3 Shamuq watakunacho Jesucristupa willakuyninta manami wiyayta munayanqanatsu. Tsaypa trokinqa llutan yachatsikuqkunata ashirmi paykuna yachatsiyanqallanta wiyayta munayanqa. 4 Manakaqkunallata wiyayta munarmi rasun kaq yachatsikuyta cäsukuyanqatsu. 5 Qamqa Tayta Dios munanqannö kawanaykipä shumaq tantiyakuy. Imanö ñakarpis payman yärakuy. Willakuyninta pïmaytapis willay. Mana qelanaypa Tayta Diosta sirviy.

6 Noqaqa wanunäpänami kaykä. Sacrificiuman jichanqan vïnu altarcho ushakanqannömi^† noqapis ushakänäpäna kaykä. 7 Alli soldädunömi llapanta cumplishqä. Imayka llallinakur cörriqnömi chänäpä kaqman chashqä. Yärakunqänöllami mana kachaypa imaypis yärakushqä. 8 Tsaymi kananqa shuyaraykä alli juzgaq juez Señor Jesucristo kutimunan junaq corönata entregamänanpä kanqanta. Tsay corönaqa paypa ñöpancho jutsaynaqta chaskimanqanmi. Manami noqallatsu corönata chaskishä, sinöqa Jesucristuta llapan shuyaqkunami chaskiyanqa.

9 Timoteo, tinkunantsikpä juklla shamuy. 10 Wawqintsik Demasmi^† kikin munanqannö kawayta munar jaqiramar Tesalónica markaman aywakushqa. Crescentitami kachashqä Galacia provinciaman, Titutanami^† Dalmacia markaman. 11 Lucasllanami^† noqawan kaykan. Shamurqa Marcusta^† pushakarkamunki. Payqa Tayta Diospa willakuyninta willakuptï allimi yanapamanqa. 12 Wawqintsik Tíquicutanami^† Éfesuman kachaykämü.

13 Troaschömi^† Carpupa wayincho capötïta jaqimurqä. Shamurqa capötïtapis librükunatapis apakarkamunki. Mana qonqaypa pergamïnükunatapis apakarkamunki.

14 Herrëru Alejandrumi^† pasaypa conträ rikakushqa. Tsaynö kanqanpita Señor Jesucristumi juzganqa.^† 15 Alejandrupitaqa qampis cuidakuy. Willakunqantsik mana alli kanqantami pitapis nikan.

16 Autoridäkunacho ñöpata declaraptï manami pipis janä shärishqatsu. Llapanmi japalläta jaqiriyämashqa. Tsaynö rurayämanqanpita Tayta Dios perdonaykullätsun. 17 Paykuna jaqiriyämaptinpis Tayta Diosqa noqawan kaykarmi shakyätsimashqa. Tsaymi mana Israel autoridäkunapa ñöpanchöpis alli willakuyninta willakunäpä yanapamashqa. Wanutsiyämänanpä kaykäyaptinmi leonpa shiminpitanöpis Tayta Dios salvamashqa. 18 Tsaynöllami llapan mana allikunapitapis salvamanqa. Tsaynöpis mandakuynincho imayyaqpis kawanäpämi pushamanqa. ¡Tayta Dios imaypis alabashqa kaykullätsun! Amén.

19 Priscilatawan Aquilata winchiykuynï qoykuyällay.^† Onesíforupa^† castantapis winchikuynï qoykuyällay. 20 Erastumi^† Corintucho quëdamushqa. Trófimutanami^† Miletucho qeshyaykaqta jaqimurqä. 21 Tamya killa manarä chämunqanyaq imaykatapis jaqiskir shamunki. Eubulo, Pudente, Lino, Claudia y wakin wawqikuna panikunami winchikayämushunki.

22 Señor Jesucristo imachöpis yanapaykulläshuy. Tsaycho kaqkunata llapaykita kuyapaykuyälläshuy. [Amén.]