Mana ajayaypa willakunanpä ninqan
2
Timoteo, kuyay tsurïnö kaptikimi qamta nï: Jesucristo yanapaykäshuptikiqa mana ajayaypa pay munanqannö kaway. 2 Runakunapa ñöpancho yachatsinqäta yärakuypä kaq wawqikunata yachatsiy paykunapis wakinkunata yachatsiyänanpä.3 Jesucristupa alli soldädun kaykarqa imanö ñakarpis pay munanqannö kaway. 4 Manami pï soldädupis soldädu kayninta jaqiriykur juk rurayman aywantsu. Tsaypa trokinqa mandaqnin ninqantami ruran. 5 Tsaynöllami llallinakuypa cörriqkunapis premiuta chaskiyänanpä reglamentu ninqannö cörriyan. Tsaynö mana cörrirqa manami ima premiutapis chaskiyantsu. 6 Murukuq runapis murunqan wayuptinmi puntata yawan. 7 Kay ninqäkunata shumaq yarpachakuptikiqa shumaq tantiyakunaykipämi Señor Jesucristo yanapashunki.
8 Timoteo, rey David castapita Jesucristo yurinqanta y wanurpis kawarimunqanta mana qonqaypa willakuy. Tsaytami noqapis willakuykä. 9 Tsayta willakunqäpitami pasaypa ñakaykä. Kananpis imayka runa wanutsiqtanömi carcelcho wichqaraykätsiyäman. Wichqaraptïpis Jesucristupa willakuynintaqa imapis manami tsapantsu. 10 Tsaymi imanö ñakarpis mana ajayaypa Jesucristupa willakuyninta willakuykä. Tsaynöpami akranqan kaqkuna Jesucristuman yärakuyaptin gloriacho imayyaqpis kawayänanpä Tayta Dios salvanqa.
11 Kay willakuyqa rasun kaqmi:
Jesucristuwan wanushqana kaykarqa paywanmi kawashun.†
12 Ñakayta atiparqa paywanmi mandakushun.†
Ñëgashqaqa paypis ñëgamäshunmi.†
13 Awninqantsikta mana cumplishqapis payqa cumplinmi.
Payqa awninqanta manami imaypis qonqantsu.
Dios munanqannö willakunanpä ninqan
14 Kay ninqäkunata wawqikunata panikunata imaypis yarpätsiy. Tayta Diospa jutincho tantiyatsiy llutan yachatsikuykunata mana chaskiyänanpä. Tsaykunata chaskirqa manami Tayta Dios munanqannötsu kawayan. Tsaynöpis wawqikunata panikunatami pasaypa qallayätsiyan.
15 Tayta Dios munanqannö willakuyninta shumaq yachatsiy. Alli yachatsirqa alli arupakuq runa mana penqakunqannömi qampis penqakunkitsu. 16 Llutan yachatsikuqkunawan ama rimanakuytsu. Paykunawan rimanakuptikiqa wawqikunapa panikunapa shonqunmi mas chukruyanqa.
17 Llutan yachatsikuyqa imayka cáncer qeshyanömi maytsaymanpis chan. Himeneuwan Filetumi llutanta yachatsikur puriykäyan. 18 Paykunami niyan Jesucristuman yärakur kawarimushqanöna kar wanunqantsikpita manana kawarimunantsikpä kanqanta. Tsaynö yachatsir pantakätsiyaptinmi wakin wawqikuna panikuna Jesucristuman yärakuyannatsu.
19 Wakinkuna mana yärakuyaptinpis Tayta Dios akranqan kaqkunaqa alli cimientushqa wayinömi kaykäyan. Tsaymi Diospa palabrancho nin: “Payman yärakuqkunataqa Tayta Dios reqinmi”.†
Tsaynöllami nin: “Tayta Diosmana yärakuqkunaqa jutsata ama rurayätsunnatsu”.
20 Imaykayuqpa wayinchöqa manami qorillapitatsu ni qellayllapitatsu plätukuna kaykan, sinöqa qerupitapis mitupitapis kanmi. Qoripita y qellaypita plätukunaqa manami lluta manijanantsikpätsu kaykan. Qerupita y mitupita kaqmi itsanqa imaykacho manijanantsikpä kaykan. 21 Pipis qori plätunö kananpäqa jutsata mana ruraypa kawatsun y llutan yachatsikuyta ama chaskitsuntsu. Tsaynöpami qoripita rurashqa manëjuta imaykayuq runa utilizanqannö paytapis allita rurananpä Tayta Dios utilizanqa.
Timoteo imanö kawananpäpis ninqan
22 Wakin chölukuna llutanta rurayaptinpis qamqa ama ruraytsu. Tsaypa trokinqa Tayta Dios munanqannö kaway, payman yärakuy, pïmaytapis kuyay y llapan runakunawanpis alli kaway. Tsaynöpis Señor Jesucristuta alabar llampu shonquyuqkunawan imaypis takukay.
23 Llutan yachatsikuykunapita wakin runakuna rimanakuyaptinpis tsayman ama jatikaytsu. Tsaynö rimanakurmi qallayätsinakuyan. 24 Señor Jesucristupa sirviqnin kaykarqa piwanpis mana rimanakuypa kaway. Tsaynöpis llapan runakunawan alli kaway, shumaq yachatsiy y pacienciaykipis katsun.