Nahúm
1
Kay libruchömi qellqaraykan profëta Nahúmta Tayta Dios revelanqan. Nahúmqa Elcos markapitami karqan. Paytami Tayta Dios revelacioncho rikatsirqan Nínive markata ushakätsinanpä kanqanta.†Nínivita Tayta Dios castigananpä ninqan
2 Tayta Diosqa runakuna payllata sirviyänantami munan.
Contran kaqkunataqa mana kuyapaypami pitapis castigan.†
Pipis mana wiyakuptinqa pasaypami ajanan.
3 Tayta Diosqa pacienciakuq y munayyuqmi kaykan.
Pacienciakuq karpis jutsa ruraqkunataqa castiganmi.
Tayta Diosqa shukukuy wayra y mangäda tamya jananpami aywan.
Pukutaypis chakincho polvu shäriqnöllami kaykan.
4 Ollqutupaptinmi lamarpis y mayukunapis tsakiskin.
Basán particho y Carmelo jirkacho kaqkunapis tsakiyanmi.
Líbanucho kaykaq waytakunapis tsakinmi.
5 Pay shamuptinqa jirkankunapis kuyuyanmi.
Jirkakunapis tsullurmi ushakäyan.†
Kay patsapis y kay patsacho kaqkunapis llapanmi mantsakar tsuktsukyäyan.
6 Pay rabyanaptin ¿pirä mantsarinmantsu?
Pay ajanaptin ¿pirä michanman?
Pay rabyakurqa ninanörämi imaykatapis ushan.
Pay puriptinqa qaqakunapis pakikäkuyanmi.
7 Tayta Diosqa allillata ruraqmi.
Payqa llakikuycho kaqkunatapis yanapanmi.
Payman yärakuqkunatapis rikanmi.
8 Paypa contran kaqkunatami itsanqa juchu apaqnörä ushakätsin.
Maytsaypa aywayaptinpis wanuyllami qatiraykan.
9 ¿Imanirtä Tayta Diospa contran shäriyänaykipä willanakuykäyanki?
Payqa llapaykitami ushakätsiyäshunki.
Contran shäriqkunataqa chipyaqmi ushakätsinqa.
10 Imayka shatayashqa shirakata y tsaki oqshata nina lunyar ushaqnömi ushakätsinqa.
11 Nínive runakuna,a qamkunapa mandashuqniki reyqa Tayta Diospa contranmi shärishqa.
Tsaymi mana allita yätsiyäshunki.
12 Kuyanqan runakunatami Tayta Dios nin:
“Qamkunata castigashqa karpis kananpitaqa mananami castigayäshaykinatsu.
Asiria nación runakunatami itsanqa munayyuq y atska kayaptinpis llapanta ushakätsishä.
13 Tsay runakunapa munaynincho kayanqaykipitami jipiyäshayki.
Mananami yapayqa paykunapa munaynincho kayankinatsu”.
14 Nínive markapa mandaqnin reytami Tayta Dios nin:
“Jutiki aywaränanpäpis qampita aywaraqkuna manami kayanqanatsu.
Tsaymi diosnikikunapa templuncho kaykaq ïdulukunata qerupita rurashqa kaqtapis, qoripita y yuraq qellaypita fundishqa kaqtapis llapanta ushakätsishä.
Melanaypä mana väliq kaptikimi tsay templuman qamtapis pampashayki”.
15 (2.1) Judá runakuna, alli willakuyta apamuq runa jirkakunapa shamuykaqta rikayay.
Paymi apaykämun alli kawayänaykipä kaq willakuyta.†
Kananpitaqa contrayki runakuna ushakätsiyäshunaykipä mananami shayämunqanatsu.
Paykunaqa llapannami wanur ushakäyashqa.
Tsaynö kaykaptinqa Tayta Diospa fiestankunata† rurar kushikuyay.
Tsay fiestakunacho payta awniyanqaykita cumpliyay.