Llutan yachatsikuqkunata mana chaskipäyänanpä ninqan
5
Jesucristo libramashqami Moisés qellqanqan leykunapa munaynincho kanqantsikpita librina kantsik.† Tsaynö kaykaptinqa tsay leykunata cumpliyänaykipä obligayäshuptiki ama cäsupäyaytsu. 2 Noqami nï: Señalakuyaptikirä Tayta Dios salvayäshunqaykita yarpäyaptikiqa Jesucristuman yärakuyanqaykipis manakaqllapämi kanqa. 3 Yapaymi nï: Pipis señalakuq kaqqa Moisés qellqanqan leykunata llapantarämi cumplinman. 4 Tsay leykunata cäsukur pipis salvakuyta munarqa Jesucristupitapis y Tayta Diospa kuyakuyninpitapis witikuyashqami.5 Noqantsikmi itsanqa Espíritu Santu tantiyatsimaptintsik musyantsik Jesucristuman yärakurnin salvakunantsikpä kanqanta. 6 Jesucristuman yärakushqaqa manami señalashqa kanqantsiktsu ni señalanni kanqantsiktsu välin, sinöqa payman yärakur kuyanakur kawanqantsikmi.
7 Qamkunaqa Jesucristuman yärakur allimi kayarqayki. ¿Pitä niyäshushqayki rasunpaypa kaq willakuyta mana cäsukuyänaykipä? 8 Paykuna yachatsiyanqanqa manami qayamaqnintsik Tayta Diospitatsu. 9 Tsay llutan yachatsikuyqa wallka levadüra mäsata jakatsinqannömi kaykan.† 10 Llutan yachatsikuqkunata mana chaskipäyänaykipämi Tayta Diosta mañakuykä. Tsay runakunataqa pï kayaptinpis Tayta Diosmi juzganqa.
11 Wawqikuna panikuna, señalakuyänanpä yachatsiptïqa manami pipis qatikachaykämanmantsu ni Jesucristo noqantsik raykuq cruzcho wanunqanta willakunqäpita chikiykämanmantsu. 12 “Señalakurrämi salvakuyanki” nir yachatsiyäshuqnikikunaqa penqayninta kuchupita roquskiyätsun.
Espíritu Santupa munaynincho kawanantsikpä yachatsinqan
13 Wawqikuna panikuna, librina kayänaykipämi Tayta Dios qayayäshushqayki. Librina karpis jutsata ama rurayaytsu, tsaypa trokinqa jukniki juknikipis kuyanakur yanapanakuyay.† 14 Diospa leyninchömi nikan: “Kikiki kuyakunqaykinö runa mayikita kuyanki”. Tsay ninqanta cumplirqa llapan leyninkunatami cumpliykäyanki.† 15 Tsaynö kaykaptinqa paqtä chikinakuyankiman. Chikinakurqa qallayätsinakurmi qarqunakuyanki.
16 Tsaymi nï: Espíritu Santu tantiyatsiyäshunqaykinölla kawayay. Tsaynö kawarqa manami shonquykikuna munanqannö jutsata rurayankitsu.a 17 Llutan yarpaykunaqa Espíritu Santupa contranmi y Espíritu Santunami llutan ruraykunapa contran. Tsaymi ishkan contranakuyaptin allita rurayta munarpis kamäpakuyankitsu.† 18 Espíritu Santu tantiyatsiyäshunqaykita cäsukurqa manami leykunapa munayninchönatsu kaykäyanki.†
19 Llutan yarpaykunata ruraqkunaqa [majankuna kaykaptinmi jukwan jukwan purikuyan,] fornicación jutsata rurayan, melanaypä kaqkunata rurayan, achachäpakushqa kar penqakuypä jutsata rurayan, 20 ïdulukunata adorayan, runa mayinta brujyatsiyan, runa mayinta chikiyan, rimanakuyan, cëlanakuyan, imallapitapis ajanäyan, contranakuyan, qarqunakuyan, qallayätsinakuyan, 21 envidiösu kayan, [runa mayinta wanutsiyan,] upyallacho kakuyan, machaskir llutankunata rurayan y tsaynöllami mastapis rurayan. Ñöpata ninqänöllami kananpis nï: Tsaynö kawaqkunaqa Tayta Diospa mandakuyninman manami chäyanqatsu.
22 Espíritu Santupa munaynincho kawarmi itsanqa kuyanakuntsik, kushikuntsik, alli kawantsik, pacienciakuntsik, alli shonqu kantsik, yanapakuq kantsik, awninqantsikta cumplintsik, 23 qollmi shonqu kantsik y allita ruranantsikpä tantiyakuntsik. Tsaynö kawarqa manami ima leytapis manakaqman churantsiktsu.
24 Jesucristupana karmi unay kawaynintsikta cruzcho wanutsishqantsik.† Tsaymi jutsa ruraykuna yarpaynintsikman shamuptinpis cäsupantsiknatsu. 25 Espíritu Santupa munaynincho kaykarqa pay tantiyatsimanqantsiknö kawashun. 26 Tsaynö kawaykarqa pitapis ajanätsir ama runa tukushuntsu ni envidiösu kashuntsu.