ꞌAbaka Ha Ha Kaharaonaꞌauai Toꞌonaka.
13
Wai ha ha kipomi katoraonaꞌauai toꞌo baihanimi uahoꞌaba hamona ꞌabana Keriso aonai.
2 Aꞌi katoreana,
baki haukia hanona katoaꞌi taeanakia emi ituai,
pokina baika tehore ekia ituai baki haukia teaꞌi taeanakia aonai aneru teaꞌi taeanakia,
ia kipokia hanona aꞌi teꞌiobina.
3 Wapura itukiai tekaiabunakia haukia katoraonanakia,
ihobona wai abomimo ia kipokia patekaiabunimi ꞌabana.
Maearima tihore tiba haiaranakia haukia abomo kato raonanakia,
ihobona wai abomimo tuhaiara ꞌabana.
4 Maearima ikoikiai hawainibe katemariki aina hanona kenamo.
Hau mai babiꞌe atawami kipokia emi hawainibe hoana katoꞌima haraina hanona kenamo,
pokina Tirama kehore maha porepore maearimakia abomo hawainibe aonai tinabau kiꞌa maearimakia hanona kebabakainakia.
5 Moni aꞌi katonuatae ai kiꞌa bahana ia taba heremiai ṯemiaho haukia mo katoaꞌi aomi kenamo,
pokina Tirama eꞌabi etibaha,
“Au hanona aꞌi kahabonimi abomo
aꞌi kareanimi,
ahaꞌi ꞌakina.” Deu 31.6
6 Ua buonai mai taburaka kahaꞌabi kahatibaha,
“Obiapaka hanona au ibaraiꞌu
hauna,
au aꞌi kataꞌu.
Maearima taba katebabaina
au hereꞌuai?” Sal 118.6
7 ꞌUainai teꞌuai ainimi Tirama ena ꞌabi tebaꞌiobi ainimi haukia kato raonanakia.
Ekia mauri katoraonana aea temiaho aiho eao mo teꞌari,
ba ekia aꞌikakauma hoana katobahobo hoboaina.
8 Iesu Keriso hanona warani,
bariu abomo mara aꞌi kehaeai keaomo banaibanai.
9 Baꞌiobi ꞌabikia haeai haeai aꞌi katehore taeara namonai aꞌi katebakaꞌa parenimi.
Namona hanona Tirama ena aokoꞌo hoana kehore aomi keba taburanakia,
aniani rauhubukia aꞌi katoba apaꞌuanakia.
Pokina weiakia aniani rauhubukia teaꞌi taeanakia haukia hanona namo ha aꞌi tetabu ahina.
10 Aika hanona mai eka itara robena,
weiana hanona matiu ibiri ropo ꞌubinai Iesu eꞌari hauna,
robe haukia weiakia paraboa aonai ekia robe akakia tibabai haukia katemai eka itara robena weianai kateaniani hanona ekia bero ahaꞌi.
11 Pokina mahi aruarukia hanona robe hauna apaꞌuana eaoainakia erobe kiꞌa baha ꞌekana aonai etotoainakia kiꞌa iaꞌiobokia paunai,
ꞌa hauanikia hanona eaoainakia aiara parabuna murinai ehuhunakia.
12 Ihobonai Iesu abomo kipona aruarunai maearima ekia kiꞌai kebamaha mahanakia paunai aiara parabuna murinai ehau haiara eꞌari.
13 Ua buonai aika abomo ia herena kahaeao,
aiara parabuna murinai ia ehaumaeaina hauna kipokia kaha haumaea haeamo.
14 Hanopaka neiana aonai aika eka miaho banaibanai aiarana ha ahaꞌi,
aika hanona aiara weiana wairai nimai hauna nahaꞌimana.
15 Ua buonai aika rani ikoinai Iesu atanai Tirama banamo kahabena,
aika kahahore pinakai ia atana kahapaina,
weiana hanona aika eka baibeni tabana Tirama ꞌeuna.
16 Aka namokia abomo ꞌabami ibaraikia akakia aꞌi kato reanakia,
pokina aka uahomakia hanona baibeni tabakia Tirama niaonamo ainakia.
17 Ṯeꞌuai ainimi haukia aiakia katokaꞌaina mai ṯenuataeai akakia katobabainakia.
Pokina ia tihore wai ṯeꞌimanimi Tirama wairanai mai taꞌukia,
aꞌi tioro.
Aiakia katokaꞌaina hanona mai aonamokia ekia aka katebabaina,
ia mo aiakia aꞌi katokaꞌaina raninai mai raona raonanakia kateaka,
ba weiana ꞌeumiai hanona baraibaraina ahaꞌi.
18 Rani ikoinai katobahubaꞌari ai ahamai ai.
Ai ṯaraona haraina aomai tohakia hanona tebero pokina taba ikoikia aokiai tanuatae aka berokia katababai.
19 Au nanoinimi kato bahubaꞌari tabura Tirama keuhunaꞌu kawahi biai heremi.
Banamo ꞌAbina Orena.
20 Baibua Tiramana ehore Obiapaka Iesu ꞌari haukia baiatakiai ebamikirina,
ia hanona miaho banaibanai ꞌabiꞌuaina apaꞌuana aruaruna ekiki oioi ba mamoe ꞌima hauna apaꞌuanai eao.
21 Au nabahubaꞌari,
Tirama neiana kehore taba namokia ikoikiai kebenimi pokina ena nuatae akana katobabaina paunai,
Iesu Keriso atanai ia niaonamo aina akana aokai kebabaina.
Keriso herenai nuabi kemiaho banaibanai.
Amen.
22 Uahoꞌabaꞌu e,
marere neiana arere benimi ꞌabikia hanona aꞌi tehomaꞌa,
ia eꞌu batabura ꞌabikia neiakia katoaꞌi taea tohanakia.
23 Nabaꞌiobinimi uahoꞌabaka Timoteo wapura itunai aba tebakarahina,
ia pemai biai raninai tararua patawahi pataihanimi.
24 Ṯeꞌuai ainimi haukia ikoikiai mai Tirama ena maearima ikoikiai herekiai eꞌu banamo ꞌabina katohina benakia.
Weia Italia ai ṯemiaho haukia ekia banamo ꞌabina ṯetiu ahina heremi.
25 Tirama ena aokoꞌo hoana hanona ikoimiai heremiai kemiaho.
Amen.