Maearima Ikoikiai Aꞌitaeana Hoana Ihobona Kahababaina Herekiai.
2
Uahoꞌabaꞌu e,
eka Obiapaka Iesu Keriso hanona nuabi obiana,
tuaꞌikakaumana raninai,
maearima ihaihakiai taikia aꞌi katotai.
2 Hau ha Tirama ena marea toꞌunai pekatoto imana mai hoeahoeana mai ena habuni namoabukia ebatoto,
ꞌa uraru hauna ha ena habuni ꞌopukia ebatoto abomo pekatoto,
3 ba oi hau weiana habuni namokia ebatoto hauna nuaꞌi taea haraina notibaha,
“Emu imiaꞌau namona neianai momiaꞌau,”
ꞌa uraru hauna nohina bena,
“Eiwaꞌa mokoroti ꞌao neia aeꞌu pokinai momiati,”
raninai,
4 wai hanona aba tobeho,
pokina kipomi baiatami tobahaeaina haeamona emi raona kiꞌa obonai baiata tohorena.
5 Uahoꞌabaꞌu kiꞌami e,
aiaꞌu tomona,
Tirama ehore hanopakai uraru haukia etinaꞌanakia aꞌikakaumai kateobia,
haeamona Tirama ena obia aiarana weiana aba eꞌabiꞌuaina ia tiraonaꞌau aina haukia ꞌeukia hauna uraru haukia kateaꞌina.
6 ꞌA wai hanona uraru haukia ṯoiha haonakia.
Obia haukia hanona emi mauri tipoki aina mai bakai ꞌekanai tiberi totonimi.
7 Ia tihore Iesu atana namona Tirama ebenimi hauna tiꞌabi kiꞌa bena.
8 Rauhubu apaꞌuana Puka robenai hauna etibaha,
“Heremu hauna koraonaꞌau aina oi kipomu nuraonaꞌau ainiꞌo ꞌabana.”
Ua tubabai aiho raninai wai hanona aba tubabai harai.
9 ꞌA wai maearima ihaihakiai taikia tutai raninai wai hanona aba kiꞌa tubabaina,
ba tubeho Tirama ena rauhubu tukabena.
10 Pokina hau ha rauhubu ikoikiai keꞌima harainakia,
ia hamona ekabena raninai ia aba ebeho ihobona rauhubu maikoinai ekabe orena ꞌabana.
11 Pokina Tirama etibaha,
“Aꞌi konabau,”
haeamona etibaha,
“Aꞌi koahuahu,”
ba pe aꞌi onabau,
ia oahuahu raninai oi hanona Tirama ena rauhubu aba okabe hurina.
12 Taba ikoikiai aokiai katoꞌabiꞌabi mai katobabai hanona katoraonana Keriso ena rauhubu weiana kiꞌai erubunimi hauna kehore kebabakainimi.
13 Pokina maearima aꞌi koaokoꞌo ainakia raninai,
Tirama ena bakai aonai aꞌi keaokoꞌo ainiꞌo.
Aokoꞌo hanona bakai etara haona.
Aꞌikakauma Mai Akana Hauna Enamo.
14 Uahoꞌabaꞌu e,
hau ha niꞌabi ia hanona mai ena aꞌikakauma ia akana aꞌi nibabaina raninai,
ena aꞌikakauma weiana hanona ena namo taba?
Ena namo ahaꞌi.
Aꞌikakauma uahomana hanona ia aꞌi kebamaurina.
15 Pe aꞌikakauma haukia baiatakiai uahoꞌabamu ha ꞌao haibumu ha herenai habuni ꞌao aniani keani hauna ahaꞌi,
16 ba oi ia pohina bena potibaha,
“Mai baibuamu moao,
haumu kehiabuhiabu,
mai koaniani harai,”
ꞌa enuatae ainakia tabakia ha aꞌi obeni ꞌapuana raninai,
weiana ena namo hanona taba?
Ena namo ahaꞌi.
17 Taeara ihobonai aꞌikakauma ikupaiana mo,
ꞌa akana ahaꞌi hanona aꞌikakauma tohana ahaꞌi,
weiana hanona aba eꞌari aꞌi niaka.
18 ꞌA hau ha ketibaha,
“Hau ha hanona keaꞌikakauma,
ꞌa hau ha hanona keaka.”
ꞌA au natibaha,
“Emu aꞌikakauma weiana akana ahaꞌi hauna mobaihanaꞌu,
ba au kahore eꞌu aꞌikakauma mai akana hauna kabaihaniꞌo.”
19 Oi nuaꞌikakauma Tirama hanona hamona mo.
Weiana hanona enamo.
Auba kiꞌa obokia abomo ua tiaꞌikakauma aiho haeamona titaꞌu kiꞌa ṯeꞌururu ꞌururu.
20 Ao ꞌabaea haumi e,
aꞌikakauma weiana akana ahaꞌi hauna hanona ena namo ahaꞌia kabaihanimi.
21 ꞌAbaꞌabaka Aberahamo hanona Tirama wairanai ebero pokina ena aꞌikakauma akana ebabaina,
nahuna Isako itara robena ahanai ehore ꞌauna Tirama eberuberu bena.
22 Aba toꞌiobina ena aꞌikakauma mai ena aka hanona teaka haeamo,
ba ena babai weiana ehore ena aꞌikakauma ebaberoꞌauna.
23 Ba Puka robenai tererena ꞌabina aba etohana etibaha,
“Aberahamo ehore Tirama eaꞌikakaumana,
ena aꞌikakauma weiana buonai Tirama ia eaꞌi taeana bero haunai ebaona.”
Ba Aberahamo teaparina Tirama ena hau.
24 Ua buonai bariu aba toꞌiobina maearima hanona ena babai paunai Tirama ia nibatohana bero hauna,
ia aꞌikakauma ikupaiana mo ahaꞌi.
25 Taeara ihobonai mo,
Rahaba rea babiꞌena abomo ena aka harai paunai Tirama ia ebatohana bero babiꞌena,
pokina ia ehore Iuda ekia ihaihapai haukia ebarainakia,
haeamona taeara haeaiai euhunakia temue.
26 Ua buonai hauani aonai auba ahaꞌi hanona eꞌari ihobonai,
aꞌikakauma abomo akana ahaꞌi hanona aba eꞌari.