Sofonías
Tayta Dios castiganan junaq imanö kananpä kanqan
1
Kaychömi qellqaraykan Tayta Diospa willakuyninta Sofonías willakunqan. Sofonías willakurqan Amónpa tsurin Josías Judá nacionpa mandaqnin rey kaykanqan witsanmi.† Sofonías Cusipa tsurinmi karqan. Cusi Gedalíaspa tsurinmi karqan. Gedalías Amaríaspa tsurinmi karqan. Amarías Ezequíaspa† tsurinmi karqan.2 Tayta Diosmi nin:
“Kay patsacho kaqkunataqa llapantami ushakätsishä.
3 Runakunatapis uywakunatapis llapantami ushakätsishä.
Pishqukunatapis lamarcho pescädukunatapis llapantami ushakätsishä.
Mana cäsukamaq runakunatapis chipyaqmi ushakätsishä.
Kay patsacho llapan runakunatami ushakätsishä”.
Tayta Diosmi tsaynö nin.
4 “Judá runakunata y Jerusaléncho taqkunatapis castigashämi.
Baalta adoraqkunata y ruratsiyanqan ïdulukunatapis llapantami ushakätsishä.
Baalta sirviq sacerdötikunatapis llapantami ushakätsishä.
5 Wayi jananman witsaykur ciëlucho kaykaq qoyllurkunata qonqurikuykur adoraqkunatapis ushakätsishämi.
Qonqurikuykur adoraykämarpis dios Molocta adoraqkunatapis ushakätsishämi.†
6 Tsaynöllami ushakätsishä mana cäsukamaqkunata, mana ashimaqkunata y mana rugakamaqkunatapis”.
7 Tayta Diospa ñöpancho llapaykikuna upällakuyay.†
Juzganan junaq chaykämunnami.
Tsay junaqpäqa Tayta Diosmi sacrificiuta kamarishqa.
Sacrificiuman qayatsinqan runakunapis listunami kaykäyan.a
8 Tayta Diosmi nin:
“Tsay juzganä junaqmi castigashä nación mandaqkunata, reypa tsurinkunata y jäpa runakunapa costumbrinta qatirar mana adoramaqkunatapis.
9 Tsay junaqmi ïdulu adoraqkunata llapanta castigashä.
Tsay runakunaqa adorayanqan ïdulukunapa templunman churayänanpämi suwakuypa y asaltaypa imaykatapis qoriyan”.
10 Tayta Diosmi nin:
“Tsay junaqqa chikiqninkuna atacayaptin Pescädu jutiyuq punkupita pasaypa qayaräyanqanmi wiyakanqa.
Markapa ñöpan barriucho qayaräyanqanpis wiyakanqami.
Ñöpan jirkankunacho qayaräyanqanpis pasaypa mantsariypämi wiyakanqa.
11 “Mactes barriucho taqkuna, llapayki waqayay.
Tsay junaqmi llapan negociantikuna wanuyanqa.
Rantikuqkunaqa llapanmi ushakäyanqa.
12 Tsay witsanmi chiwchiwan aktsikur Jerusaléncho taqkunata imanö kawaykäyanqantapis rikashä.
Tsaychömi jutsata rurar añaw kaykaq runakunata castigashä.
Tsay runakunaqa shonqullanchömi niyan:
‘Tayta Diosqa manami castigakuntsu.
Payqa manami allitapis ni mana allitapis rurantsu’.
13 Tsaynö nikäyaptinmi chikiqninkuna llapan imaykankunatapis apakuyanqa.
Wayinkunatapis juchutsirmi ushayanqa.
Täyänanpä shäritsiyanqan wayikunachöpis manami täyanqatsu.
Üvakunata plantarpis vïnuta manami upuyanqatsu”.
14 Tayta Dios juzganan junaq chämunanpä wallkallanami pishiykan.
¡Tsay junaqqa chaykämunnami!†
Tsay junaq pasaypa mantsariypä kaptinmi chölu tukuqkunapis qayaräyanqa.
15 Tsay junaqqa Tayta Dios pasaypami ajanqa.
Tsaymi runakuna pasaypa llakikur ima ruraytapis kamäpakuyanqatsu.
Qayaraykarmi ushakäyanqa.
Pasaypa tsakaymi kanqa.
Yanayparä pukutarmi mantsariypä tsakaskinqa.
16 Tsay junaqqa jinchi murallashqa markakunaman y jatusaq törrikunaman amparakuyaptinpis contran runakunami atacayanqa.
Atacaptin mantsarirmi cornëtata tukarnin qayaräyanqa.
17 Tayta Diosmi nin:
“Runakunata castigaptïmi llakikurnin tsakäpakushqanö puriyanqa.
Tsaynö kayanqa mana cäsukamar jutsata rurayanqanpitami.
Yawarninkunapis patsachömi pichuranqa.
Ayankunapis imayka uywapa iskannörämi mashtaräyanqa”.
18 Tayta Dios juzganan junaqqa manami qellayninkunapis ni qorinkunapis runakunata salvanqatsu.
Paymi pasaypa ajanarnin kay nacionta chipyaq ushakätsinqa.
Illaqpitami kay nacioncho taqkunata llapanta ushakätsinqa.