Iesu Hanona Eka Bamauri Pokinai Eao.
5
Robe haukia apaꞌuakia ikoikiai hanona maearima baiatakiai Tirama eaꞌi taeanakia ena aka katebabaina maearima paukiai,
beruberu tabakia mai kiꞌa iaꞌiobokia tabakia katebaibeni.
2 Robe hauna apaꞌuana kehore ꞌiobi ahaꞌi haukia mai beho tibabai haukia keaokoꞌo ainakia pokina ia kipona abomo taeara boꞌonai niꞌabeꞌabe.
3 Ia kipona abomo niꞌabeꞌabe paunai,
maearima ekia kiꞌa paukiai mo ahaꞌi,
ꞌa ia kipona ena kiꞌa iaꞌiobokia tabakia abomo kebaibeni.
4 Hau ha kipona robe hauna apaꞌuana hoana aꞌi keaꞌina ia Tirama kehore keaparina hauna robe hoana keaꞌina,
ihobona Arona eaparina ꞌabana.
5 Taeara ihobonai Keriso abomo kipona robe hauna apaꞌuana hoana aꞌi eaꞌina,
ia hoa ebena Tiramana ehina bena etibaha,
“Oi hanona au Nahaꞌu.
Bariu rani neianai au hanona
Hamamuai naeao.” Sal 2.7
6 Puka robenai ꞌeka haeai ha eꞌabi etibaha,
“Oi hanona robe haumuai
nomiaho keaomo banaibanai
Melkisedek robe akana
ebabaina ꞌabana.” Sal 110.4
7 Iesu hanopakai emiaho aonai ia ꞌariai kebamaurina Tiramana herenai ebahubaꞌari enoi eapari aota mahana mai beina,
ba Tirama ia aiana eona pokina kipona ebakoꞌikoꞌina Tirama emariki aina paunai.
8 Ia hanona Tirama Nahuna,
iamo ena hauhaiarai Tirama aiana ikaꞌaina eꞌiobina.
9 Weianai eꞌoru harai,
ia aiana tikaꞌaina haukia ikoikiai ekia bamauri banaibanai pokinai eao.
10 Tirama ehore Iesu robe hauna apaꞌuana ai ebaona Melkisedek robe akana ebabaina ꞌabana.
Aꞌi Kahamiaho Oho Miori Papakia ꞌAbana.
11 Melkisedek ena aka robana katahuna ꞌabikia hanona eboꞌo,
iamo ihinahina haraikia hanona tepahihi pokina ꞌuruna katona hanona obona aꞌi katobo.
12 Rani homaꞌana toaꞌikakauma aba etaina,
wai hanona baꞌiobi haumi ai patoao,
iamo wai bariu hau ha pehore Tirama ena ꞌabi tohana pokina pebaꞌiobi muenimi.
Wai hanona matoha ꞌae ṯeinu oho miorikia ꞌabakia,
aniani pahihikia ianikiai aꞌi tutabura baha.
13 Hau ha ꞌae neinu oho hauna hanona miori papana,
pokina ia bero mai beho aꞌi eꞌiobinakia.
14 Aniani pahihikia hanona maearima apaꞌuakia ꞌeukia,
ia hanona aokia tebero,
namo mai kiꞌa hoakia aba teꞌiobinakia.