Melkisedek Obia ꞌArana Mai Robe Hauna Apaꞌuana.
7
Melkisedek neiana hanona Salema obia ꞌarana abomo ꞌubi toha tohanai Tiramana ena robe hauna.
Aberahamo ehuari aiara obiakia eahu ꞌarinakia emue aonai tebaitabu ahi,
Melkisedek ehore Aberahamo ebanamona.
2 Aberahamo ehore huari aonai eaꞌinakia kohukia ikoinai harau haea harau haea aokiai ha ha Melkisedek ebena.
Melkisedek atana anina hanona ‘aka bero obiana ꞌarana’,
haeamona atana Salema obiana anina hanona ‘baibua obiana ꞌarana’.
3 Melkisedek hanona hamana ahaꞌi hinana ahaꞌi,
ena itubu ahaꞌi,
aita erama aita eꞌari aꞌi haꞌiobina,
ia orina ahaꞌi,
ia hanona ihobona Tirama Nahuna ꞌabana,
robe haunai nemiaho banaibanai.
4 Melkisedek weiana katoraonana,
ia aea eapaꞌua aiho!
Aika ꞌabaꞌabaka Aberahamo huari ai eaꞌi kohukia namokia harau haea harau haea aokiai ha ha ia ebena.
5 Weiakia Lebi itubuna haukia robe hoana teaꞌina paunai,
rauhubu eꞌabi,
Aberahamo ꞌabaꞌabana Isaraela haukia ekia kohu ikoikiai harau haea harau haea aokiai ha ha uahoꞌabakia Lebi itubuna katebenakia.
6 Melkisedek hanona Lebi itubuna hauna ahaꞌi,
iamo Aberahamo herenai ena kohu ikoikiai harau haea harau haea aokiai ha ha eaꞌina ba ia ehore Aberahamo weiana Tirama ena ꞌabiꞌuai eaꞌina hauna ebanamona.
7 Aika haꞌiobina hoa apaꞌuana eaꞌina hauna kehore hoa papana eaꞌina hauna kebanamona.
8 Robe haukia hanona maearima ekia kohu harau haea harau haea aokia ha ha teaꞌinakia,
Melkisedek abomo Aberahamo ena kohu harau haea harau haea aokiai ha ha eaꞌinakia,
ia robe haukia hanona kateꞌari,
ia Melkisedek hanona nemiaho banaibanai Puka robenai eꞌabi ihobona.
9 Ṉa hamaꞌabi aiho,
Lebi haukia maearima ekia kohu harau haea harau haea aokiai ha ha teaꞌinakia,
ia Aberahamo ena kohu harau haea harau haea aokiai ha ha Melkisedek ebena aonai Lebi ena itubu haukia abokiamo ekia kohu harau haea harau haea aokia ha ha tebaibeni ꞌabana.
10 Pokina Melkisedek Aberahamo ohi tebaitabu ahi aonai Lebi hanona aꞌi erama baha ia ꞌabaꞌabana Aberahamo hauaninai emiaho.
Iesu Ihobona Melkisedek.
11 Tirama Isaraela haukia rauhubu ebenakia Lebi itubuna haukia robe akana katebabaina.
Ia Lebi itubuna robe akana tebabai haraina iamo aka weiana hanona maearima aꞌi teba beronakia Tirama wairanai paunai robe hauna haeai ha kewaira tina keaka matoha Melkisedek ꞌabana,
ia Arona ꞌabana ahaꞌi.
12 Robe haukia katehaeai hanona rauhubu abomo kehaeai.
13 Weiana robana hahuna hauna hanona itubu haeai hauna,
Lebi itubuna hauna ahaꞌi,
itubu weiana aonai hanona hau ha itara robena akana aꞌi ebabai ꞌapuana.
14 Weiana aba haꞌiobi haraina eka Obiapaka hanona Iuda itubunai erama,
ꞌa Mose robe haukia ha itubu weianai aꞌi eaꞌi taeana.
15 Taba nahauahina hauna aba haꞌiobi haraina pokina robe hauna haeai ha aba ewaira tina,
ia Melkisedek ꞌabana.
16 Ia robe haunai eao hanona maearima ekia rauhubu ꞌao ekia taearai ahaꞌi,
ia mauri hiabuna nemiaho banaibanai haunai.
17 Puka robenai ṉa eꞌabi aiho,
“Oi hanona robe haumuai
nomiaho keaomo banaibanai,
Melkisedek robe akana
ebabaina ꞌabana.” Sal 110.4
18 Weiana rauhubu ꞌaiꞌaina aba teaꞌi obona,
pokina ia hanona eꞌabeꞌabe abomo ena aka ahaꞌi.
19 Mose ena rauhubu ai maearima aꞌi ebaberonakia Tirama wairanai.
Ua buonai Tirama ehore buabeni namona ha ebenaka weiana hanona rauhubu etara haona,
weianai nahaeao Tirama herena.
20 Haeamona Tirama mai ena ꞌabiꞌuai pahihinai Iesu robe haunai ebaona.
Weiakia Lebi itubuna haukia robe haukiai teao hanona Tirama ena ꞌabiꞌuai pahihinai ahaꞌi.
21 Ia Iesu robe haunai eao hanona Tirama ena ꞌabiꞌuai pahihinai.
Tirama ṉa eꞌabi aiho,
“Obiapaka hanona ena ꞌabiꞌuai
pahihina ebabaina
ia ena ꞌabi aꞌi kebahaeaina,
‘Oi hanona robe haumuai nomiaho
keaomo banaibanai.’” Sal 110.4
22 Ṉa homana Iesu hanona ꞌabiꞌuai apaꞌuana neiana ibatohana haunai eao,
ꞌabiꞌuai neiana hanona ꞌabiꞌuai apaꞌuana ꞌaiꞌaina etara haona.
23 Robe haukia hanona teboꞌo pokina ia teꞌari ekia akai aꞌi temiaho banaibanai.
24 Ia Iesu hanona kemiaho banaibanai,
ena robe akana hanona aꞌi keao hau ha herena.
25 Ia nemiaho banaibanai abomo aika paukai ia Tirama ninoina paunai,
ia atanai Tirama herena kateao haukia kebamauri orenakia.
26 Iesu neiana hanona robe hauna apaꞌuana eka nuatae ikoikiai eꞌiobi.
Ia hanona erobe,
beho ꞌao kiꞌa ha ia herenai ahaꞌi,
ia hanona kiꞌa haukia baiatakiai ahaꞌi kupa ꞌubina tohanai ekaraꞌau.
27 Ia hanona robe haukia weiakia ihobokia ahaꞌi,
robe haukia ha ha hanona rani ikoikiai kipona ena kiꞌa ihina haona akana kebabai ꞌuaina murinai maearima ekia kiꞌa ihina haokia akakia kebabai.
ꞌA Iesu hanona ua aꞌi kehoma,
pokina ia kipona ena mauri ebaibeni kiꞌa iaꞌi obona tabanai eao,
ia rani hamonai aka weiana maikoina ebaorena.
28 Mose ena rauhubu ehore maearima eaꞌi taeanakia robe haukiai teao,
ia teꞌabeꞌabe,
ꞌa Tirama ena ꞌabiꞌuai pahihina rauhubu murinai emai hauna ehore Tirama Nahuna eaꞌi taeana ia abeꞌoru harai robe hauna apaꞌuanai eao ia hanona kemiaho banaibanai.