2 Tayta Diosmi nin: “Noqaqa qamkunata imaypis kuyämi.

“Tsaynö kaptinpis qamkunami nikäyämanki: ‘¿Imanöpatä musyayäman kuyayämanqaykita?’

“Tsaymi tantiyatsï: ‘¿Manaku Jacobwan Esaúqa tsay wawqilla kayarqan? Tsaynö kaykaptinpis unay castayki Jacobtami kuyarqä 3 y Esaútanami chikirqä.^† Tsaymi Esaú castakuna täyanqan partikunatapis tsaki jirkaman tikraratsishqä. Tsaychöqa chacalkunallanami taykäyan’ ”.^{a †}

4 Tsaymi edomita^b runakuna niyanqa: “Markantsikkunata ushakätsiptinpis yapaymi kay nacionta shäritsishun”.

Tsaynö niyaptinpis llapanta mandaq Tayta Diosmi nin: “Markankunata yapay shäritsiyaptinpis yapaymi ushakätsishä. Tsaymi nacionninta jutitsiyanqa Jutsasapa Runakuna Täyanqan Nación jutin kananpä. Tsaynöpis niyanqa paykunawan imaypis ajanashqa kaykanqätami. 5 Tsaynö ushakätsinqäta rikarmi niyanki: ‘Tayta Dios alabashqa kaykullätsun. Munayyuq kanqanqa maytsay nacionkunachömi musyakanqa’ ”.

6 Sacerdötikunapämi llapanta mandaq Tayta Dios nin: “Tsurinkuna taytanta respitayanmi. Wätay runakunapis patronninta cäsukuyanmi. Noqami taytaykikuna y patronnikikuna kaykä. Taytaykikuna kaykaptïqa ¿imanirtä respitayämankitsu? Patronnikikuna kaykaptïqa ¿imanirtä mantsapakayämankitsu? Qamkunaqa manakaqmanmi churaykäyämanki.

“Tsaynöllami nikäyämanki: ‘¿Imachötä qamta manakaqman churayashqä?’

7 “Manakaqman churaykäyämanki mana alli uywakunata^† sacrificiukunapä altarnïman apamurmi.

“Tsaynö nir tantiyatsiptïpis yapaymi nikäyämanki: ‘¿Imachötä qamta manakaqman churayashqä?’ nir.

“Qamkunaqa manakaqman churaykäyämanki mana allinnin uywakunata sacrificiupä altarnïman apamurmi. 8 Qapra uywakunata sacrificiupä apayämunqayki ¿alli kanqantaku yarpäyanki? Tsaynöpis weqruta o qeshyaykaqta apamur ¿allitatsurä ruraykäyanki?^† Tsaykunata mä gobernadornikikunata qarayänaykipä apapäyay. Paypis manami kushishqatsu chaskiyäshunki. Noqa llapanta mandaq Tayta Diosmi tsaynö nï.

9 “Tsaynö manakaqman churaykäyämarpis rugakayämankirämi yanapanäpä kanqanta yarpar. Mana alli uywakunata sacrificiupä apayämuptiki ¿kushishqatsurä chaskïman? Noqa llapanta mandaq Tayta Diosmi tsaynö nï.

10 “¡Ima allirä kanman pipis mana yaykunanpä templupa punkunta wichqayaptin! Tsaynöpaqa manami pipis altarnïman mana alli uywakunata apayämunmantsu. Tsaynö apayämunqayki manami gustamantsu. Apayämuptikipis manami chaskiyäshaykitsu.^†

11 “Rupay yarqamunanläpita hasta rupay jeqananläyaqmi atska nacionkunacho jutïta joqarir shumaq sirviyäman. Maytsaychömi inciensiuwan qoshnitsiyan y tsaki mikuyta altarkunaman apayan. Tsaynö rurarmi maytsaychöpis respitayäman. Noqa llapanta mandaq Tayta Diosmi tsaynö nï.

12 “Qamkunaqa altarnïta mana respitarmi kikïtapis respitaykäyämankitsu. Mana munanqäta altarnïman apamurmi manakaqman churaykäyämanki. 13 Tsaynöpis nikäyanki sirviyämanqayki alläpa aja kanqantami. Sirvimarpis janan shonqullami sirviyämanki. Altarnïmanqa sacrificiupä apaykäyämunki suwakuy uywata, weqru uywata, qeshyaykaq uywata. Tsay uywakunata ¿chaskinäpä kanqantaku yarpaykäyanki?

14 “Noqaqa llapanpä munayyuq reymi kaykä. Maytsay nacionkunachömi noqapita mantsapakuyan. Qamkunaqa orqu uywakunapita sänu kaqta apayämunaykipä awnirkurpis däñashqa kaqtami altarnïman apamur maldicionashqa kayanki. Noqa llapanta mandaq Tayta Diosmi tsaynö nï”.