Iesu Hanona Eka Robe Hauna Apaꞌuana Kupai.
8
Au robana ahuna ꞌabikia pokikia hanona neiana,
aika hanona robe hauna apaꞌuana ṉahomana hauna nemiaho herekai.
Ia kupa ꞌubinai hiabu Tiramana ena imiaꞌau itipana taina imarikiaina ꞌekanai aba emiati.
2 Ia ꞌeka robena tohanai robe hauna apaꞌuana ena aka nibabaina,
paraboaa tohana weiana hanona Obiapaka Tirama ehore ebakorina ia maearima aꞌi tebakorina.
3 Robe haukia apaꞌuakia ikoikiai teaꞌi taeanakia beruberu tabakia katebaibeni mai kiꞌa iaꞌiobokia tabakia katebaibeni Tirama herenai,
ua buonai eka robe hauna apaꞌuana neiana abomo taba ha kebaibeni.
4 Iesu hanopakai pemiaho raninai robe haunai aꞌi peao,
pokina robe haukia temiaho ia tehore beruberu tabakia tebaibeni Mose ena rauhubu ihobonai.
5 Robe haukia ekia aka hanona kupa ai tibabaina akana ihobo ihobona mai aubaubana ꞌabana,
aka weiana hanona ihobona Tirama Mose ehinabe pahihina paraboa robena ebakorina ꞌabana etibaha,
“Koꞌima haraina taba ikoikiai kobabai oeo ai abaihaniꞌo tabakia ihaihakia ihobo ihobokia.”
6 Ia bariu Iesu robe akana eaꞌina hanona robe haukia ekia aka etara haonakia,
pokina ia ꞌabiꞌuai apaꞌuana weianai bairarao haunai eao,
ꞌabiꞌuai apaꞌuana neiana hanona ma enamo ba ꞌabiꞌuai apaꞌuana ꞌaiꞌaina,
pokina weiana hanona ꞌabiꞌuai namokia ꞌakikia ahakiai ebakorina.
ꞌAbiꞌuai Apaꞌuana Mahamahana Hanona ꞌAiꞌaina Etara Haona.
7 ꞌAbiꞌuai apaꞌuana koriꞌuaina maikoinai enamo raninai,
ibaruana aꞌi pahanuatae aina.
8 Ia Tirama ena maearima herekiai beho eihana buonai ehinanakia etibaha,
“Au,
Obiapaka Tirama,
naꞌabi,
Beraura aba nimai ꞌabiꞌuai
apaꞌuana mahamahana kababaina
Isaraela haukia herekiai
abomo Iuda itubuna aonai.
9 Au,
Obiapaka Tirama,
naꞌabi,
ꞌAbiꞌuai apaꞌuana neiana
hanona ꞌabaꞌabakia imakiai
aꞌina Aikupito hanonai
abakarahinakia raninai
aꞌabiꞌuai hauna ꞌabana ahaꞌi.
Ia eꞌu ꞌabiꞌuai apaꞌuana
aꞌi tekaꞌaina buonai
au abomo aiakia aꞌi aona.”
10 Au,
Obiapaka Tirama,
haeamona naꞌabi,
Weiana murinai ꞌabiꞌuai apaꞌuana
ha kababaina Isaraela haukia
herekiai hanona neiana.
Au eꞌu rauhubu ia aokiai
kahorotina mai ahekiai karerena.
Au hanona ekia Tirama ai kaeao,
ia hanona au eꞌu maearima ai
kateao.
11 Hau ha uahoꞌabana ꞌao
herenai hauna aꞌi kehina bena
‘Obiapaka koꞌiobina’.
Pokina ikoikiai hanona
aba kateꞌiobinaꞌu
papana ꞌakiai eaomo
apaꞌuanai epua.
12 Ekia beho akakia aokiai
kaokoꞌo ainakia
abomo ekia kiꞌa
aꞌi karaona ꞌininakia.” Ier 31.31-34
13 Tirama ꞌabiꞌuai apaꞌuana mahamahana eꞌuahina raninai weiana koriꞌuaina hanona aba ꞌaiꞌainai ebaona,
ba taba niꞌaiꞌai mai nimara hauna hanona aba keꞌakauma.