Obia Haukia Ibaꞌiobikia ꞌAbina.
5
Kepu heremi teboꞌo haumi e,
aiaꞌu tomona,
katohai ꞌari kiꞌa baha pokina atetua rarina kemai heremi.
2 Emi kepu aba teburuburu abomo ꞌabiꞌabi emi habuni aba teani maranakia.
3 Emi gold mai silba aba temotemote ba ekia motemote neiana kehore kebatohana wai hanona tobeho mai hauanimi irubai kepururu.
Rani orena nimai iamo wai emi kepu tubararo ohomo.
4 Tomobahu emi umai tebiraura haukia ꞌarakia aꞌi tohore obonakia haukia haeamona weiakia umai teueu haukia emi beho paunai tehai aiana aba ekaraꞌau eao hiabu ikoikiai Obiapakana haianai etoto puma kebahoainimi.
5 Wai hanopaka ahanai emi mauri hanona eobia kiꞌa baha haeamona mai aonamomi ṯomiaho,
ba kipomi turoꞌonimi tubapaꞌuanimi ihobona tatu aiporona ꞌabanai tuao.a
6 Wai tohore maearima ekia beho ahaꞌi haukia weiakia aꞌi tebatetua ꞌapuanimi haukia puma tobahoainakia mai toahu ꞌarinakia.
Kahabakiro Mai Kahabahubaꞌari.
7 Ua buonai,
uahoꞌabaꞌu e,
katobapahihi keaomo Obiapaka kemue kemai.
Katoraonana biraura hauna ena biraura anina namona neꞌimana mai bapahihi ꞌabana nibaꞌima niaomo hiribo abarana niore iaia abarana nimai ba ena uma anina nirama.
8 Wai abomimo aomi katobapahihina mai emi buabeniai katokori ꞌini harai pokina Obiapaka ena mai hanona aba niherekai.
9 Uahoꞌabaꞌu e,
wai kipomi baiatamiai aꞌi katoꞌarara ꞌarara weiana aꞌi meaoainimi Tirama aꞌi meba bakainimi,
iamo bakai hauna hanona aba paꞌabi ꞌakonai ekoroti.
10 Uahoꞌabaꞌu e,
wai hanona mahabanai haukia ekia hau haiara aokiai tebakiro hauna katoraonana murikiai katoꞌau,
ia hanona Obiapaka ena ꞌabi tehinana ba tehau haiara.
11 Aika nahaꞌabi bapahihi haukia hanona tenamo.
Iobu ena bapahihi orina aba toꞌiobina Obiapaka ena namo hanona ia herenai aea homana.
Obiapaka hanona aokoꞌo mai rabo haraiai ebonu.
12 Uahoꞌabaꞌu e,
taba apaꞌuana hanona neiana ꞌabi pumakiai aꞌi koꞌabi ꞌuai,
kupai ꞌao hanopakai ꞌao taba ha atanai emu ꞌabiꞌuai aꞌi kobatohana.
Iamo koꞌabi ‘ꞌe’ reꞌa ꞌe tohanamo kohinana,
ꞌao koꞌabi ‘ahaꞌi’ reꞌa ahaꞌi tohana mo kohinana,
weianai aꞌi mobabai kiꞌa puma aꞌi mohoaina marikina.
13 Baiatamiai hau ha nihau haiara reꞌa kebahubaꞌari,
hau ha baiatamiai niaonamo reꞌa banamo huikia keaꞌi.
14 Baiatamiai hau ha neinawa reꞌa Tirama ena mareai kiro haukia keaparinakia Obiapaka atana hiabunai ahanai katebahubaꞌari mai tehoroai katetarona.
15 Ia aꞌikakauma bahubaꞌarina kehore inawa hauna kebanamona Obiapaka kehore kebamikirina haeamona mai ena kiꞌa raninai kehina haonakia.
16 Ua buonai ꞌabami kipokia emi kiꞌa katohina pounakia abomo kipomi ha ha ꞌabami ahakiai katobahubaꞌari,
weiana emi inawa katenamo.
Bero hauna ena bahubaꞌari hanona ehiabu abomo mai anina.
17 Elia hanona maearima aika ꞌabaka,
iamo ebahubaꞌari tabura tabura abara aꞌi ketibo,
ba abara hano ahanai aꞌi etibo ihau aihau nawa ꞌabaihau.
18 Haeamona ebahubaꞌari mue,
weiana abara kupai etibo hano ebamapu mapuna,
ba buabuana ebarama muena.