3
Llapanta mandaq Tayta Diosmi nin: “Nänita pitsaqnö runakuna kamarikuyänanpämi willakuqnïta puntäta kachashä.† Tsaymi shuyaykäyanqayki mandaq chämur templuman illaqpita yaykunqa. Paymi qamkunawan pactu ruranqäta willakunqa. Rikayta munayanqayki willakuqqa chämunqanami.2 “Payqa jutsata rurayanqaykipita purificashunaykipä lunyaykaq ninanö y taqshakuna jabonnömi kanqa.† Tsaynö kaykaptinqa chämuptin ¿pirä awantanman? Tsaynöpis paypa ñöpancho ¿pirä ichiraykanman?† 3 Payqa qorita y yuraq qellayta ninawan tsullutsir qanranta jipiqnömi levitakunata purificanqa. Noqa munanqänöna sacrificiukunata altarcho rupatsiyaptinmi 4 Judá y Jerusalén runakuna sacrificiuta apayämunqanta kushishqa chaskishä. Unay castankuna sacrificiukunata apayämuptin chaskinqänömi paykunapis apayämuptin kushishqa chaskishä”.
5 Llapanta mandaq Tayta Diosmi nin: “Kikïmi qamkunata juzgayäshayki brujyayaptiki, majayuq kaykar jukwan kakuyaptiki, jutïcho awnirkur mana cumpliyaptiki, arurkatsir mana pägayaptiki, viüdatawan waktsata ñakatsiyaptiki, jäpa runata mana alli rikayaptiki y mana mantsapakayämaptiki”.
Diezmuta y ofrendata apayänanpä ninqan
6 “Noqa Tayta Diosmi imaypis awninqäta cumplï.† Tsaymi unay castayki Jacobta awninqäta† cumplir qamkunata ushakätsirqätsu. 7 Tsaynö kaykaptinpis qamkunaqa unay castaykikuna kawayanqanpita patsami leynïkunata cumpliykäyankitsu. Tsaymi llapanta mandaq Tayta Dios kar nï: ¡Noqaman kutiyämuy! Noqaman kutiyämuptikiqa yapaymi yanapayäshayki.†
“Tsaynö niptïmi qamkuna niyanki: ‘¿Imatatä cäsukuyashqätsu?’
8 “Qamkunaqa suwapaykäyämankimi”.
“Tsaynö niptïmi qamkuna nikäyämanki: ‘¿Imatatä qamta suwapäyarqä?’
“Qamkunaqa suwapäyämarqayki diezmutawan ofrendata mana apamurmi. 9 Qamkunaqa llapan nacionnikikunawan suwapäyämanqaykipitami maldicionashqa kaykäyanki.
10 “Llapan diezmukunata wayïcho kaykaq almacenman apayämuy. Tsaymi wayïcho atska mikuy kanqa. Tsaynöllami ciëlu punkuta kichar qamkunaman bendicionnïta ujuqpä churamushä. Rasunpaypa churamunäpä kanqäta musyayänaykipä mä diezmuta apayämuy.† Noqa llapanta mandaq Tayta Diosmi tsaynö nï. 11 Mikuy ushaq kurukunata ushakätsiptïmi chakraykikunacho mikuynikikunapis y üvaykikunapis alli wayunqa. Noqa llapanta mandaq Tayta Diosmi tsaynö nï. 12 Markaykikuna täkuy munay kaptinmi llapan nación runakunapis munapäyanqa. Noqa llapanta mandaq Tayta Diosmi tsaynö nï”.
Cäsukuqkunata kuyapänanpä ninqan
13 Mastami Tayta Dios nin: “Qamkunaqa conträmi parlayashqayki.
“Tsaynö niptïmi niyämanki: ‘¿Imatatä contrayki parlayashqä?’
14 “Qamkunaqa conträ parlarmi niyashqayki: ‘Manakaqllapämi Diosta sirvintsik. ¿Imallapätä leyninkunatapis cäsukuntsik? Jutsata ruranqantsikpita llakikushqapis llapanta mandaq Tayta Dios manami cäsumantsiktsu. 15 Orgullösu runakunaqa kushishqami kawayan. Jutsa ruraqkunapis imaykayuqmi kayan. Tayta Diosta mana cäsukuptinpis paykunapäqa ima castïgupis manami kantsu’ ”.†
16 Tsaymi Tayta Diospita mantsapakuqkunaqa willanakur shakyätsinakuyarqan payta imaypis cäsukuyänanpä. Tsaynö willanakuyanqanta wiyarmi Tayta Diosqa rölluman jutinkunata ñöpancho qellqatsirqan imaypis yarparänanpä.
17 Llapanta mandaq Tayta Diosmi nin: “Juzganä junaqmi tsay runakunata kuyapäshä. Cäsukuq tsurinta taytan kuyapanqannömi noqapis paykunata kuyapäshä.† 18 Tsaymi runakuna yapay tantiyayanqa cäsukamaqkunata kuyanqäta y mana cäsukamaqkunata castiganqäta, sirvimaqkunata alli rikanqäta y mana sirvimaqkunata mana alli rikanqätapis”.