Aꞌikakauma Hanona Taba?
11
Eka aꞌikakauma nihore nahabuabeni tabakia nimaiainakia taba tohakiai tiao,
aꞌi nahaiha tabakia taba tohakiai nibaonakia.
2 ꞌUaina maearimakia abomo aꞌikakauma neiana paunai Tirama ehore ebatohanakia.
3 Aꞌikakaumai aika haꞌiobina kupa mai hanopaka tabakia ikoikiai hanona Tirama ena ꞌabiai terama,
weiana haꞌiobina nahaihakia tabakia hanona taba aꞌi nahaihakia haukia herekiai temai terama.
Abela, Enoka, Mai Noa Ekia Aꞌikakauma.
4 Aꞌikakaumai Abela hanona baibeni tabana namona Tirama ebena Kaino ena baibeni tabana etara haona,
weiana ena aꞌikakauma paunai Tirama ehore Abela ena baibeni tabana eaꞌi taeana abomo aka bero haunai ebaona.
Ia eꞌari,
ꞌa ena aꞌikakaumai ia hanona bariu niꞌabi ohomo.
5 Aꞌikakaumai Enoka hanopakai eaꞌi taeana ꞌari aꞌi eꞌiobina Tirama herena eao,
ua buonai hau ha ia aꞌi tetabu ahina.
Tirama ehore eaꞌi obona.
Puka robenai ebatohana eꞌabi ia aꞌi eaꞌi taea bahana aonai ia hanona Tirama aona ebanamona.
6 Ia ena aꞌikakauma ahaꞌi hauna hanona Tirama aona ibanamona aꞌi eꞌiobina.
Tirama herena kateao haukia hanona kateaꞌikakauma tohana Tirama hanona nimauri abomo titabuna haukia arakia namokia kebenakia.
7 Aꞌikakaumai Noa hanona Tirama taba wairai kerama hauna ebaꞌikakaumana aonai ia aꞌi eiha tabakia Tirama aiana eaꞌi taeana mai marikina aunohi ha ebabaina ba ena itu haukia ibamaurikiai keao tou aonai.
Aꞌikakauma weianai ia bero haunai eao Tirama wairanai ba hanopaka haukia puma rarina tehoaina.
Aberahamo Mai Sara Ekia Aꞌikakauma.
8 Aberahamo hanona Tirama eaꞌikakaumana.
Ia eaparina raninai aiana eaꞌi taeana ekaobo ena hano ehabona.
Tirama eꞌabiꞌuai hano ha kebena,
ia aeana keao hanona aꞌi eꞌiobina aonai ena hano tohana ehabona.
9 Aꞌikakaumai Aberahamo eao ꞌabiꞌuai hanona,
weia aiara haeai haunai eao,
ia Isako mai Iakobo kipokia paraboa aokiai temiaho,
ia terarua abomo ꞌabiꞌuai hamona teaꞌina Tirama herenai.
10 Pokina Aberahamo hanona ebaiꞌima Tirama kehore aiara weiana kebakorina kebaꞌini haraina miabanai aiaranai keao.
11 Aberahamo atawana Sara ohi aba tekiro kiꞌa baha miori aꞌi patebaramana,
ia aꞌikakaumai hanona Aberahamo hama ai eao pokina ia Tirama eaꞌikakaumana ena ꞌabiꞌuai kebatohana.
12 Aberahamo hanona eanepaka kiꞌa ihobona aba eꞌari ꞌabana,
hau anepakana hamona neianai itubu rarina ꞌakina ebaramana ihobona kupa bihiukia ꞌabana ꞌao poe ꞌanona ꞌabana kahatuabina hanona aꞌi kahatuabi orena.
13 Maearima neiakia ikoikiai ekia aꞌikakaumai temiaho iamo Tirama ena ꞌabiꞌuai tabakia aꞌi teaꞌi bahanakia aonai teꞌari,
ia wairai katerama tabakia teꞌiobinakia haukia teaonamo ainakia,
ba murinai ia kipokia tehina pounakia ia hanona baki mai aiara haeai haukia hanopaka neiana ahanai.
14 Maearima ua tiꞌabi aiho hanona aika haꞌiobina ia hanona ekia hano tohana titabuna.
15 Ia hano weiana ꞌuaina tehabona hauna pateraonana raninai patemue abomo petaina.
Ia ua aꞌi tehoma.
16 Aiara ia teꞌimana hauna hanona aiara namona ꞌakina kupa aiarana.
Weiana Tirama hanona aꞌi nihaumaea kateaparina ekia Tirama,
pokina ia aiara ha aba ebaꞌoruna ia ꞌeukia.
17 Tirama Aberahamo ehobona aonai Aberahamo aꞌikakaumai nahuna Isako barobe tabanai ebaona.
Tirama Aberahamo herenai eꞌabiꞌuai ꞌabaꞌabana kateboꞌo,
iamo Aberahamo nahuna hamo hamona barobe tabanai ebaona ebena.
18 Tirama Aberahamo ehina bena etibaha,
“Isako haunai oi itubumu aꞌabiꞌuai ainakia haukia katerama.”
19 Aberahamo eaꞌikakauma Tirama hanona mai hiabuna maearima ꞌari ai kebamikiri muena.
Weiana hamatibaha Aberahamo hanona nahuna Isako ꞌariai eaꞌi muena ꞌabana.
