Aika Kahatabura Arai ꞌEkana Kahakatoto.
4
Tirama ena ꞌabiꞌuai aika ꞌeuka ena arai ꞌekanai kahakatoto hanona ꞌekanai,
ua buonai aika kahaꞌima harainaka,
ha aꞌi keꞌeho arai ꞌekana aꞌi meꞌubo aina taꞌuna.
2 Aika pou namona haona,
Isaraela haukia abokiamo ꞌabi aba teona.
Iamo herekiai ꞌabi teona hauna ena namo ahaꞌi pokina teona haukia aꞌi teaꞌikakauma.
3 Weiana hanona Tirama eꞌabi ihobona etibaha,
“Aopuere aꞌabiꞌuai pahihi atibaha,
‘Ia hanona eꞌu arai ꞌekanai
aꞌi katekatoto.’”
Sal 95.11
Ia aika aꞌikakauma hauka hanona ena arai ꞌekanai kahakatoto. Aka neiana hanona aba ebaorena hanopaka ebabaina raninai.
4 Pokina puka robena aonai wapu ibaꞌabaihau hamomona pouna ehinana etibaha,
“Tirama ena aka ikoikiai ebaorenakia ba wapu ibaꞌabaihau hamomonai earai.”
5 Haeamona arai robana eahuna etibaha,
“Ia hanona eꞌu arai ꞌekanai aꞌi katekatoto.”
6 Weiakia pou namona teoꞌuaina haukia ekia aiaoꞌo ahaꞌi paunai Tirama ena arai ꞌekana aꞌi tekatoto.
Iamo bariu baika hanona ia ena arai ꞌekanai katekatoto.
7 Weiana paunai rani homaꞌana eao murinai Tirama ehore wapu ha eaꞌi taeana atana eaparina “Bariu rani neiana”,
haeamona Davida pinanai wapu weiana pouna ehinana etibaha,
“Bariu rani neianai,
Tirama aiana katona raninai
aomi aꞌi katoba pahihinakia.” Sal 95.7, 8
8 Iosua arai ꞌekana tohana pebenakia raninai Tirama hanona murinai wapu ha aꞌi peꞌuahina.
9 Ua buonai haꞌiobina Tirama ena maearima katearai ranina hanona nimai ihobona wapu ibaꞌabaihau hamomona ꞌabana.
10 Tirama ena arai ꞌekanai aba tekatoto haukia hanona ekia akai tiarai ihobona Tirama ena aka ebaorena ba earai ꞌabana.
11 Ua buonai aika hanona kahatabura arai ꞌekana weianai kahakatoto,
weiakia aiaoꞌo ahaꞌi haukia ꞌabakiai aꞌi kahaeao hau ha arai ꞌekana aꞌi meꞌubo aina taꞌuna.
12 Pokina Tirama ena ꞌabi hanona nimauri abomo niaka,
eara kiꞌa baha ba kareba weiana mahana abira abira teara hauna ꞌabana,
ia hanona eara kekomo rurunaka keaomo aoka mai aubaka herekia huriaka mai ibakai herekiai,
weiana maearima ekia raonaraona mai ekia nuatae kebawaira tinanakia.
13 Hanopaka tabakia ha Tirama wairanai aꞌi kebuni ꞌapua,
taba ikoikiai katewaira tina mahanai ba ia herenai aika eka mauri maikoinai pouna kahahinana.
Iesu Hanona Robe Haukia ꞌArakiai Hauna Apaꞌuana.
14 Aika hanona mai eka robe hauna apaꞌuana ekaraꞌau eao kupa,
ia hanona Iesu Tirama Nahuna.
Ua buonai aika hanona eka aꞌikakauma pouna nahahinana hauna kahaꞌi ꞌinina.
15 Eka robe hauna apaꞌuana Iesu hanona eka ꞌabeꞌabe ꞌekakiai niaokoꞌo ainaka,
neia hanopakai emiaho raninai tehobona taeara haeai haeaiai aika ihoboka,
iamo ia herenai hanona kiꞌa ha ahaꞌi.
16 Ua buonai mai taburaka kahaeao aokoꞌo Tiramana ena obia imiaꞌauna herenai,
weianai aokoꞌo apaꞌuana kahaꞌina mai aokoꞌo hoana kahatabu ahina,
eka nuatae ranikiai kebarainaka.