapaka wairanai kipomi tomoba ꞌaiaununimi,
weiana ia kehore keaꞌi taeanimi.
Uahoꞌabaka Aꞌi Kahaꞌuahinakia.
11 Uahoꞌabaꞌu e,
kipomi baiatamiai aꞌi katobaitabu haoaina.
Tabana uahoꞌabana Keriso aonai hauna ha nitabu haona ꞌao nibapuma hoaina hauna hanona rauhubu nitabu haona mai nibapuma hoaina.
Ba oi rauhubu nubapuma hoaina raninai oi hanona rauhubu aꞌi nukaꞌaina haumu ia nubapuma hoaina haumu.
12 Tirama ikupaiana mo rauhubu ebaibeni mai kebabakainakia ia mai ena hiabu kebamauri mai kebapururu.
Ua buonai oi hanona emu bero ahaꞌi heremuai hauna puma kobahoaina.
Mara ꞌEuna Aꞌi Kahapa.
13 Aiaꞌu tomona,
wai nya tuꞌabi aiho haumi ṯotibaha,
“Bariu ꞌao mara hanona kahaeao aiara weianai ihau hamona kahamiaho,
moni akana kahababaina mai moni boꞌona ꞌakina kahababai.”
14 ꞌA wai hanona mara emi mauriai taba kerama hauna aꞌi ṯoꞌiobina.
Emi mauri hanona ihobona ꞌabu ꞌabana,
rani papana kewaira tina haeamona keꞌakauma mue.
15 Ua buonai wai hanona nya katoꞌabi aiho,
“Obiapaka kenuatae raninai aika kahamauri oho aka neiana ꞌao weiana kahababaina.”
16 ꞌA bariu hanona wai kipomi tubapaꞌua mai tuapa,
bapaꞌua nahomakia hanona babai kiꞌa.
17 Ua buonai tabana aka berona ibabaina eꞌiobina iamo aꞌi nibabaina hanona kiꞌa nibabaina.