Bamauri Hanona Taba Apaꞌuana.
2
Ua buonai ꞌabi tohana Nahuna pouna aba haona hauna kahaꞌima haraina,
weiana herenai aꞌi hamakapare taꞌuna.
2 Tirama ena aneru pinakiai ꞌabaꞌabami ehina benakia ꞌabikia abomo hiabu ꞌabikiai teao,
akakia aꞌi tebabai ꞌao aꞌi teaꞌi taeanakia haukia hanona puma ebaꞌoruna hauna tehoaina.
3 Bamauri hanona taba apaꞌuana,
weiana kahabakiꞌana raninai puma kemai hauna herenai aika aea kahapihi aiho?
Bamauri neiana hanona Obiapaka kipona aba ehina pou ꞌuaina,
weiana teona haukia tehore tebatohana aika herekai.
4 Tirama kipona abomo hoa apaꞌuakia,
bataꞌutaꞌu huri akakia,
hiabu akakia haeaihaeai ebawaira tinanakia,
mai ia ena nuatae ihobonai Auba Robe ebaibeni ia kipokia tebatohanakia.
Iesu Keꞌuai ainaka Bamauri Aonai.
5 Tirama hanona aneru aꞌi etinaꞌanakia,
hanopaka mahamahana nimai hauna aꞌi katepoki aina,
bariu hanopaka weiana pouna nahinana.
6 Puka robena aonai ꞌeka ha ṉa erere aihona etibaha,
“Tirama e,
maearima hanona taba?
Ba oi ia nuraona ꞌinina.
Maearima nahuna hanona taba?
Ba oi ia noꞌima haraina.
7 Oi ohore rani papana ia obariri
ꞌapuana aneru benukiai,
ia haeamona oi ohore nuabi
mai mariki hoana ꞌakonai
obabainuna.
8 Oi ohore taba ikoikiai
ia ena iha ꞌini baꞌanai
ohorotinakia.”
Sal 8.4-6
Tirama taba ikoikiai ia ena ihaꞌini baꞌanai ehorotinakia hanona ia kehore taba ikoikiai keiha ꞌininakia. Iamo bariu aika nahaihanakia hanona taba ikoikiai ia ena ihaꞌini baꞌanai ahaꞌi ꞌabana.
9 Ia aika Iesu nahaihana,
ia rani papana eriri aneru benukiai,
ia ꞌari ehau haiara aina paunai Tirama ehore nuabi mai mariki hoana ebabainuaina.
Ia ꞌari abiabina eonobaina maearima ikoikiai paukiai,
weiana hanona Tirama ena aokoꞌo hoana.
10 Tirama ena aka hanona ebero,
ia hanona taba ikoikiai ebabainakia mai neiha ꞌininakia,
nahuna boꞌokia ena nuabi aonai kebaka totonakia paunai enuatae Iesu kehau haiara keꞌoru harai,
weianai nahuna boꞌokia katemai ena nuabi aonai katemiaho.
Iesu ikupaiana mo keꞌuai ainakia bamauri aonai.
11 Maearima ekia kiꞌa neutu obonakia hauna mai ekia kiꞌa eutu obonakia haukia kipokia hamakia hanona hamona.
Ua buonai Iesu aꞌi nihaumaea ia keaparinakia uahoꞌabana.
12 Ia ehore Tirama ehina bena etibaha,
“Oi atamu kahina pouna
uahoꞌabaꞌu wairakiai.
Ekia toꞌu aokiai oi atamu
kabanamona.” Sal 22.22
13 Haeamona eꞌabi etibaha,
“Au hanona Tirama naꞌikakaumana.”
Isa 8.17
Eꞌabi mue etibaha,
“Au neiaꞌu mai Tirama ehore
nahunai ebenaꞌu haukia kipokia.” Isa 8.18
Iesu Maearima ai Eao Kebarainaka.
14 Weiakia nahuna ṉa nihoma haukia hanona maearima mai bitiokia abomo mai aruarukia,
Iesu kipona ia ihobokiai emai eka hauani maurinai emiaho,
weiana ebabaina pokina hanona ena ꞌariai Tiaporo ꞌari nipoki aina hauna kebaꞌehona,
15 abomo ekia mauri beraurakia ikoikiai ꞌari tetaꞌu aina taꞌarana teaꞌi haukia kerubu obonakia.
16 Weiana Iesu hanona aneru aꞌi nibarainakia,
ia Aberahamo ꞌabaꞌabana nibarainakia.
17 Ua buonai ia hanona uahoꞌabana ihobokiai eao taeara ikoikiai aokiai,
ia robe hauna apaꞌuanai keao mai ena aokoꞌo mai ena aka bero Tirama ena aka nibabaina aonai maearima ekia kiꞌa kehina haonakia.
18 Ia kipona baihobo aonai emiaho abomo ehau haiara buonai ia baihobo aonai haukia ibaraikia eꞌiobina.