Isako, Iakobo, Mai Iosepa Ekia Aꞌikakauma.
20 Aꞌikakaumai Isako ehore Iakobo mai Esau ꞌabiꞌuai banamona ebenakia wairai katerama tabakia abomo ehina pounakia.
21 Aꞌikakaumai Iakobo ena ꞌari aba eherekai ꞌaki aonai ia Iosepa nahuna ha ha ebanamonakia abomo ena ikaiꞌini ai ehara ꞌau Tirama ekuti aina.
22 Aꞌikakaumai Iosepa ena mauri aba kepua aonai Isaraela itubuna Aikupitoai katekarahi hauna pouna ehinana abomo ehina benakia huriana Kanana hanonai katehorena.
Mose Ena Aꞌikakauma.
23 Aꞌikakaumai Mose hamana hinana ia erama murinai tehore bunina nawa aihau pokina teihana ia hanona miori namona,
ba Aikupito Obia ꞌarana aꞌi tetaꞌu aina ena rauhubu aꞌi teaꞌi taeana.
24 Aꞌikakaumai Mose eapaꞌua aonai aꞌi enuatae ia hanona Aikupito obia ꞌarana nahuna babiꞌena nahunai aꞌi keao.
25 Ia hanona enuatae Tirama ena maearima kipokia katehau haiara haeamo,
ia aꞌi enuatae rani papana kiꞌa akakia aꞌi keaonamo ainakia.
26 Mose eraonana kehau haiara Tirama etinaꞌana hauna paunai hanona enamo kiꞌa baha ba Aikupito kepukia boꞌona aꞌi keaꞌinakia,
pokina ꞌara namona wairai hauna eraonana.
27 Aꞌikakaumai Mose hanona Aikupito ehabona obia ꞌarana ena opuere aꞌi etaꞌu aina.
Ia ebapahihi toꞌona aꞌi nahaihana Tiramana aba eihana ꞌabana.
28 Aꞌikakaumai Mose ehore Kabanai tatuna ebaꞌoruna,
ehina benakia aruaru ai paꞌabi akokia tetaronakia,
ahuahu aneruna Isaraela nahukia hobohobo miorikia pakakia aꞌi meahu ꞌarinakia marikina.
Isaraela Haukia Boꞌona Tirama Teaꞌikakaumana.
29 Aꞌikakaumai Isaraela haukia hanona ꞌAku birona tekabanai hano ꞌororonai tekabanai ꞌabana,
ia Aikupito haukia tebahobona katekabanai aonai ikoikiai ꞌakuai tetono ꞌari.
30 Aꞌikakaumai Isaraela haukia Ieriko aiara parabuna apaꞌuana tekakaiarona wapu ꞌabaihau hamomo hanona epobu.
31 Aꞌikakaumai Rahaba maha porepore babiꞌena hanona Isaraela ekia ihaihapai haukia rua ebarai harainakia.
Ia Tirama aꞌi teaꞌi taeana haukiaa teꞌari aonai Rahaba hanona emauri.
32 Ba bita karobahu ainakia?
Gideon,
Barak,
Samson,
Idfeta,
Davida,
Samuela mai mahabanai haukia poukia kakikipanakia ranina hanona aba ahaꞌi.
33 Ia ekia aꞌikakaumai tehuari hanopaka boꞌona teaꞌi kiꞌanakia,
bero akakia tebabai,
Tirama ena ꞌabiꞌuai tabakia teaꞌi,
ia tehore laiona pinakia tekaiabunakia,
34 iruba apaꞌuakia tebaꞌaonakia,
kareba mahanai terobo mauri.
Teꞌabeꞌabe ia haeamona tetabura mue,
huari ai tetabura kiꞌa atauꞌa haukia toꞌuna teuꞌunakia.
35 Babiꞌe baika hanona hatiaꞌakia teꞌari haukia temikiri mue tetabu ahinakia,
baika teba wapuranakia irubukia aꞌi tenuatae pokina kateahu ꞌarinakia aonai mikiri mue namona ꞌakinai katemauri paunai.
36 Baika hanona tebatae ainakia teꞌatinakia,
tebirinakia wapura itunai tekaiabunakia.
37 Pihara ai teahu ꞌarinakia,
teiri boanakia rua,
kareba ai tehara ꞌarinakia.
Mamoe mai nani paruakia tehainakia tekaoao,
teuraru,
teꞌoatanakia,
mai teaꞌi kiꞌanakia.
38 Hanopaka hanona ena namo ha ahaꞌi ia herekiai.
Ia hanona hano ahaꞌi haukia ꞌabanai tekaoao,
hanoꞌakunai,
oeo ai,
pihara ꞌererekiai mai ꞌuriai temiaho.
39 Neiakia ikoikiai hanona mai ekia aꞌikakauma Tirama ehore ebatohanakia,
iamo Tirama eꞌabiꞌuai anikia hanona aꞌi teaꞌi.
40 Pokina Tirama hanona ena raona namona ꞌakina ebaꞌoruna aika ꞌeuka.
Ena nuatae hanona ꞌuainai teaꞌikakauma maearimakia mai aika kipokia maearima aba teꞌoru haukai kahaeao haeamo.