3 Unay castäkuna sirviyanqan y noqapis sirvinqä Tayta Diosta mañakurmi paqaspa junaqpapis qampä agradëcikü. 4 Waqar quëdamunqaykita yarparmi kushikunantsikpä kutimuyta munaykä.

5 Noqa musyämi Tayta Diosman yärakur pay munanqannö kawanqaykita. Awilayki Loida y mamayki Eunicipis Tayta Diosman yärakur kawayanqannömi qampis kawaykanki. 6 Tsaynö kawaykarqa mana mantsariypa Tayta Diosta imaypis sirviy. Makïta umaykiman churaykur qampä mañakunqä hörami payta sirvinaykipä Tayta Dios churashushqayki. 7 Manami mantsarinantsikpätsu Tayta Dios churamashqantsik, tsaypa trokinqa mana mantsariypa willakunantsikpä, pïmaytapis kuyanantsikpä y shumaq tantiyakur imatapis ruranantsikpämi churamashqantsik.

8 Tsaynö kaykaptinqa mana penqakuypa Jesucristupa willakuyninta willakuy. Alli willakuyninta willakunqäpita prësu wichqarätsiyämaptinpis ama penqakuytsu. Imanö ñakarpis alli willakuyninta willakuy. Tsaynö willakunaykipämi Tayta Dios yanapaykäshunki.

9 Tayta Dios salvamarnintsikmi qayamashqantsik pay munanqannö santu kanantsikpä. Manami imatapis allita ruranqantsikpitatsu salvamashqantsik, tsaypa trokinqa jutsayuq kashqapis kuyapämarnintsikmi salvamashqantsik. Tsaynö kuyapämashqantsik kay patsata manarä kamar Jesucristuman churamarnintsikmi. 10 Kuyapämanqantsikta musyatsimashqantsik salvamaqnintsik Jesucristuta kay patsaman kachamurmi. Paymi willakuynincho ninqannö wanuyta vinciskir mana ushakaq kawayta qaramashqantsik.

11 Alli willakuyninta [mana Israel runakunata] willapänäpä Tayta Dios churamaptinmi apostolnin kar yachaykätsï. 12 Willakunqäpita carcelcho ñakarpis Jesucristumanmi yärakü. Paymi qorikamanqan junaqyaq munayninwan yanapamanqa. Tsaymi carcelcho wichqararpis penqakütsu.

13 Timoteo, Jesucristupa willakuyninta yachatsinqänölla qampis yachatsiy. Jesucristo kuyashunqaykinölla payman yärakur pïmaywanpis kuyanakur kaway. 14 Jesucristupa willakuyninta pipis llutanta yachatsiptinqa mana chaskipäyänanpä wawqikunata panikunata tantiyatsiy. Tantiyatsinaykipä Espíritu Santumi yanapashunki. Paymi yanapamänantsikpä imaypis noqantsikwan kaykan.

15 Musyanqaykinöpis Asia provinciacho taq wawqikuna panikuna llapanmi jaqiriykamar aywakuyashqa. Tsaynöllami Figeluwan Hermógenespis aywakuyashqa.

16 Onesíforuta y castankunatapis Señor Jesucristo yanapaykullätsun. Carcelcho prësu kaykaptïpis mana penqakuypami imaypis yanapamashqa. 17 Tsaynöllami Romaman chaykamurpis tarimanqanyaq ashimashqa. 18 Musyanqaykinöpis Éfeso markacho shumaqmi yanapamarqantsik. Runakunata juzganqan junaq Señor Jesucristo payta kuyapaykullätsun.