Jonás ajananqan
4
Nínive runakunata Tayta Dios mana ushakätsiptinmi Jonás pasaypa ajanarqan. 2 Tsaymi Tayta Diosta nirqan: “Ay Tayta Dios, musyämi kuyapäkuq y perdonakuq kanqaykita. Kuyakuq karmi jukllaqa ajanankitsu. ‘Castigashä’ niskirpis jutsankunata kachariyaptinqa manami castigankinatsu.† Markächo kaykarmi maliciarqä Nínive runakunata kuyapänaykipä kanqanta. Tsaymi Tarsisman qeshpir aywakuyta munarqä. 3 Willakarkatsimar mana ushakaykätsirqa juklla qorikamay. Kay patsacho kawanäpa trokinqa juklla wanukushä”.4 Tsaynö mañakuptinmi Tayta Dios nirqan: “Tsaynö ajananqayki ¿allitsurä kaykan?”
5 Tsaypitanami Nínive markapita Jonás aywakurqan rupay yarqamunanläman. Tsaychömi ramädata ruraykur Nínive markata ima päsanqantapis rikananpä llantuman jamakurqan.
6 Jonás llantukunanpämi ramäda jananpa calabäsuta Tayta Dios wiñatsimurqan. Calabäsupa rapran shumaq llantupaptinmi pasaypa Jonás kushikurqan. 7 Tsaynö kaykaptinmi calabäsupa yuranta kutmunanpä waraynin tuta shiwrita Tayta Dios yuritsirqan. Tsaynö kutmuskiptinmi calabäsu tsakirqan. 8 Rupay yarqamuptinmi achay wayrata Jonásman Tayta Dios wayrätsimurqan. Rupaypa achaynin pasaypa umanman chaptinmi unyaskinanpä kanqanta Jonás yarparqan. Tsaymi wanuyta munar nirqan: “¡Kawanäpa trokinqa jina wanuküman!”
9 Tsaymi Tayta Dios nirqan: “Calabäsu tsakinqanpita ajananqayki ¿alliku kaykan?”
Jonásnami nirqan: “Awmi. Pasaypami ajanaykä”.
10 Tsaymi Tayta Dios nirqan: “Tsay calabäsuta manami qamtsu murushqayki ni qamtsu wiñatsimushqayki. Juk paqasmi wiñamushqa y warayninpämi tsakishqa. Tsaynö kaptinpis tsay calabäsupä llakikunki llantupäshunaykipä mana kaptinmi. 11 Nínive markachöqa juk pachak ishkay chunka waranqapita (120,000) masmi runakuna kayan. Paykunaqa manami musyayantsu alli y mana alli ima kanqantapis. Tsaymi tsay calabäsupä llakikunqaykipitapis mas llakikü Nínive markacho runakunapä y uywakunapäpis”.