Jesucristo kutimunanpä kanqan
2
Wawqikuna panikuna, Señornintsik Jesucristo kutimur qorikamänantsikpä kanqanta shumaq tantiyakuyänaykitami munayä.† 2 Qamkuna ama cäsupäyaytsu “Jesucristo kutimunanpä kaq tiempu chämushqanami” nir pipis yachatsiyäshuptiki. Tsaynöpis ama criyiyaytsu “Espíritu Santumi revelamashqa” nir yachatsiyäshuptiki. Tsaynöpis ama criyiyaytsu “kikin Pablumi nishqa” y “Pablo cartakamunqan cartachöpis tsaynöllami nikan” nir yachatsiyäshuptikipis. 3 Imata niyäshuptikipis ama chaskipäyaytsu. Jesucristo kutimunanpäqa puntata atskaq runakunarämi Tayta Diospa contran shäriyanqa. Tsaynöllami anticristo shamunqa. Paytami Tayta Dios infiernuman qaykunqa.4 Anticristo shamur manami munanqatsu Tayta Diosta ni imatapis runakuna adorayänanta, tsaypa trokinqa payllata adorayänantami munanqa. Tsaynöpis payta adorayänanpämi Dios tukurnin Tayta Diospa templunman yaykuskir jamanqa.† 5 ¿Manaku yarpäyanki tsaynö kananpä kanqanta mayna willayanqäta?
6 Qamkuna musyayankimi anticristuta manarä shamunanpä ima tsaparaykanqantapis. Tsaynö tsaparanqa tiempu chämunqanyaqmi. 7 Manarä shamuptinpis Satanásqa maynami runakunata mana musyaylla engañaykan Tayta Diosta mana cäsukuyänanpä. Tsaparaykanqanta Tayta Dios jipiskiptinnami anticristo shamunqa. 8 Paytami Señor Jesucristo chipipirrä kutimur ushakaqpä pükaskinqa.
9 Jesucristo manarä kutimuptinmi Satanáspa munayninwan tukuyläya milagrukunata anticristo ruranqa.† 10 Tsaynöpami infiernuman qaykushqa kayänanpä destinashqa kaqkunata engañanqa. Paykunaqa Jesucristupa willakuyninta mana chaskikurmi salvakuyanqatsu. 11 Mana chaskikuyanqanpitami Tayta Dios paykunata pantakätsinqa anticristuta chaskikuyänanpä. 12 Tsaynöpami Tayta Diosta mana cäsukur jutsa ruraqkuna llapanpis infiernucho ñakayanqa.
Salvashqa kanantsikpä Tayta Dios akramanqantsik
13 Wawqikuna panikuna, qamkunataqa Tayta Diosmi kuyayäshurniki salvayäshunaykipä qallananpita akrayäshushqayki. Kananqa Jesucristupa willakuyninta chaskikur payman yärakuyaptiki y Diospa makincho kawayänaykipä Espíritu Santu yanapayäshuptikimi salvayäshushqayki. Tsaypitami Tayta Diosta imaypis agradëcikuyä. 14 Salvashqa kayänaykipämi paypa alli willakuyninta willayaptï qayayäshushqayki. Tsaymi Señornintsik Jesucristo chipipirrä kutimur pushayäshuptiki qamkunapis paypa ñöpancho kushishqa kawayanki.
15 Wawqikuna panikuna, tsaynö kananpä kaykaptinqa Tayta Diosman shumaq yärakur qonqäyaytsu parlapäyanqäta y cartapapis yätsiyanqäkunata.† 16 Señornintsik Jesucristo y kuyamaqnintsik, imaypis shakyätsimaqnintsik y ñöpanman pushamaqnintsik Yayantsik Tayta Dios 17 yanapaykuyälläshuy mana llakikuyänaykipä, pïmaytapis alli shimillaykipa parlapäyänaykipä y allikunata rurar kawayänaykipä.