2 Tesalonicenses
Tesalónica markacho taq yärakuq mayinkunaman apóstol Pablo ishkay kaq cartata cartakunqan
Apóstol Pablo winchikunqan
1
Tesalónica markacho† kaykaq yärakuq mayikuna:Noqa Pablo, wawqintsik Silvanoa y Timoteumi kay cartata apaykätsiyämü. Qamkunaqa Yayantsik Tayta Diospa y Señornintsik Jesucristupa makinchömi kaykäyanki. 2 Yayantsik Tayta Dios kuyapäyäshurniki alli kawayänaykipä yanapaykuyälläshuy.
Tayta Diosta agradëcikur mañakunqan
3 Wawqikuna panikuna, Jesucristuman qoyay qoyay mas yärakuyanqaykita y runa mayikita kuyayanqaykita musyarmi Tayta Diosta imaypis agradëcikuyä. 4 Tsaymi juklä markakunaman charpis wawqikunata panikunata willayä runakuna chikir ñakatsiyäshuptikipis Jesucristuman yärakuykäyanqaykita. 5 Mana ajayaypa Jesucristuman tsaynö yärakuyaptikimi tantiyayä alli juzgaq Tayta Diospa mandakuyninman yaykuyänaykipä kanqanta.
Jutsa ruraqkunata Tayta Dios juzgananpä kanqan
6 Tayta Dios alli juzgaq karmi contrayki shäriqkunata castiganqa 7 y qamkunatana noqakunatawan manana ñakanantsikpä qorikamäshun. Tsaynö kanqa Señor Jesucristo munayyuq angelninkunawan ciëlupita kutimuptinmi. 8 Tayta Diosta mana cäsukur Señornintsik Jesucristupa alli willakuyninman mana criyikuqkunataqa lunyaypa lunyaq nina chawpincho shamurmi castiganqa. 9 Paykunaqa munayyuq Tayta Diospa ñöpanman chäyänanpa trokinqa infiernuchömi imayyaqpis ñakayanqa. 10 Tsaynö kanqa Señor Jesucristo kay patsaman kutimuptinmi. Tsay junaqmi payman yärakuqkuna pasaypa kushikur alabayanqa. Tsaychömi qamkunapis Jesucristupa alli willakuyninta willakuyanqäta cäsukuyanqaykipita kushishqa alabayanki.
11 Tsaymi Tayta Diosnintsikta imaypis mañakuyä pay munanqannö kawayänaykipä. Tsaynö kawayänaykipämi qayayäshushqayki. Munayninwan yanapaykuyälläshuy payman yärakur allikunata imaypis rurayänaykipä. 12 Tsaynö kawayaptikimi Señornintsik Jesucristupa jutinta joqarir alabayanqa y qamkunapis Jesucristo kanqannö kayanki. Tsaynö kanqa Tayta Diosnintsik y Señornintsik Jesucristupis kuyayäshurniki yanapayäshuptikimi.