Rani Ikoinai Katoaonamo Obiapaka Aonai.
4
Weiana buonai,
uahoꞌabaꞌu e,
wai naraonaꞌau ainimi haumi mai naraona kiꞌa bahanimi haumi hanona eꞌu aonamo mai eꞌu apa.
Wai hanona ua katokori ꞌini aiho Obiapaka aonai au aꞌabi ihobonai.
2 Euodia nanoina mai Sunutuke nanoina,
terarua aokia katebahamomona Obiapaka aonai.
3 Oi iebebe hamona habuana haumu,
eꞌu nuatae babiꞌe neiakia rua kobarainakia,
pokina ia hanona au kipokia taka haeamo pou namona paunai,
abomo Klemento mai au ꞌabaꞌu kipokia taka haeamo haukia,
ia atakia hanona Tirama ena mauri pukana aonai nemiaho.
4 Rani ikoinai katoaonamo Obiapaka aonai.
Haeamona nahinabe muenimi.
Katoaonamo!
5 Emi rabo harai maearima ikoinai wairakiai katobawaira tinana.
Obiapaka hanona aba kemai.
6 Aomi aꞌi kearo ꞌari taba ha herenai,
ia taba ikoikiai aokiai bahubaꞌari mai nuatae ai Tirama katonoina mai aomi namonai.
7 Tirama ena baibua hanona maearima ena ꞌiobi etara haona,
weianai aomi mai emi raona raona keiha ꞌinina Keriso Iesu aonai.
8 Uahoꞌabaꞌu e,
ꞌabi orena neiana.
Aka nahomakia katoraona ꞌini,
aka namokia mai maearima atakia tibanamona akakia ikoikiai,
toha tabakia,
mariki tabakia,
bero tabakia,
aokia namo tabakia,
raonaꞌau tabakia,
ibanamo tabakia.
9 Au hereꞌu ai toꞌiobina,
toaꞌina,
ꞌuruna tona hauna,
ꞌao hereꞌu ai toihana hauna katobahobona.
Weiana baibua Tiramana heremiai kemiaho.
Paulo Pilipo Haukia Ekia Baibeni Eaꞌina Namo ꞌAbina Ehinana.
10 Obiapaka aonai naonamo kiꞌa baha,
pokina wai au toraona muenaꞌu paunai,
aꞌiobina ꞌuainai toraonanaꞌu,
ia katobarainaꞌu taearana ahaꞌi.
11 Eꞌu uraru ꞌabina aꞌi nahinana,
pokina aba amarereaina taba ikoikiai aokiai aea kamamata aihona hereꞌu ai nemiaho hauna naonamo aina.
12 Au aꞌiobina taba nahanuatae aonai aea kamauri aiho,
abomo au aꞌiobina taba ena boꞌo aonai aea kamauri aiho,
taba bunikia aba amarere ainakia ikoikiai aba amamata ainakia,
aniꞌari ꞌao mareꞌa,
obia ꞌao uraru.
13 Keriso nihore hiabu nibenaꞌu,
ia aonai taba ikoinai katabura ainakia.
14 Ia eꞌu haiara aokiai toaꞌi turinaꞌu hanona enamo kiꞌa baha.
15 Wai Pilipo haumi e,
toꞌiobi haraina pou namona airoro aina popounai weia Makedonia ahabona raninai wai Tirama ena marea haumi Pilipoai haumi mo kipokia habarai barai baibeni hoanai.
16 Ia au Tesalonika ai amiaho raninai,
rani baika barai barai totiu ahinakia temai hereꞌu.
17 Beruberu aꞌi natabuna ia buabua natabuna wai ibanamomi buabuana.
18 Au taba ikoinai aba aꞌinakia,
hereꞌu taba aba eboꞌo,
emi baibeni Epaprodito imanai totiuahi haukia aba aꞌinakia,
weiana hanona timikia namokia mai baibeni tabakia Tirama aba eaꞌi taeanakia eaonamo ainakia.
19 Eꞌu Tirama kehore tokapu tabakia kebeni muenimi Keriso Iesu nuabina aonai kohu namokia tohakiai kebabonunimi.
20 Aika Hamaka Tirama herenai nuabina kemiaho banai banai.
Amen.
Banamo ꞌAbina Orena.
21 Keriso Iesu ena robe haukia ikoikiai herekiai banamo katobenakia.
Uahoꞌabaka hereꞌu ai ṯemiaho haukia ekia banamo tibenimi.
22 Robe haukia ikoikiai neia mai baika obia ꞌarana Kaisa ena ituai ṯemiaho haukia abomo banamo tibenimi.
23 Nabahubaꞌari Obiapaka Iesu Keriso ena aokoꞌo hoana hanona aubami ai kemiaho.