Runakuna imanö kayänanpä kanqantapis ninqan
3
Timoteo, shumaq tantiyakuy ushanan tiempucho runakuna alläpa ñakayänanpä kanqanta. 2 Runakunami kayanqa kikillanpä imatapis munaq, qellaypä ayrajashqa, runa tukuq, Tayta Diospa contran parlaq, mamanta y taytanta mana cäsukuq, mana agradëcikuq y Tayta Diospa palabranta manakaqman churaq. 3 Manami kuyakuynin ni kuyapäkuyninpis kanqatsu. Tsaynöpis kayanqa tumpakuq, mana tantiyakuypa imatapis llutalla ruraq, runa mayinta chikiq y alli ruraqkunapa contran shäriq. 4 Tsaynöpis kayanqa traicionëru, mana yarpachakuypa imatapis ruraq y alläpa yachaq tukuq. Tayta Dios munanqanta rurayänanpa trokinqa shonqunkuna munanqallantami rurayanqa. 5 Runakuna rikayänallanpämi Tayta Diosman yärakuq tukuyanqa. Tsaynö karpis jutsata rurarmi kawayanqa. Tsaynö kawaq runakunapita witikuy.6 Tsay runakunaqa imaykaläya jutsa ruraq warmikunapa wayinkunamanmi engañayänanpä yaykuyan. 7 Tsay warmikuna jukta jukta yachakurpis Jesucristupa willakuyninta imaypis manami yachakuyantsu.
8 Janeswan Jambres Moiséspa contran shäriyanqannömi† llutan yachatsikuqkunapis Jesucristupa willakuyninta willakuqkunapa contran shäriyan. Llutan yarpaykuna umankunacho kaptinmi Jesucristupa willakuyninta imaypis tantiyayantsu. 9 Tsaynö yachatsiyaptinpis llutan yachatsikuq kayanqantami tantiyayanqa. Tsaymi Janestawan Jambresta mana cäsupäyanqannö tsay llutan yachatsikuqkunatapis cäsupäyanqatsu.
Pablo kawanqannö Timoteupis kawanqanta ninqan
10 Qammi itsanqa yachatsinqäkunata shumaq yachakushqayki. Kawanqänömi kawaykanki, yarpanqänömi yarpanki, criyinqänömi criyinki, ñakarpis awantakunqänömi awantanki, kuyakuq kanqänömi kuyakuq kanki, ñakatsimaptinpis pacienciakunqänömi pacienciakunki. 11 Musyankimi Antioquíacho,† Iconiucho† y Listracho† runakuna chikimar qatikachäyämanqanta. Tsaynö chikiyämaptinpis Señor Jesucristumi salvamashqa. 12 Tsaynöllami Jesucristo munanqannö kawaq kaqtaqa pitapis chikir ñakatsiyanqa.
13 Mana alli runakuna y engañakuqkunaqa qoyay qoyaymi oqrakashqanö kayanqa. Wakin runakunata engañayanqannömi kikinkunatapis engañayanqa.
Tayta Diospa palabranta yachakunanpä ninqan
14 Qam itsanqa Tayta Diospa willakuynin alli kanqanta tantiyakur yachakunqaykinölla shumaq kaway. Yachatsishuqnikikuna pï kayanqantapis musyankimi. 15 Tsaynöpis musyankimi wamra kanqaykipita patsa Tayta Diospa palabranta yachatsiyäshunqaykita. Diospa palabranmi tantiyatsishushqayki Jesucristuman yärakur salvakunaykipä kanqanta.
16 Tayta Diospa palabrancho llapan qellqaraqkunaqa Tayta Diospa yarpayninkunami kaykan. Tsaymi alli kaykan yachatsinantsikpä, tantiyatsinantsikpä, corriginantsikpä y Tayta Dios munanqannö kawanantsikpä. 17 Tayta Diospa palabranta yachakurmi Tayta Diosman yärakuqkuna imaypis kamarikushqa kaykäyanqa alli kaqkunata rurayänanpä.