Paulo Ena Marere
PILEMONA
Herenai
Banamo ꞌAbina.
1
Au Paulo,
Keriso Iesu paunai nawapura hauꞌu,
mai uahoꞌabaka Timoteo ohi marere ṯarerena niwahi Pilemona,
emai hau kiꞌamu kipokia haka haeamo haumu heremu,
2 mai haibuka Apia,
Arekipo nahahuari haeamo hauna mai Tirama ena marea haukia naia emu ituai tutoꞌu haeamo haukia ikoimiai heremi.
3 Nabahubaꞌari Tirama aika Hamaka mai Obiapaka Iesu Keriso ekia aokoꞌo hoana mai baibua hanona heremiai kemiaho.
Pilemona Ena Raonaꞌau Mai Aꞌikakauma.
4 Rani ikoinai eꞌu bahubaꞌari ai oi naraonaniꞌo haeamona eꞌu Tirama namo ꞌabina nabena,
5 pokina emu aꞌikakauma Obiapaka Iesu herenai hauna mai emu raonaꞌau Tirama ena maearima robekia ikoikiai herekiai hauna poukia aba aoꞌo.
6 Au nabahubaꞌari hanona eka baihauai oi emu aꞌikakauma keaka harai aonai taba namokia weiakia Keriso aonai aba haꞌinakia haukia maikoinai obokia kobo harai.
7 Hatiꞌu kiꞌamu e,
emu raonaꞌau weiana ehore eꞌu aonamo ebapaꞌua kiꞌa bahana mai aoꞌu ebatabura kiꞌana,
pokina uahoꞌabaka Tirama ena robe haukia aokia obaꞌamarina paunai.
Paulo Onesimo Paunai Enoi.
8 Ua buonai Keriso aonai au hanona panuakoꞌo pabahi ahiniꞌo aka berona kobabaina.
9 Iamo naraonaꞌau ainiꞌo paunai,
ua aꞌi kahoma ia nanoiniꞌo.
Au Paulo bariu aba akiro abomo Keriso Iesu paunai nawapura hauꞌu,
10 nahaꞌu Onesimo paunai au oi nanoiniꞌo,
ia hanona au nahaꞌuai eao weia wapura itunai amiaho aonai.
11 ꞌUainai hanona ia ena namo ahaꞌi oi heremuai,
ia bariu hanona ena namo aba eapaꞌua oi mai au herekai.
12 Au hanona ia nauhu muena niwahi heremu.
Iamo aoꞌu tohanai naraonaꞌau aina hauna nauhuna.
13 Au neia pou namona paunai nawapura aonai nanuatae paꞌi ꞌinina pemiaho oi ꞌekamu peaꞌina au pebarainaꞌu.
14 Ia au taba haꞌi kababaina keaomo oi koꞌabi harai ꞌuai,
ba oi emu namo ha au hereꞌuai kobabaina,
weiana hanona oi emu nuataeai kobabaina ia au eꞌu bahiahi paunai aꞌi kobabaina.
15 Onesimo hanona rani papana ehaboniꞌo,
baiatami epaꞌa buonai bariu hanona koaꞌi muena heremuai kemiaho baihana.
16 Ia hanona taꞌaraꞌi hauna ꞌabaeana ahaꞌi,
ꞌa ia hanona enamo kiꞌa baha ba taꞌaraꞌi haukia,
ia hanona uahoꞌabaka raonaꞌauna,
au ia naraonaꞌau aina,
iamo oi hanona koraonaꞌauai kiꞌa bahana,
ia hanona taꞌaraꞌi hauna mai uahoꞌabaka tohana Obiapaka aonai.
17 Ua buonai,
oi nuraonana au emu hau tohaꞌu raninai,
Onesimo koaꞌi taea haraina matoha au nuaꞌi taeanaꞌu ꞌabana.
18 Ia oi heremuai taba ha eaꞌi kiꞌana ꞌao heremuai ena aꞌi ꞌabaea ha reꞌa,
taba weiakia ikoikiai hanona au eꞌu pumai kateao.
19 Au Paulo ꞌabi neiana au kipoꞌu imaꞌuai narerena.
ꞌAra bita hanona ikoinai ꞌarakia kahorenakia.
(Ia oi abarainiꞌo bamauri otabu ahina hauna robana aꞌi nahuna.)
20 Ua buonai,
hatiꞌu e,
au nanoiniꞌo Obiapaka atanai eꞌu nuatae naiana kobabaina,
Keriso aonai aoꞌu kobaꞌamarina.
21 Au marere neiana narerena hanona aꞌiobina eꞌu noi heremuai hauna akana aba kobabaina,
ba kobabai banaina.
22 Haeamona ituai baki ikaihurina ha koaꞌiaꞌi haraina au ꞌeuꞌu,
pokina eꞌu buabeni Tirama herenai hanona emi bahubaꞌari keaꞌi taeana ba au kawahi heremu.
Banamo ꞌAbina Orena.
23 Au ꞌabaꞌu ha Epafra,
Keriso Iesu paunai tararua ṯawapura haeamo hauna ena banamo ꞌabina neuhuna oi heremu.
24 Abomo Mareko,
Aristako,
Dema,
mai Luka,
au kipokia ṯaka haeamo haukia ekia banamo ꞌabikia ṯeuhunakia.
25 Nabahubaꞌari eka Obiapaka Iesu Keriso ena aokoꞌo hoana hanona wai aubamiai kemiaho.