2
Penqakuyta mana yachaq Judá runakuna, jutsa rurayta kachariyänaykipä llapaykikuna qorikaykur yarpachakuyay.2 Tayta Dios ajananqan junaq manarä chämunqanyaq jutsa rurayta kachariyay.
Mana kachariyaptikiqa päjata wayra apar ushakätsinqannömi ushakätsiyäshunki.†
3 Kay patsacho qollmi shonqu runakuna, Tayta Diosta llapaykikuna ashiyay.
Mandamientunkunata cäsukuqkuna, mana yachaq tukuyllapa pay munanqannö kawayay.
Tsaynö kawayaptikiqa capazchi Tayta Dios ajananqan junaq salvayäshunkimanpis.†
Filisteo runakunata castigananpä ninqan
4 Gaza markapis tsunyaqmi rikakunqa.
Ascalón markapis pasaypami ushakanqa.
Asdod markacho taqkunapis junaqpami suwapäyanqa.
Ecrón markacho taqkunatapis jawapita jachata llukiriqnömi jitariyanqa.
5 ¡Allaw! ¡Lamar kuchuncho taq filisteo runakuna, qamkunapis llakipaypämi kayanki!
Castigayäshunaykipämi Tayta Dios nin:
“¡Canaáncho taq filisteo runakuna, tsunyaqpämi ushakätsishayki!†
6 Lamar ñöpancho chakrakunapis uywakuna mitsikuyänan chakrakunamanmi tikranqa.
Tsaychöqa üsha qenchakunallami kanqa”.
7 Kawaykar quëdaq Judá runakunatami itsanqa librina kawayänanpä Tayta Dios yanapanqa.
Paykunapäna tsay chakrakuna kaptinmi uywankunata tsaycho mitsikuyanqa.
Ascalóncho kaykaq wayikunachömi punuyanqapis.
Moabita y amonita runakunata castigananpä ninqan
8 Tayta Diosmi nin:
“Noqa wiyashqämi Moab nación runakuna† y Amón nación runakuna† kuyanqä runakunata ashlliyanqanta.
Tsaynöpis wiyashqämi kuyanqä runakunata manakaqman churayanqanta.
Paykunaqa Judá runakunapa chakrankunata qechurmi imaykayuq tikrayashqa”.
9 Tsaymi Israel runakunata kuyaq y llapanta mandaq Tayta Dios jurar nin:
“Sodoma markanömi Moab nacionpis ushakanqa.
Gomorra markanömi Amón nacionpis ushakanqa.†
Chakrankunachöpis kashallami kanqa.
Wakin chakrankunapis qachpayanqami.
Tsunyaq jirkanömi imayyaqpis kanqa.
Kawaykar quëdaq kuyanqä runakunami paykunapa imaykankunatapis apakuyanqa.
Allinnin kaq chakrankunatapis qechurmi tsaycho täyanqa.
Ninqäqa rasunpaypami kanqa”.
10 Paykunata tsaynö päsanqa pasaypa runa tukuyanqanpitami.
Paykunami llapanta mandaq Tayta Dios kuyanqan runakunata manakaqman churayashqa.
11 Kay patsacho adorayanqan llapan dioskunata Tayta Dios ushakätsirmi Moab nación runakunata y Amón nación runakunata pasaypa castiganqa.
Tsaymi karu islakunacho taqkunapis Tayta Diostana markankunacho adorayanqa.
Etiopía runakunata castigananpä ninqan
12 “Etiopía runakuna,† qamkunatapis espädäwanmi ushakätsiyäshayki”.
Asiria runakunata castigananpä ninqan
13 Tsaynöllami Tayta Diosqa norti kaqläman aywar Asiria nacionta ushakätsinqa.†
Nínive markacho taq runakunata ushakätsiptinmi pasaypa jäkuq rikakunqa.
14 Tsay partiqa uywata mitsikuyänallanpänami kanqa.
Imayka niraq munti uywakunami tsaycho kayanqa.
Tukuwan killikshallanami vïgakunachöpis punuyanqa.
Tsaykuna waqanqanpis ventänapami wiyakämunqa.
Punkukuna ushakaptinmi cedru tablawan entablayanqanpis rikakaykanqallana.
15 Tsay markacho taq runakunaqa ima desgracia päsananpä kanqanta yarpayllapis manami yarpäyantsu.
Tsaymi shonqunkunallacho niyan:
“Noqantsikpita masqa ¿pinatä kanqa?”
Tsaynö nikäyaptinpis markankunata ushakätsiptinmi jirka uywakuna täkuyänanpä kanqa.
Tsayta rikarmi marka ñöpanpa päsaqkuna makitapis taqllarrä kushipäyanqa.