ꞌAbiꞌuai Apaꞌuana ꞌAiꞌaina.
9
ꞌAbiꞌuai apaꞌuana koriꞌuaina hanona mai ena kuti rauhubukia mai kuti ꞌekana,
ꞌeka weiana hanona maearima imakiai tebabaina.
2 Paraboa tebakorina ba tekaihurina ikaihuri rua,
atapaka tainai ikaihuri atana teaparina Robe ꞌekana.
Robe ꞌekana aonai hanona ramepa horoti ꞌekana ha mai itara papana ha,
ahanai baibeni parawana tehorotina Tirama ꞌeuna.
3 Iꞌaeahuri habunina ibaruana aona tainai hanona teaparina Erobe kiꞌa baha ꞌekana.
4 Weiana aonai hanona itara robena ha tebabaina gold ai tebahu abuna ahanai nabunabu timina namona ṯekinena,
abomo ꞌabiꞌuai apaꞌuana mauana ha hauna maikoinai gold ai tebahu abuna,
maua aonai hanona gold urona ha aonai mana teutana hauna mai Arona ena ikaiꞌini weiana ꞌuainai ebubuhi rauna tekarahi hauna mai pihara panabakia rua ahakiai rauhubu tererenakia haukia.
5 Maua ikaiabuna ubinai hanona teaparina Kiꞌa ihina haona ꞌekana,
Tirama ena nuabi aneru ꞌabakia ibabataikia rua atakia Kerubi,
banikiai ꞌeka weiana tehao abuna.
Bariu hanona taba neiakia ikoikiai aꞌi kahinahina harainakia.
6 Taba weiakia ua tebaꞌoru aihonakia,
weiana robe haukia hanona rani ikoikiai ikaihuri koriꞌuaina aonai tekatoto ekia aka tebabainakia.
7 Ia ikaihuri ibaruana hanona robe hauna apaꞌuana ikupaiana mo ihau ha aonai rani hamona ekatoto,
imana ꞌabaeana aꞌi ekatoto,
ia aruaru eaꞌina etoto aina ia kipona ena kiꞌa paunai abomo maearima ekia kiꞌa aꞌi teꞌiobina aonai tebabaina haukia paukiai.
8 Taba weiakiai Auba Robe aba ebaꞌiobi harainaka,
robe ꞌekana koriꞌuaina ekoroti nemiaho aonai taeara keao erobe kiꞌa baha ꞌekana hanona aꞌi nikaikau bahana.
9 Neiakia hanona ibabatai ꞌabakia bariu rani neiana ꞌeuna.
Taeara weianai beruberu tabakia mai kiꞌa ihina hao tabakia tibaibeni Tirama ꞌeuna,
iamo weiakiai kuti haukia aokia tohana aꞌi katebabero toha tohana.
10 Weiakia hanona aniani tabakia inuinu tabakia mai ꞌuere hoahoakia,
hauani ena rauhubu ꞌabaeakia,
ia kateaka keaomo Tirama taeara kebamahamaha muenakia raninai.
ꞌAbiꞌuai Apaꞌuana Mahamahana.
11 Ia bariu Keriso aba emai terama tabakia namokia ekia robe hauna apaꞌuanai eao,
paraboa weiana eapaꞌua mai eꞌoru harai hauna aonai ekatoto,
weiana hanona maearima imakiai aꞌi tebabaina abomo hanopaka ꞌeuna ahaꞌi.
12 Keriso paraboa aonai ekatoto raninai,
nani ꞌao poromakau nahukia aruarukia aꞌi eaꞌi ia kipona ena mauri ebaibeni aruarunai ekatoto,
rani hamonai mo erobe kiꞌa baha ꞌekana aonai ekatoto,
weianai bamauri banaibanai akana ebaorena aika paukai.
13 Maearima teꞌopu Tirama wairanai raninai,
nani poromakau aruarukia mai poromakau irubai tebaꞌara obonakia rabukia haukiai tekapo otarainakia,
ba haukia temahamaha terobe Tirama wairanai.
14 Weiana hanona ꞌabi tohana iamo Keriso aruaruna hanona weiakia etara haonakia.
Keriso hanona ena kiꞌa ꞌao ena beho ha ahaꞌi,
ia miaho banaibanai Auba Robena ena baraibarai ai kipona ena mauri baibeni tabanai ebaona Tirama ebena.
