Keriso Hauanina Rani Hamona Ikoinai Paunai Ebaibeni.
10
Mose ena rauhubu hanona taba namona wairai kemai hauna aubaubana,
taba tohana ahaꞌi.
Rauhubu taearanai maearima ekia kiꞌa iaꞌi obokia tabakia ihau ha ha ihobokia tebaibeni,
iamo weiakia hanona Tirama herenai katekuti haukia aꞌi katebabero harainakia.
2 Baibeni neiana pehore Tirama ṯekuti aina haukia ekia kiꞌa rani hamonai pebamaha mahanakia raninai,
ia kipokia pateꞌiobina ekia kiꞌa aba teore,
weiana kiꞌa iaꞌi obokia tabakia aꞌi patebaibeni mue.
3 Ia kiꞌa iaꞌi obokia tabakia weiakia tebaibeni hanona ekia kiꞌa tebaraona muenakia ihau ha ha aokiai.
4 Pokina poromakau mai nani aruarukia hanona kiꞌa aꞌi kateaꞌi obo ꞌapuanakia.
5 Ua buonai Keriso hanopakai emai aonai ia Tirama ehina bena etibaha,
“Rauhubu ena barobe tabakia
abomo baibeni tabakia
aꞌi onuatae ainakia.
ꞌA hauani ha obaꞌoruna au euꞌu.
6 Oi baibeni tabakia irubai
tebaꞌaranakia haukia
mai kiꞌa iaꞌi obokia tabakia
aꞌi oaonamo ainakia.
7 Ba au aꞌabi atibaha,
‘Tirama e,
Au neiaꞌu,
aba amai,
rauhubu pukanai
pouꞌu tererena ihobonai
oi emu nuatae akana kababaina.’” Sal 40.6-8
8 Keriso koriꞌuainai eꞌabi etibaha,
“Barobe tabakia,
beruberu tabakia,
baibeni tabakia irubai tibaꞌaranakia haukia,
mai kiꞌa iaꞌiobokia tabakia oi aꞌi onuatae ainakia,
aꞌi oaonamo ainakia.”
(Weiakia hanona Mose ena rauhubu ena nuatae paunai tebaibeni.)
9 Murinai eꞌabi etibaha,
“Tirama e,
Au neiaꞌu,
aba amai,
oi emu nuatae akana kababaina.”
Ia hanona barobe taearana koriꞌuaina eaꞌi parena ia ibaruana ebakorina.
10 Iesu Keriso ehore Tirama ena nuatae akana ebabaina,
ia kipona hauanina rani hamonai ikoinai paunai ebena baibeni tabanai eao,
weianai eka kiꞌa ai aba hamahamaha.
11 Robe haukia ikoikiai beraura ikoikiai ekia robe akakia tibabai,
barobe tabakia hamokiamo tibaibeni hao baibeni hao,
ia barobe tabakia weiakia hanona kiꞌa aꞌi kateaꞌiobo ꞌapuanakia.
12 Ia Keriso ehore rani hamonai baibeni tabanai eao kiꞌa iaꞌiobokia paunai,
baibeni weiana hanona niaka keaomo banaibanai.
Ba ia Tirama itipana taina imarikiaina ꞌekanai aba emiati.
13 Weia ia nibaiꞌima keaomo Tirama kehore tiꞌoatana haukia kemaiainakia Keriso ꞌapuna baꞌanai.
14 Ia baibeni tabana hamonai weiakia ekia kiꞌai ebamaha mahanakia haukia ebabero harainakia keaomo banaibanai.
15 Auba Robe abomo aba kipona pou neiana ehinabe ainaka.
Koriꞌuaina eꞌabi etibaha,
16 “Obiapaka hanona niꞌabi,
Rani weiana murinai
Au eꞌu ꞌabiꞌuai apaꞌuana
herekiai kababaina hanona neiana.
Eꞌu rauhubu ia aokiai kahorotina
mai ia ꞌakokiai karerena.” Ier 31.33
17 Haeamona eꞌabi etibaha,
“Au ekia kiꞌa mai ekia beho
aꞌi karaona ꞌini ꞌapuanakia.” Ier 31.34
18 Ia kiꞌa mai beho weiakia aba ehina haonakia paunai kiꞌa iaꞌi obokia tabakia katebaibeni hanona ena poki aba ahaꞌi.
Aika Kahaꞌikakauma Tohana Tirama Herenai Kahaeao.
19 Uahoꞌabaꞌu e,
ua buonai aika Iesu eꞌari aruarunai tabura kahaꞌina erobe kiꞌa baha ꞌekana aonai kahakatoto.
