Eka ꞌAbi Kahaꞌima Harainakia.
3
Uahoꞌabaꞌu e,
haumi boꞌona baꞌiobi haumiai aꞌi katoao,
pokina wai aba toꞌiobina,
ai ṯabaꞌiobi ꞌuai haumai hanona ibabakaimai hanona aba kepahihi kiꞌa baha ba maearima baika.
2 Aika ikoikai hanona rani boꞌona nahababai beho,
ia hau ha aꞌi keꞌabi rea raninai ia hanona keberoꞌau haeamona ia kipona hauanina maikoina kepokiai haraina ketaina.
3 Hoti pinakia ibirikia aurikia pinakiai kahabiri ꞌaunakia raninai ia aika aoka katekaꞌaina,
aika kahanuatae hoti hauna maikoinai kahabaibiuna mai kahaba kakaiarona hanona ketaina.
4 Haeamona aunohi rarina kahaihana,
ia eapaꞌua kiꞌa baha mai baura rarina niabuna reꞌa,
hari papana nihore niharina,
kapena hauna ena nuatae ꞌekana aeꞌe hanona keaoaina mo weia.
5 Ihobonai mo maea hanona papana ꞌaki hauanikai nemiaho,
ia niapa aka apaꞌuakia nibabai nya niho.
Iruba abomo kaharaonana,
baubaea papana ꞌaki iamo keupa raninai arabu maikoinai keꞌara obo.
6 Maea hanona matoha iruba,
ia hanona hauanikai nemiaho kiꞌai ebonu,
eka mauri maikoina keaꞌi kiꞌana,
ia nihore eka mauri maikoinai irubai nibaꞌaraꞌauna,
ena iruba hanona eiwaꞌa iruba niꞌara banai banai ꞌekanai nimaiaina.
7 Maearima katehore mauri tabakia ikoikiai,
mahi,
roborobo,
tikara tabakia haukia,
mai ꞌaku aonai ṯemiaho tabakia ikoikiai kateba mamatanakia hanona ketaina,
ba ia tihore taba weiakia tiba mamatanakia.
8 Iamo hau ha maea kebamamatana hanona aꞌi ketaina,
maea hanona kiꞌa nehina toꞌo baihana,
ꞌari muramuranai ebonu.
9 Maea neianai eka Obiapaka Hamaka nahabanamona,
haeamona maea neianai Tirama ihaihanai ebabainakia maearimakia nahaururu ainakia.
10 Pina hamonai banamo mai ururu ꞌabikia tikarahi.
Uahoꞌabaꞌu e,
weiana aꞌi pahababaina hanona penamo.
11 ꞌAku beina mai bei ꞌakia terarua ate hamonai aꞌi tiaru ahi.
12 Uahoꞌabaꞌu e,
tuaba matiuna ororo buana aꞌi kebaramana,
abomo ꞌaruhi matiuna tuaba buana aꞌi kebaramana.
Haeamona ꞌaku beinai bei ꞌaki aꞌi kaharaina.
Aobero Tirama Herenai Emai Hauna.
13 Tai hanona wai baiatamiai eaobero toha mai obo niobo harai?
Ia kehore ena mauri namonai mai ena babai haraiai weiana kebaihanimi mai ꞌaiaununa,
weiana hanona ena aobero hoana.
14 Aomiai wamuru ani kiꞌa ṯemiaho raninai emi aobero aꞌi katoapaina,
weianai Tirama ena ꞌabi tohana aꞌi katobunina.
15 ‘Aobero’ uahomakia hanona Tirama herenai aꞌi timai,
ia hanona hanopaka ꞌeuna mai tiaporo herenai timai.
16 Pokina wamuru mai ani kiꞌa ṯemiaho ꞌekanai hanona ripuripu mai aka kiꞌa haeai haeai abomo ṯemiaho.
17 ꞌA aobero weiana Tirama herenai nimai hauna ihaihana koriꞌuaina hanona hoahoa berona,
murinai hanona baibua,
ꞌaiaunu,
bamamata,
aokoꞌoai ebonu,
babai namokia,
kiꞌa taikia aꞌi nitai,
mai ahu ꞌoiꞌoi ahaꞌi.
18 Baibua tibabaina haukia tihore baibua uhona tibatona niꞌomu nirewa buabuana hanona aka bero ba tiarina.