Marere
HEBERU
Haukia Herekiai
Tirama Ena ꞌAbi Nahuna Pinanai Ehina benaka.
1
Waꞌi baha raninai Tirama ehore mahabanai haukia pinakiai rani boꞌona taeara haeaihaeai ai ꞌabaꞌabaka herekiai ehina benakia.
2 Ia bariu rani neiakia puakiai hanona Nahuna pinanai aika ehina benaka.
Tirama ehore Nahuna imanai kupa mai hanopaka ebabainakia,
ia ehore Nahuna etinaꞌana taba ikoikiai ebena ia ꞌeuna.
3 Nahuna neiana hanona neꞌimare Tirama nuabina nibawaira tinana,
ia hanona Tirama ihobona tohana,
ia ena ꞌabi hiabunai taba ikoikiai neꞌimanakia.
Ia maearima ekia kiꞌa eutu obonakia murinai kupa ꞌubinai hiabu ikoinai Tiramana itipana taina imariki aina ꞌekanai emiati nemiaho.
Tirama Nahuna Hanona Aneru Etara Haonakia.
4 Ia hanona aneru etara haonakia pokina Tirama ia atana ebena hauna hanona aneru atakia etara haonakia.
5 Tirama ehore ia ehina bena,
“Oi hanona au Nahaꞌu.
Bariu beraura neianai
Au oi abaramaniꞌo,”
Sal 2.7
ia aneru ha herenai ua aꞌi eꞌabi aiho.
Ia haeamona eꞌabi,
“Au hanona ia Hamanai kaeao,
ia abomo au Nahaꞌu ai keao.” 2 Sam 7.14
6 Haeamona Nahuna apaꞌuana euhuna hanopakai emai raninai eꞌabi etibaha,
“Tirama ena aneru ikoikiai
hanona ia temekuti aina.” Deu 32.43
7 Aneru robakia eahuna etibaha,
“Tirama ehore ena aneru
hanona baurai ebaonakia,
ena aneru baika taꞌaraꞌina tiaꞌi
haukia hanona iruba upakiai
ebaonakia.” Sal 104.4
8 Ia Nahuna robana eahuna etibaha,
“Oi hanona Tirama,
emu obia
imiaꞌauna kemiaho banaibanai,
oi hanona bero ai emu aiara
nupoki aina.
9 Aka bero onuatae aina,
babai kiꞌa hanona oꞌoatana.
Ua buonai Tirama emu Tirama
ehore aonamo tehoronai
eheiniꞌo emu obia hoana,
atamu ebapaꞌuana
ꞌabamu wairakiai.” Sal 45.6, 7
10 Haeamona etibaha,
“Obiapaka e,
popouna ꞌakinai hanopaka
hanona oi obabaina,
kupa abomo oi imamuai obabaina.
11 Kupa mai hanopaka
hanona kateꞌakauma,
iamo oi hanona komiaho
banaibanai,
ia taba ikoikiai kateburuburu
habuni ꞌaiꞌaina ꞌabana.
12 Kupa mai hanopaka kounakia
habuni iroꞌabu ꞌabana,
weiakia ihakia katehaeai
habuni niꞌaiꞌai ꞌabana.
Ia oi hanona ꞌekamuai mo,
emu mauri ihaukia hanona
aꞌi kepua.” Sal 102.25-27
13 Rani ha Tirama aneru ha ṉa aꞌi ehinabe aihona aꞌi etibaha,
“Itipaꞌu tainai momiati
keaomo oi iꞌoatamu haukia
ꞌapumu baꞌanai kahorotinakia.” Sal 110.1
14 Aneru hanona taba?
Ia ikoikiai hanona auba,
Tirama taꞌarana tiaꞌi haukia,
euhunakia bamauri kateaꞌina haukia katebarainakia.