20 Iesu hauanina eꞌari hanona iꞌaeahuri habuninaa etapana ba taeara mahamahana mai mauri ekaikauna aika paukai.
21 Aika hanona mai eka robe hauna apaꞌuana Tirama ena maearima neiha ꞌininakia.
22 Aokai ia aruaruna ekapo otaraina paunai aoka tohanai kiꞌa weiana aba eaꞌi obona,
hauanika abomo bei iroronai aba eutu harainakia,
ua buonai bariu aika kahakaꞌa haha Tirama herena kahaeao mai aoka tohanai abomo mai aꞌikakaumaka aꞌi kahabaoao baoao.
23 Eꞌabiꞌuai Tiramana hanona ena ꞌabiꞌuai kebatohana paunai,
aika eka buabeni haꞌuahina hauna kahaꞌi ꞌinina.
24 ꞌAbaka kipokia kaharaona raona haeamo,
ha ha kahaba taburanaka,
eka raonaꞌau kahaba ihanakia,
mai namo akakia kahababai.
25 Baika marea toꞌuna akakia tibaoaoai haukia ekia hoahoai aꞌi kahaeao,
iamo ꞌabaka kahaba taburanakia toꞌu akana kahabapaꞌuana Obiapaka ena rani kemai hereka hauna nahaihana aonai.
Tirama Nahuna Aꞌi Kahakamuri aina.
26 Tomobahu.
Aika Keriso pouna aba haꞌiobi tohana murinai eka nuatae ai kiꞌa kahababai toꞌona raninai,
kiꞌa weiakia iaꞌi obokia baibeni tabakia haeai ha aꞌi nemiaho.
27 ꞌA taba muriai kerama kahataꞌu aina hauna hanona bakai apaꞌuana mai iruba kiꞌa obona Tirama tiꞌoatana haukia keba pururunakia.
28 Haꞌiobina hau ha Mose ena rauhubu ekabena aꞌi eaꞌi taeana raninai ihina pouna haukia rua ꞌao aihau tebatohana ba hau weiana beho haunai eao teahu ꞌarina aꞌi teaokoꞌo aina.
29 Hau ha nihore Tirama Nahuna aꞌi nimariki aina,
ia nihore ꞌabiꞌuai apaꞌuana aruaruna ia ebarobena hauna taba ꞌabaeanai nibaona,
mai Tirama ena aokoꞌo hoana nimaiainaka Auba Robena herenai niꞌabi kiꞌaina hauna,
hau weiana kaharaonana ena puma kehoaina hanona aea keapaꞌua aiho!
30 Aika haꞌiobina Tirama hanona ṉa eꞌabi aiho etibaha,
“ꞌAra hore hanona eꞌu aka,
au kahore arana kabamuena.”
Haeamona etibaha,
“Obiapaka kehore ena maearima kebabakainakia.”
31 Weiana kahaꞌeho mauri Tiramana imana aonai kahaenouta hanona taba kiꞌa obona tohana!
32 Rani ꞌuaina aea tohoma hauna katoraona muena.
Tirama ena ea totabu ahina murinai haiara boꞌona toaꞌi ia wai hanona tobatabura.
33 Rani baika maearima wairakiai tebapoꞌonimi mai teꞌoatanimi,
abomo rani baika haiara uahomakia teaꞌi haukia tobarainakia.
34 Wapura itunai tekaiabunakia haukia tobarainakia,
abomo baika tehore emi kepu teaꞌi ꞌakaumanakia raninai tobapahihi mai aonamomi,
pokina toꞌiobina emi kepu namokia ꞌakikia hanona katemiaho banaibanai.
35 Ua buonai emi raona taburana aꞌi katohabona.
Pokina weianai ꞌarana apaꞌuana katoaꞌina.
36 Wai hanona katobapahihi pokina Tirama ena nuatae akana katobabaina murinai taba eꞌabiꞌuai aina hauna katoaꞌina.
37 Puka robenai Keriso robana eahuna etibaha,
“Rani papana mo ia aꞌi kehomaꞌa,
ia hanona kemai,
ia aꞌi kemahari.
38 Eꞌu aka bero hauna hanona
mai aꞌikakaumana kemauri.
Ia kekamuri ainaꞌu raninai
au ia aꞌi kaonamo aina.” Hab 2.3, 4
39 Aika hanona weiakia tikamuri mai tiꞌakauma haukia ꞌabakia ahaꞌi,
aika hanona mai aꞌikakaumaka bamauri kahaꞌina.