Keriso aruaruna weiana hanona aoka tohana kebamaha mahana,
weiakia anikia ahaꞌi hoakia herekiai kaha kapare kahaeao mauri Tiramana ena aka kahababaina.
Keriso Aruarunai ꞌAbiꞌuai Apaꞌuana Mahamahana Ebatohana.
15 Ua buonai Keriso hanona bairarao haunai eao ꞌabiꞌuai apaꞌuana mahamahana kebataburana.
Ia maearima ekia kiꞌa weiakia ꞌabiꞌuai apaꞌuana ꞌaiꞌainai temiaho aonai tebabainakia haukiai kerubunakia paunai eꞌari,
ba Tirama eaparinakia haukia hanona banamo banaibanai Tirama eꞌabiꞌuai aina hauna kateaꞌina.
16 Keꞌari hauna ena nuatae ꞌabiꞌuaina hanona aꞌi keaka keaomo ena ꞌari katebatohana murinai nuatae ꞌabiꞌuaina weiana hanona keaka.
17 ꞌAri hauna ena nuatae ꞌabiꞌuaina hanona eꞌabiꞌuai hauna keꞌari ba ꞌabiꞌuai hiabuna keaka,
ia aꞌi eꞌari nemiaho oho aonai ꞌabiꞌuai weiana hanona hiabuna ahaꞌi.
18 Weiana buonai ꞌabiꞌuai apaꞌuana koriꞌuaina abomo ꞌari aruarunai ꞌabiꞌuai hiabuna eaka.
19 Koriꞌuaina Mose ehore rauhubu ꞌabina ena maearima ikoikiai ebaꞌiobinakia,
weiana murinai poromakau nahukia aruarukia nani aruarukia mai bei kipokia eaꞌi haeamona,
mamoe buirana birona mai wapaea rauna kipokia eaꞌinakia ekaihuna,
rauhubu pukana mai maearima ikoinai ahakiai ekapo otaraina.
20 Ba eꞌabi etibaha,
“Neiana hanona ꞌabiꞌuai apaꞌuana aruaruna,
Tirama ehina benimi katoaꞌi taeana.”
21 Taeara ihobonai Mose aruaruai paraboa robena ahanai ekapo otaraina mai robe akana tibabai tabakia ikoikiai abomo ahakiai ekapo otarainakia.
22 Mose ena rauhubu ebaꞌiobinaka taba boꞌokia hanona aruaru kehore kebamaha mahanakia,
ia aruaru aꞌi kekiki oioi raninai kiꞌa ihina haona keahaꞌi.
23 Paraboa aona tabakia neiakia kupa tabakia ibabataikia hanona taeara uahomanai patebamaha mahanakia,
ia kupa tabakia tohakia hanona baibeni namona ꞌakinai katebamaha mahanakia.
24 Keriso hanona ꞌeka robena maearima imakiai tebabaina hauna aonai aꞌi ekatoto,
ꞌeka weiana hanona ꞌeka robena tohana ibabataina,
ꞌa ia hanona kebarainaka paunai ꞌeka robena tohana kupa ꞌubinai hauna aonai ekatoto eao Tirama wairanai.
25 Robe haukia apaꞌuakia hanona ihau ha ha aokiai mahi aruarukia teaꞌi erobe kiꞌa baha ꞌekanai tekatoto.
Ia Keriso hanona rani boꞌona ua aꞌi kehoma.
26 Ua pehoma raninai,
hanopaka eaꞌi ramana raninai emai mo bariu Keriso hanona rani boꞌona pehau haiara.
Ia Keriso rani hamona mo ewaira tina rani neiakia puakiai,
kipona baibeni tabanai eao kiꞌa iaꞌiobona.
27 Maearima ha ha hanona rani hamonai kateꞌari,
murinai Tirama kebabakainakia.
28 Taeara ihobonai Keriso hanona rani hamona mo baibeni tabanai eao mako ekia kiꞌa iaꞌi obokia.
Ia haeamona kewaira tina mue hanona ṯeꞌimana haukia kebamaurinakia paunai,
ia kiꞌa iaꞌi obokia paunai ahaꞌi.