3 Tayta Diosmi imaypis yanapaykäyäshunki payman yärakuyänaykipä y ima jutsamanpis Satanás mana ishkitsiyäshunaykipä. 4 Tayta Dios tsaynö yanapayäshuptikimi musyayä yachatsiyanqäta imaypis cäsukuyänaykipä kanqanta.

5 Tayta Dios yanapaykuyälläshuy pay kuyakuq kanqannö qamkunapis kuyakuq kayänaykipä. Tsaynölla yanapaykuyälläshuy imanö ñakarpis Jesucristunö pacienciakur kawayänaykipä.

6 Wawqikuna panikuna, Señornintsik Jesucristupa jutinchömi qamkunata nï: Yachatsiyanqäta mana cäsukuq qela wawqikunapita y panikunapita witikuyay. 7 Musyayankimi noqakunata rikayämanqaykinö qamkunapis kawayänaykipä kanqanta. Qamkuna kaqcho kar manami imaypis jitaräkuyashqätsu. 8 Debaldillaqa manami mikuyashqätsu, tsaypa trokinqa mana yarpachakuyänaykipämi paqaspa junaqpa aruyashqä.^† 9 Apóstol kar yanapayämänaykipä mañakuyänä kaptinpis manami mañakuyarqätsu, tsaypa trokinqa aruyarqä qamkunapis rikayämar arukuyänaykipämi.

10 Qamkuna kaqcho kaykar maynami yachatsiyarqä pipis aruyta mana munaptinqa pachanta mana qarayänaykipä. 11 Tsaynö yachaykätsiyaptïpis ¿imanirtä wakin wawqikuna panikuna aruyänanpa trokin runa imanö kawanqanta rikapar puriykäyan? 12 Señornintsik Jesucristupa jutinchömi tsaynö kawaq wawqikunata y panikunata nï: Wayin wayin puriyänaykipa trokinqa mikuyänaykipä aruyay.

13 Wawqikuna panikuna, mana ajayaypa alli kaqkunata imaypis rurayay.^† 14 Kay cartacho qellqamunqäta mayqanpis mana cäsukuptinqa paywan ama qorikäyaynatsu. Tsaynöpaqa penqakurnin capazchi tantiyakuyanmanpis. 15 Itsanqa ama chikiyaytsu, tsaypa trokinqa wawqikitanö y panikitanö shumaq tantiyatsiyay.

16 Ima päsayäshuptikipis alli kawayta qaramaqnintsik Tayta Dios yanapaykuyäshuy alli kawayänaykipä. Tayta Dios qamkunawan kaykullätsun. 17 Kay cartacho ninqänölla juk qellqashqa kaptinpis ushanantaqa noqa Pablumi qellqamushqä. Llapan cartakunqäkunachöpis ushanantaqa kikïmi qellqä. 18 Señornintsik Jesucristo kuyapäyäshurniki imaypis yanapaykuyälläshuy. [Amén.]