Kahabakiro Kahabaiꞌima Tirama ꞌEunai.
6
Ua buonai aika hamatabura waira hamaeao Keriso ena baꞌiobi taburana hamaꞌina,
ia aꞌikakauma baꞌiobikia koriꞌuaikia haukia herekiai aꞌi kahamiaho.
Neiakia hanona ꞌari akakiai naharaona kabe mai Tirama nahaꞌikakaumana,
2 ꞌuere robe baꞌiobina mai ahakiai ima tihaoꞌau,
abomo ꞌariai mikiri mue baꞌiobina mai miaho banaibanai bakaina,
aꞌi kahamue baꞌiobi neiakia pokikiai.
3 Tirama kenuatae raninai aika hanona kahakaꞌa waira kahaeao baꞌiobi taburana herena.
4 Maearima baika ekia aꞌikakauma teꞌakauma haukia aea katemue aiho?
Ia ꞌuainai Tirama aokia ebaeanakia,
kupa beruberuna teonobaina,
Auba Robe kipokia teaka haeamo,
5 Tirama ena ꞌabi namona teꞌiobina abomo Tirama kepoki aina hiabuna teonobaina,
6 ba Keriso herenai tiꞌeho tiꞌakauma raninai kateraona kabe rani ibaruana katemahamaha hanona aꞌi ketaina,
pokina ia aba imakiai Tirama Nahuna matiu ibiri ropo ꞌubinai tikoko ꞌau muena maearima wairakiai tibahaumaeana.
7 Ihobona matoha hano weiana ahanai rani boꞌona abara etibo,
aniani namokia nibaramanakia tebiraura haukia ꞌeukia,
hano weiana hanona Tirama ena banamo keaꞌina.
8 Ia hano weiana ahanai ꞌini boaboa mai awa ꞌiniꞌinikia teꞌomu raninai ena namo ha ahaꞌi,
Tirama ia aba keururu aina irubai kateꞌara ore.
9 Eꞌu raonaꞌau haumi e,
ua ṯahinabe pahihi aihonimi,
ia ai ṯaꞌiobi haraina wai hanona uahomana ahaꞌi,
banamo namona keaoainimi bamauri ꞌekana.
10 Tirama hanona tai ha aꞌi nitaina,
emi aka tobabai mai emi raonaꞌau ia atanai aba tobawaira tinana ena robe haukia tobarainakia bariu abomo tubarainakia haukia aꞌi kereanakia.
11 Ai ṯanuatae kiꞌa baha wai ikoimiai aka weianai katotabura keaomo puanai taba ṯobuabena hauna katoaꞌina.
12 Wai aꞌi katoꞌaboro,
ꞌa ekia aꞌikakauma mai ekia bapahihi paukiai Tirama eꞌabiꞌuai ai tabakia teaꞌi maearimakia ꞌabakiai katoao.
Ibabataina hanona ṉahomana.
Kahaꞌikakauma Tirama Ena ꞌAbiꞌuai Paunai.
13 Tirama ehore Aberahamo herenai eꞌabiꞌuai raninai hau ha Tirama aꞌi etara haona paunai ia kipona atanai ꞌabiꞌuai pahihina ebabaina,
14 etibaha,
“Au oi kabanamo tohaniꞌo,
ba ꞌabaꞌabamu kababoꞌonakia.”
15 Weiana Aberahamo ebaiꞌima mai bapahihina eaomo Tirama eꞌabiꞌuai hauna eaꞌina.
16 Maearima ha ia etara haona hauna atanai ꞌabiꞌuai pahihina kebabaina,
ꞌabiꞌuai pahihina weiana kehore ena ꞌabi kebatohana ekia baiara kebapuana.
17 Ihobonai,
Tirama enuatae kebatohana ena ꞌabiꞌuai hanona ketoha weiakia ena ꞌabiꞌuai tabakia kateaꞌi haukia herekiai,
abomo enuatae kateꞌiobina ia ena raona wairai hauna aꞌi kebahaeaina,
weiana buonai ia ꞌabiꞌuai pahihina ebabaina.
18 Tirama hanona aꞌi kebaiꞌoi paunai weiakia rua ena ꞌabiꞌuai mai ena ꞌabiꞌuai pahihina hanona aꞌi kebahaeainakia,
weiana aika hapihi hamai Tirama herenai hauka hanona batabura rarina ꞌakinai kahakori ꞌini wairakai nimai tabana kahabuabena.
19 Buabeni neiana haꞌina hauna hanona ihobona toꞌo ꞌabana eka mauri ai,
etabura ebakori ꞌininaka kebakatotonaka kupa marea robenai iꞌaea huri habuninai kebakabanainaka keaomo erobe kiꞌa baha ꞌekana aonai.
20 Aika paukai Iesu eꞌuai ekatoto weia robe hauna apaꞌuanai eao banaibanai,
ihobona Melkisedek robe akana ebabaina ꞌabana.