3 “Tsaymi qamkunapita aywaraqkunata wallkayätsir ushakätsishä. Noqapä apayämunqayki uywakunapa panzantami qaqllaykiman jichamushä. Nirkurmi tsay uywakunapa panzantawan jitariyäshayki. 4 Tsaynöpami tantiyayanki ninqäta cäsukayämänaykipä kanqanta. Cäsukayämaptikiqa unay castayki Leví trïbu runakunawan^† pactuta ruranqänömi imaypis kanqa. Noqa llapanta mandaq Tayta Diosmi tsaynö nï.

5 “Leví trïbu runakunawan^a pactuta rurarmi^† awnirqä yanapaptï alli kawayänanpä. Paykunanami awniyämarqan imaypis mantsapakayämänanpä. Tsaymi awninqänölla yanaparqä y paykunapis mantsapakamar respitayämarqan. 6 Leynïkuna ninqantanöllami yachatsiyarqan. Manami manakaqkunata parlayarqantsu. Munanqänö alli kawarmi atskaqta tantiyatsiyarqan jutsa rurayta kachariyänanpä.^†

7 “Sacerdöti karmi qamkunapis willakuynïta yachatsiyänaykipä kaykäyanki.^† Llapanta mandaq Tayta Diospa willakuqnin kayaptikimi runakuna qamkunaman shayämun yachakuyta munar. 8 Tsaynö kaykaptinpis qamkunaqa mana allikunata rurar llutanta yachatsiyaptikimi atskaq jutsata rurayashqa. Tsaynö karmi Leví trïbuwan pactu ruranqätapis manakaqman churaykäyanki. Noqa llapanta mandaq Tayta Diosmi tsaynö nï. 9 Leynïkunata mana cäsukurmi wakin runakunata alli rikarpis wakintaqa mana alli rikaykäyanki. Tsaynö kayanqaykipitami runakuna mana respitayäshunaykipä y manakaqman churayäshunaykipä qamkunata kacharishqä”.

10 ¿Manaku Tayta Diosqa llapantsikpapis Taytantsik kaykan?^† ¿Manaku llapantsiktapis juk Dioslla kamamashqantsik? Tsaynö kaykarqa ¿imanirtä juknintsik juknintsikpis llullapänakur unay castantsikkunawan Tayta Dios pactu ruranqanta manakaqman churaykantsik?

11 Tayta Dios ninqanta cumpliyänanpä awnirpis Judá runakunaqa manami cumpliyantsu. Tsaymi Jerusaléncho y entëru Israelcho ïduluta adoraq warmikunawan penqakuypä taykäyan. Tsaynö rurarmi Tayta Dios kuyanqan templunta manakaqman churaykäyan. 12 Ïduluta adoraq warmiwan majatsakaq runataqa mana kuyapaypami Israel runakunapita Tayta Dios qarqunqa. Tsaynö qarqunqa pï kaptinpis y llapanta mandaq Tayta Diospä ofrendata apamuptinpis.

13 Tayta Diospa altarninman uywakunata y tsaki mikuykunata apayaptikipis manami chaskiyäshunkitsu. Tsaymi altarnin ñöpancho pasaypa waqar 14 nikäyanki: “¿Imanirtä chaskimantsu?” nir.

Payqa chaskiyäshunkitsu chölu kaykar majatsakäyanqayki warmikita jaqirishqa kaptikimi. Tsaynö jaqiriyarqayki payllawan majatsakäyänaykipä Tayta Diospa ñöpancho pactuta rurashqa kaykarmi.

15 ¿Manaku jukllayllanö kayänanpä ishkantapis Tayta Dios kamarqan? Cuerpunpis y espïritunpis paypami. ¿Manaku tantiyayanki imanir jukllayllanö kayänanpä kamanqanta? Tsaynö kamarqan tsay runapa tsurinkuna Tayta Dios munanqannö kawayänanta munarmi. Tsaynö kaykaptinqa shumaq tantiyakuyay chölu kaykar majatsakäyanqayki warmikiwan mana rakikäyänaykipä.

16 Israel runakuna adorayanqan Tayta Diosmi nin: “Noqami pasaypa ajanä majanpita rakikäyaptin. Tsaynö rurarqa pasaypa penqakuypämi kaykäyan. Noqa llapanta mandaq Tayta Diosmi tsaynö nï. Tsaynö kaykaptinqa majaykiwan mana rakikaypa täkuyänaykipä shumaq yarpachakuyay”.^†

17 Qamkunaqa llutanta parlarmi Tayta Diosta pasaypa ajanätsiyanki. Tsaynö kaykarmi tapukuyanki: “¿Imanötä Diosta ajanätsiyashqä?” nir.

Payta ajanätsiyanki kaynö parlarmi: “Imanö kawashqapis Tayta Dios manami juzgamäshuntsu. Tayta Diospäqa allimi kaykan jutsata rurar kawashqapis. Imanö kawashqapis payqa kushikunmi”.^†