Runa mayintsikwan yanapanakunantsikpä ninqan
6
Espíritu Santu munanqannö kawaq wawqikuna panikuna, yärakuq mayiki jutsata ruranqanta musyarqa manakaqman mana churayllapa tantiyatsiyanki. Paqtä kikikikunapis jutsata rurayankiman. 2 Jukniki juknikipis shakyätsinakur yanapanakuyay. Tsaynöpami Jesucristo yachatsimanqantsik mandamientunta cumpliykäyanki.†3 Imatapis mana musyaykar runa tukurqa kikillaykikunami engañakuykäyanki. 4 Runa tukuyänaykipa trokinqa kikikikuna imanö kawayanqaykitapis tantiyakuyay. Tsaynöpami alli tukur kushikuyänaykipa trokinqa Tayta Dios munanqannö kawayanqaykipita kushikuyanki. 5 Llapantsiktami imanö kawanqantsikpitapis Tayta Dios cuentata mañamäshun.
6 Jesucristupa willakuyninta yachakuqkunaqa yachatsiqninta imallawanpis yanapayätsun.
7 Shumaq tantiyakushun. Tayta Diosta manami engañayta kamäpakuntsiktsu. Imatapis murunqantsiktaqa tsaytami cosechantsik. 8 Tsaynöllami jutsata rurarqa wanur ushakäshun. Espíritu Santu munanqannö kawarmi itsanqa mana ushakaq kawayta tarishun. 9 Tsaynö kaykaptinqa mana ajayaypa alli kaqkunallata rurashun.† Tsaynö kawashqami premiuta imay karpis Tayta Dios qaramäshun. 10 Tsaynö kananpä kaykaptinqa imantsikpis kanqanman tupu pïmaytapis yanapashun. Jesucristuman yärakuq mayintsiktanäqa masrä yanapashun.
Cartapa ushanan
11 Kay cartapa ushanantaqa kikïmi jatusaq letrakunawan qellqamü. 12 Señalakuyänaykipä yachatsiyäshuqnikikunaqa Israel mayinkuna alli rikayänanta munallarmi yachaykätsiyäshunki. Qatikachäyänanta mantsarirmi Jesucristo cruzcho wanunqanpita salvakunqantsiktaqa yachatsiyantsu. 13 Paykunaqa señalakurpis Moisés qellqanqan leykunata manami cumpliyantsu. Tsaynö karpis leyta cumplitsiyanqanpita alabakuyänallanpämi señalakushqa kayänaykita munayan.
14 Noqaqa manami imapitapis alabakütsu. Alabakunäpa trokinqa Señornintsik Jesucristo noqantsik raykuq cruzcho wanunqanpitami kushikü. Cruzcho wanushqa kaptinmi kay mundua noqapä crucificashqanö kaykan y noqapis kay mundupä crucificashqanö kaykä. 15 Tsaymi [Jesucristucho kashqaqa] manami señalashqa kanqantsiktsu ni señalanni kanqantsiktsu välin. Mushuq kamanqan runa kanqantsikmi itsanqa rasunpaypa välin.† 16 Tsayta tantiyakuqkunataqa Tayta Dios kuyapar alli rikaykullätsun. Paykunaqa Tayta Dios kuyanqan Israel runakunami kayan.b
17 [Señor] Jesucristupa alli willakuyninta willakunqäpita maqayämanqanpis sirallanami cuerpü kaykan. Tsaynö kaykaptinqa yachatsinqäta manami pipis manakaqman churanmantsu.
18 Wawqikuna panikuna, Señornintsik Jesucristo kuyapäyäshurniki imaypis yanapaykuyälläshuy. Amén.