Iesu Hanona Mose Etara Haona.
3
Ua buonai uahoꞌabaꞌu robemi e,
wai kipokia Tirama eapari haeamonaka haumi,
Iesu katoraona haraina,
ia hanona Tirama ena iuhubeau hauna abomo robe hauna apaꞌuana eka aꞌikakaumai pouna nahahinana hauna.
2 Mose Tirama ena itu aonai eaka harai ihobonai Iesu hanona euhuna Tiramana ena aka ebabai haraina mai aona ikoinai.
3 Itu ebabaina hauna temarikiai apaꞌuana ba itu kipona,
ihobona Iesu hanona nuabi apaꞌuana keaꞌina ba Mose.
4 Itu ikoikiai mai ibabaikia haukia,
ba Tirama hanona taba ikoikiai ebabainakia.
5 Mose hanona Tirama ena itu ikoinai aonai taꞌaraꞌi haunai eao eaka harai mai aona ikoinai,
ia hanona muriai Tirama taba keꞌuahinakia haukia poukia ehinanakia.
6 Iamo Keriso hanona Tirama Nahuna,
ia Tirama ena itu nipoki aina mai aona ikoinai.
Aika rani ikoinai kahaꞌikakauma mai taburaka kahabuabena mai aonamoka raninai aika hanona Tirama ena maearima.
Tirama Ena Maearima Ekia Arai ꞌEkana.
7 Ua buonai Auba Robe ṉa eꞌabi aiho,
“Bariu rani neianai
Tirama aiana katona raninai,
8 aomi aꞌi katoba pahihinakia
rani weiana hanoꞌakunai
Tirama tehobona aonai
tebapairi pairi ꞌabana.
9 Weia ꞌabaꞌabami ihau bariabui
aokiai eꞌu aka teihanakia
iamo tehobonaꞌu mai
tebahobonaꞌu.
10 Ua buonai uru weiana
aopuere aina aꞌabi atibaha,
‘Aokia hanona atauꞌa ꞌakinai
buonai eꞌu taeara aꞌi teꞌiobina.’
11 Weiana aopuere aꞌabiꞌuai pahihi
atibaha,
‘Ia hanona eꞌu arai ꞌekanai
aꞌi katekatoto.’” Sal 95.7-11
12 Uahoꞌabaꞌu e,
katoꞌima harainimi ha kipona aona aꞌi keaꞌi kiꞌana ena aꞌikakaumai aꞌi kekaobo mauri Tiramana aꞌi kekamuriaina.
13 ꞌA Puka robena nehinana ‘bariu rani neiana’ hanona aika eka rani,
ua buonai rani ikoinai ꞌabami kipokia aomi katoba taburanakia,
kiꞌa kehore ena baiꞌoi ai aomi aꞌi meba pahihinakia marikina.
14 Eka aꞌikakauma haꞌiramana hauna kahaꞌi ꞌinina keaomo puanai hanona aika Keriso kipokia ṉahaka haeamo haukai kahaeao.
15 Puka robena ṉa eꞌabi aiho,
“Bariu rani neianai
Tirama aiana katona raninai
aomi aꞌi katoba pahihinakia
rani weianai ꞌabaꞌabami tebapairi
pairi ꞌabana.” Sal 95.7, 8
16 Maearima tabakia Tirama aiana teona iamo tebapairi pairi?
Weiakia Mose Aikupito ai ebakarahinakia haukia ikoikiai.
17 Tirama tai eopuere ainakia ihau bariabui aokiai?
Maearima weiakia kiꞌa tebabai hanoꞌakunai teꞌeho teꞌari ore haukia.
18 Tai herekiai Tirama eꞌabiꞌuai pahihi benakia ena arai ꞌekanai aꞌi katekatoto ṉa ehoma?
Weiana hanona tai ehina benakia?
Weiakia Tirama aiana aꞌi tekaꞌaina haukia.a
19 Ua buonai aika haꞌiobina ekia aꞌikakauma ahaꞌi paunai arai ꞌekanai aꞌi tekatoto.