Iesu Kahaihana Mai Kahaꞌikakauma.
12
Weiakia aꞌikakauma maurinai temiaho haukia boꞌokia hanona baiaruru haukia ꞌabakiai tekori kakaiaronaka paunai,
aika taba weiakia tibapumanaka mai kiꞌa weiakia tiaꞌi ꞌininaka haukia ikoikiai hamaꞌi obonakia,
ba mauri beauna wairakai nimai haunai hamabeau mai bapahihika.
2 Aika mahaka hanona Iesu mo kahaihana,
ia ehore aika eka aꞌikakauma ebaramana popounai keaomo puanai,
ia hanona wairai nemiaho aonamona paunai ebapahihi aꞌi ehaumaea matiu ibiri ropo haiarana ehoaina ubinai eꞌari,
ba ia bariu hanona weia Tirama ena imiaꞌau itipana taina imarikiaina ꞌekanai aba emiati.
Tirama Puma Kebenaka Hanona Kahabero.
3 Wai ia katoraona haraina,
ia aka kiꞌa haukia teꞌoatana aonai ebapahihi benakia,
ba wai kipomi aomi aꞌi tomoneꞌe ꞌabaeana aꞌi tomohau hororo taꞌuna.
4 Wai hanona kiꞌa kipokia ṯohuari,
iamo aꞌi toꞌau tabura aꞌi teahu ꞌarinimi.
5 Tirama ehore nahunai ebaonimi aomi ebataburanakia ꞌabina aba toreana,
ꞌu?
Etibaha,
“Nahaꞌu e,
Obiapaka nirobenimi
hanona aiana katobahuaina,
haeamona nerikenimi hanona
aomi aꞌi katoneꞌe ꞌabaeana.
6 Pokina Obiapaka
niraonaꞌau ainakia haukia
nirobenakia,
abomo nahunai
nibaonakia haukia niꞌatinakia.” Aot 3.11, 12
7 Emi hauhaiara katobapahihi aina,
weiana hanona hamami ena bairobe.
Pokina Tirama nihore nahunai nibaonimi.
Hama tabana nahuna aꞌi nirobena?
8 Maearima ikoikiai nahukia tirobenakia.
Wai aꞌi kerobenimi raninai wai hanona tubu miorimi nahuna tohami ahaꞌi.
9 Aika ikoikai mai hamaka hanopaka neiana ahanai tirobenaka ba aiakia nahaꞌi taeanakia.
Aika hanona mai Hamaka kupai hauna aiana kahakaꞌai harai hanona kahamauri.
10 Aika hamaka hanopakai neia haukia ekia bero ai rani papana tirobenaka,
ia Tirama nirobenaka hanona aika eka namo paunai,
ba ia kipokia ena robe maurina aonai kahamiaho haeamo.
11 Hama nahu tirobenakia raninai mai haiarakia ia aonamona ahaꞌi,
ia muriai weiakia tehaiara tepuma hoai haukia hanona baibua buabuana namona kateaꞌina aka bero haukiai kateao.
12 Weiana buonai imami timahe haumi tomoaꞌi taea mai aemi tiꞌabeꞌabe haumi tomobapahihi tomomikiri.
13 Taeara berokiai katokaꞌa,
weiana aekia tekiꞌa haukia taeara weianai aekia katenamo.
14 Wai tomobahobo maearima kipokia mai baibuami katomiaho mai robemi katomiaho,
pokina aꞌi kerobe hauna hanona Obiapaka aꞌi keihana.
15 Ha ha katoꞌima harainimi,
hau ha Tirama ena aokoꞌo hoanai aꞌi mekapu marikina,
ꞌao baiatamiai hau ha ramu mabina ꞌabana aꞌi meꞌomu ꞌau mako aꞌi mebaroꞌarinimi mai aꞌi mebaꞌopunimi marikina.
16 Katoꞌima harainimi,
baiatamiai hau ha aꞌi kenabau,
ꞌao auba akana aꞌi timariki aina haukiai aꞌi temeao marikina ihobona Esau ꞌabana,
ia hanona aniani ꞌororo hamona paunai ena ramaꞌuai hoana banamona maikoinai ebaꞌakaumana.
17 Aba toꞌiobina,
muriai Esau hanona hamana herenai ena ramaꞌuai hoana banamona iaꞌina enuatae enoi mai haihaina,
iamo hamana ekamuri aina,
ia Esau hanona ena ramaꞌuai hoana banamona keaꞌi muena taearana ha aꞌi etabu ahina.
Aika Aba Hakaraꞌau Kupa Ierusalemana.
18 Wai tomai ꞌekana hanona ꞌuainai Isaraela haukia teao Sinai oeona ꞌabana ahaꞌi.
Sinai oeona hanona imakai kahaꞌi ꞌapuana ketaina,
iruba niꞌara,
ꞌauhao ꞌumuna mai wapura ekaiabuna,
abomo kou eabu,
19 pihi ꞌuruna mai aia rarina teona.
Ba maearima weiakia aia teona haukia Mose tenoina Tirama ia herekiai ꞌabi ha aꞌi kehina muena.
20 Pokina maearima weiakia Tirama eꞌabi benakia hauna tetaꞌuai kiꞌa bahana,
ia eꞌabi etibaha,
“Maearima ha keao oeo neiana imanai keaꞌi ꞌapuana hanona piharai kateahu ꞌarina,
mahi ha reꞌa uamo katehomana.”
21 Mahakia eao hoa rarikia teihanakia tetaꞌu kiꞌa,
Mose abomo eꞌururu ꞌururu eꞌabi etibaha,
“Ṉataꞌu kiꞌa baha.”
22 Ia wai tomai ꞌeka neiana hanona Siona oeona,
mauri Tiramana ena aiara,
kupa Ierusalemana.
ꞌEka weiana aonai aneru toꞌuna rarina ꞌakina mai aonamokia ṯemiaho.
23 Wai tomai nahu pakakia ꞌabanai katoao atami kupai terere haukia ekia aonamo toꞌu apaꞌuana herena,
maearima ikoikiai ibabakaikia hauna Tiramana herena,
mai aka bero haukia weiakia aubakia aba tebero harai haukia herekia.
24 Wai tomai Iesu ꞌabiꞌuai apaꞌuana mahamahana ebairarao aina hauna herena,
mai ia aruaruna kiꞌa iaꞌi obokia hauna herena,
aruaru ikapo otarai hauna weiana hanona Abela aruaruna ꞌara hore enuatae aina hauna etara haona.
Kahaꞌima ꞌima Harainaka.
25 Katoꞌima harainimi,
nehina benimi hauna aiana aꞌi kato baoaoaina.
Weiakia hanopakai Tirama ena ꞌabi ebena hauna Mose tebaoaoaina haukia hanona puma tehoaina.
Aika kupai nirobenaka hauna kahabakiꞌana raninai puma kemai hauna herenai aea kahakapare aiho?
26 Rani weianai ia aiana ehore hanopaka ebaibiuna,
ba bariu hanona eꞌabiꞌuai etibaha,
“Au hanopaka haeamona kabaibiuna,
hanopaka mo ahaꞌi,
ia kupa abomo.”
27 ꞌAbi neiana “haeamona” anina hanona weiakia terama tabakia kateibiu haukia ikoikiai keaꞌi parenakia,
ia taba baika aꞌi kateibiu haukia hanona ꞌekakiai katemiaho.