Jerusalén runakunata castigananpä ninqan
3
¡Allaw mana wiyakuq Jerusalén runakuna!Qamkunaqa pasaypa jutsasapami kayanki.
Pïmaytapis pasaypami ñakaykätsiyanki.
2 Qamkunaqa pï willayäshuptikipis manami wiyakuyankitsu.
Corrigiyäshuptikipis manami cäsukuyankitsu.
Tayta Diosmanpis manami yärakuyankitsu.
Paytaqa mañakuyllapis manami mañakuyankitsu.
3 Mallaqaypita qayaraykaq leonkunanömi autoridänikikunapis kayan.
Jueznikikunapis imayka mallaqashqa atuqkuna tullullantapis mana katuqnömi kayan.
4 Profëtaykikunapis mana respitakuq y engañakuqmi kayan.
Sacerdötikikunapis sagrädu templutami impüruyätsiyan.a
Tayta Diospa leyninkunatapis manami cumpliyantsu.
5 Tsaynö kayaptinpis Tayta Diosqa imaypis Jerusalénchömi kaykan.
Payqa manami imallatapis llutantaqa rurantsu.
Cada tutami tantiyatsimantsik allillata ruraq kanqanta.
Tsaynö kaptinpis jutsa ruraq runakunaqa llutanta rurarmi penqakuyantsu.
6 Tayta Diosmi nin:
“Atska nacionkunatami ushakätsishqä.
Törrinkunatapis juchutsirmi ushakätsishqä.
Pipis manana puriptinmi cällinkunapis tsunyaraykan.
Markankunapis llapanmi ushakashqa.
Tsaychöqa manami pipis tannatsu.
7 Tsaymi kaynö yarparqä:
‘Tsay nacionkunata ushakätsinqäta rikarmi Jerusaléncho taq runakuna mantsapakamar llutan ruraykunata kachariyanqa.
Cäsukayämaptinqa paykunata manami ushakätsishätsu’.
Tsaynö yarpaykaptïpis paykunaqa jutsa rurayman churakashqami kayan”.
8 Tsaymi Tayta Dios nin:
“¡Allaw tsay runakuna!
Juzganä junaq imay karpis chämunqami.
Llapan nacionkunata qoriykurmi pasaypa ajanätsiyämanqanpita castigashä.
Imaykatapis lunyaypa lunyar nina ushaqnömi kay patsacho taqkunata llapanta ushakätsishä”.
Runakunata salvananpä Tayta Dios awninqan
9 “Tsaypitanami maytsaycho taq runakunata tantiyatsishä jutïta joqarir alabayämänanpä.
Tsaynöpami shumaq willanakur juk shonqulla sirviyämanqa.
10 Mas karucho taq runakunapis yanapanäpämi mañakayämanqa.
Tsay runakunaqa Etiopía nacioncho kaykaq mayukunapita mas karuchömi taykäyan.
Tsaypita patsami ofrendankunata noqapä apayämunqa.
11 Tsay witsanmi jutsata rurar kushikuqkunata qamkunapita qarqushä.
Sagrädu lömächo manami allish tukuyanqanatsu.
Jutsata kacharishqa karmi penqakushqa umpuräkuyanqanatsu.
12 “Qamkuna täyanqaykichöqa llampu shonqu y muchuq runakunallami täyanqa.
Paykunaqa noqallamannami yärakayämanqa.
13 Israelcho kawaykar quëdaq runakunaqa mananami llutanta rurayanqanatsu.
Paykunaqa mananami llullakuyanqanatsu ni pitapis engañayanqanatsu.†
Añaw mikukuq üshakunanömi kayanqa.
Paykunata manami pipis mantsaritsinqanatsu”.†
14 ¡Sión runakuna, cantayay!
¡Israel runakuna, kushikuypita cantayay!
¡Jerusalén runakuna, llapan shonquykikunawan kushikuyay!
15 Tayta Dios mananami castigayäshunkinatsu.
Chikishuqnikikunatapis qarqunqami.
Tayta Diosmi mandashuqniki rey kaykan.†
Qamkunawan kaykaptinqa manami imapitapis mantsariyankinatsu.
16 Tsay witsanmi Jerusalén runakunata niyanqa:
“Sión runakuna, mantsariyänaykipa trokinqa ¡kallpata tsariyay!”
17 Qamkunawanmi Tayta Dios kaykan.
Munayyuq karmi salvayäshunki.
Kuyayäshurnikimi mushuq kawayta qarayäshunki.
Tayta Diosmi nin:
“Manana ñakayänaykipämi yanapayäshayki.
Manami penqakuypänatsu kayanki.
19 Tsay witsanqa ñakatsishuqnikikunata kikïmi ushakätsishä.
Nirkurmi oqrakashqa üshata qoriqnö maytsaypitapis qoriyämushayki.
Pakikushqa üshata jampiqnömi jampiyäshayki.†
Manami pipis manakaqman churayäshunkinatsu.
Tsaypa trokinqa yanapayäshayki maytsaychöpis respitashqa y alabashqa kayänaykipämi.
20 Tsay witsanmi maytsaypitapis qoriyämushayki.
Jäpa nacionkunaman apayäshuqnikikunapa rikay ñawin kutitsimuptïmi pïmaypis kushikur respitayäshunki.†
Noqa Tayta Diosmi tsaynö nï”.