3 Tsaymi Tayta Dios ninqannö Nínive jatun markaman Jonás aywarqan. Tsay markataqa kimsa junaqrämi puriyta ushayaq.

4 Níniviman chaykurmi juk junaq qoyat willakur Jonás purirqan. Willakurmi nirqan: “¡Chusku chunka (40) junaq manarä kaptinmi kay markata Tayta Dios ushakätsinqa!”

5 Tsaynö willakunqanta wiyarmi Nínive runakuna criyirnin imaykayuqpis muchuqpis qachqa latsapata jatikuskir ayunayarqan.^†

6 Jonás willakunqanta wiyaykurmi Nínivicho mandaq reypis qachqa latsapata jatikuskir uchpaman jamaykur Tayta Diosta mañakurqan. 7 Tsaynöpis Nínive runakuna ayunayänanpä autoridäninkunawan willakatsirmi niyarqan: “Pipis ama mikutsuntsu ni yakutapis ama uputsuntsu. Uywankunatapis ama qarayätsuntsu ni yakutapis ama uputsiyätsuntsu. 8 Tsaypa trokinqa llapan runakunapis qachqa latsapata jatikurkur llapan shonqunkunawan Tayta Diosta mañakuyätsun. Tsaynöpis jutsa rurayta y wanutsinakuyta kacharir allina kawayätsun. 9 Tsaynö rurashqaqa capazchi Tayta Dios kuyapämarnintsik ushakätsimäshuntsu”.

10 Nínive runakuna jutsankunata kachariyaptinmi ushakätsinanpä willakatsirpis Tayta Dios ushakätsirqannatsu.