2 Uahoꞌabaꞌu e,

atetua haeai haeai katekaraꞌau heremi hanona aonamo tabanai katobaonakia.

3 Pokina ṯoꞌiobina,

atetua katehore emi aꞌikakauma katehobona,

weiana hanona wai emi bapahihi keba apaꞌuana.

4 Emi bapahihi ena tabura ikoinai kebawaira tina haraina,

weianai katobero ꞌaunimi,

katonamo harai toha mai taba ha herenai aꞌi katokapu.

5 Wai ha aobero okapu raninai Tirama konoina,

ia hanona aꞌi nibaibata maearima ikoikiai niberuberu benakia,

ia kehore aobero kebeniꞌo.

6 Ia Tirama konoina raninai koaꞌikakauma aomu aꞌi kekaiꞌau kaiꞌau.

Hau ha aona kekaiꞌau kaiꞌau hanona matoha roio roio ꞌabana,

baura nihore niabuna niaoaina nimaiaina.

7 Hau uahomana hanona aꞌi keraonana ia taba ha Obiapaka herenai keaꞌina.

8 Pokina aona nibaruana hauna ena aka ikoikiai aokiai hanona taeara hamonai aꞌi kekori ꞌini.

9 Tirama kehore uahoꞌabaka uraruna ha keaꞌi taeana ꞌubiai raninai keaonamo wairai.

10 ꞌA Tirama kehore uahoꞌabaka niobia hauna kebaririna raninai ia abomo keaonamo,

pokina obia weiana hanona keꞌakauma matoha tubu taitaina niꞌororo niꞌeho ꞌabana.

11 Beraura nitae,

nirara kokopuna nihore tubu nibaꞌororona taitaina niꞌeho ena nuabi abomo niore.

Ihobonai obia hauna ena kepu nitabuna aonai ua keꞌari aiho.

12 Atetua aokiai nibapahihi hauna hanona keaonamo,

pokina atetua aonai etabura ekabanai buonai mauri banaibanai weiana Tirama eꞌabiꞌuai aina ia tiraonaꞌau aina haukia herekiai hauna keaꞌina.

13 Baihobo aokiai hau ha aꞌi keꞌabi,

“Tirama nihobonaꞌu.”

Pokina kiꞌa Tirama kehobona hanona aꞌi ketaina,

abomo Tirama hanona hau ha aꞌi nihobona.

14 Baihobo hanona hau ha kipona ena nuatae kiꞌa obona nihore aona niana ba niꞌoina paunai nirama.

15 Nuatae kiꞌa obona nihore kiꞌa nibaramana,

kiꞌa niꞌomu ꞌau niapaꞌua ba buabuana nirama hanona ꞌari.

16 Uahoꞌabaꞌu kiꞌami e,

raona weiana aꞌi kebahaoreanimi.

17 Beruberu tabakia namokia ikoikiai mai ibeni tabakia bero ꞌaukia ikoikiai hanona ꞌubiai timai,

weiana ea tabakia ebabainakia Tiramana herenai timai,

ia hanona aꞌi nihaeai abomo aiaia ꞌabanai aꞌi neibiu.

18 Kipona ena nuatae paunai ena ꞌabi tohanai ebaramanaka,

ba taba ikoikiai ebaramanakia baiatakiai aika hanona wairai.

19 Uahoꞌabaꞌu kiꞌami e,

neiana katoꞌiobi haraina,

maearima ikoinai ꞌabi ionai katenoanoa,

ia ihinanai hanona katemahari mahari mai opuereai abomo katemahari mahari.

20 Pokina hau ha ena opuere hanona Tirama ena nuatae maurina berona aonai kemauri hauna aꞌi kebaraina.

21 Ua buonai hoahoa ꞌopukia ikoinai mai babai kiꞌa obokia ikoikiai aomiai ṯemiaho haukia tomoneꞌe ꞌakaumanakia,

ia Tirama ena ꞌabi weiana aomiai ebatona hauna wai kebamaurinimi hauna tomoaꞌi taeana mai ꞌaiaunumi.

22 Tirama ena ꞌabi tuona hauna akana katobabaina,

ia ꞌabimo tuoꞌo ꞌabaeana,

akana aꞌi tubabaina hanona kipomi tuꞌoi ahinimi.

23 Hau ha Tirama ena ꞌabi aiana niona ia akana aꞌi nibabaina hauna hanona ihobona ia kipona wairana oreore ai neihana ꞌabana.

24 Kipona wairana eihana epua ekaobo,

aꞌi ehomaꞌa aba ereana ia ihana hanona aea homana.

25 ꞌA hau ha Tirama ena rauhubu weiana beroꞌauna mai maearima kiꞌai erubunakia hauna emarereai haraina aia eona aꞌi ereanakia,

haeamona akakia ebabai hauna hanona ena aka aonai Tirama ena banamo ketabu ahina.

26 Hau ha aonai niraonana ia hanona Tirama niaꞌikakauma haraina,

iamo maeana aꞌi neꞌima haraina raninai ia hanona kipona niꞌoi ahina,

ba hau weiana ena aꞌikakauma Tirama herenai hanona anina ahaꞌi.

27 Aꞌikakauma hauna ena aka namona tohana mai berona Hamaka Tirama wairanai hanona neiana,

araobo mai wapu kahabarainakia ekia hau haiarai,

haeamona kipoka kahaꞌima ꞌima harainaka hanopaka ꞌopuna aꞌi mebaꞌopunaka.