Qoripita rurashqa monumentuta adorayanqan
3
Tsaypitanami rey Nabucodonosor qoripita juk monumentuta ruratsirqan kimsa chunka (30) metru altuta y kimsa metru anchuta. Nirkurmi tsay monumentuta Babilonia provinciacho kaykaq Dura niyanqan pampaman ichïtsirqan. 2 Tsaypitanami qayatsirqan nacionta mandashiqninkunata, prefectukunata, gobernadorkunata, yätsikuqkunata, tesorërukunata, juezkunata, markacho autoridäkunata y provinciakunacho kaykaq wakin autoridäkunatapis. Paykunatami qayatsirqan monumentuta ichïtsinqanpita kushikur fiestata rurayänanpä. 3 Tsaynö qayatsiptinmi nacionta mandashiqninkuna, prefectukuna, gobernadorkuna, yätsikuqkuna, tesorërukuna, juezkuna, marka autoridäkuna y provinciakunacho kaykaq wakin autoridäkunapis monumentu ichïtsinqan kaqman llapan qorikäyarqan.4 Tsaychömi willakuq runa jinchi qayakur nirqan: “Llapan markakunapita y nacionkunapita shamuqkuna, tukuy niraq idiömata parlaq karpis, shumaq wiyayämay. 5 Imay hörapis cornëta, këna, taksha arpa, guitärra, jatun arpa, zampöña y mas wakin instrumentukuna waqamunqanta wiyar juk yarpaylla llapaykikuna rey Nabucodonosor ichïtsinqan monumentuta adorayänaykipä qonqurikuyay. 6 Mayqaykipis tsay monumentuta qonqurikuykur mana adorayaptikiqa jinan hörami pasaypa wayllashqa jornuman qaykushqa kayanki”.
7 Órden mantsariypä kaptinmi instrumentukunata tukayämunqanta wiyar llapan markakunapita y nacionkunapita shamuq runakuna ima idiömata parlaq karpis qonqurikuykur rey Nabucodonosor ichïtsinqan qori monumentuta adorayarqan.
8 Tsaypitanami juk ishkay Babiloniaa runakuna aywayarqan rey kaqman. Chaykurmi Israel runakunapa contran 9 Nabucodonosorta willar niyarqan: “¡Qamlla imayyaqpis rey kaykullay! 10 Qammi ordenashqayki cornëtata, kënata, taksha arpata, guitärrata, arpata, zampöñata y mas wakin instrumentukunatapis tukamuqta wiyar qoripita ruratsinqayki monumentupa ñöpanman qonqurikuykur llapanpis adorayänanpä. 11 Tsaynöllami ordenashqayki qonqurikuykur monumentuta mana adoraq kaqta wayllashqa jornuman qaykatsinaykipä. 12 Tsaynö ordenaykaptikipis kanmi Babilonia provinciaman mandar yanapayäshunaykipä churanqayki juk ishkay Israel runakuna ninqaykita mana cäsukuq. Tayta rey, qam adoranqayki dioskunata paykunaqa manami adorayantsu. Tsay runakunaqa ruratsinqayki qori monumentuta adorayänanpä ordenaykaptikipis manami adoraykäyantsu. Tsay runakunaqa Sadrac, Mesac y Abed-negumi kaykäyan”.
13 Tsaynö niyaptinmi Nabucodonosorqa pasaypa ajashqa qayatsimurqan Sadracta, Mesacta y Abed-neguta. Tsay chölukuna reypa puntanman chaykuyaptinmi 14 Nabucodonosor nirqan: “¿Rasunpaypaku qamkuna diosnïkunatapis y qoripita ruratsinqä monumentutapis adorayankitsu? 15 Kananqa cornëtata, kënata, taksha arpata, guitärrata, arpata, zampöñata y wakin instrumentukunatapis tukamuqta wiyar juklla qonqurikuykur ruratsinqä monumentuta adorayay. Mana adorayaptikiqa pasaypa wayllashqa jornumanmi qaykatsiyäshayki. Tsaynö ruraptï ¿ima diosrä salvayäshunki?”
16 Niptinmi Sadrac, Mesac y Abed-nego Nabucodonosorta niyarqan: “Tayta rey, tsaypitaqa imatapis ama parlashuntsu. 17 Wayllashqa jornuman qaykayämaptikipis sirviyanqä Tayta Diosnïmi tsay jornupita y makikipitapis salvayämanqa. 18 Mana salvayämaptinpis noqakunaqa manami diosnikikunata sirviyäshätsu ni tsay ruratsinqayki monumentutapis adorayäshätsu”.
Wayllaykaq jornupita Tayta Dios salvanqan
19 Sadrac, Mesac y Abed-nego tsaynö niyaptinmi Nabucodonosor oqiyayparä ajar jornu wayllätsiqkunata ordenarqan qanchis kuti mas wayllätsiyänanpä. 20 Nirkurnami allinnin soldädukunata mandarqan Sadracta, Mesacta y Abed-neguta pankaykur wayllashqa jornuman qaykuyänanpä. 21 Tsaynö ruraskirmi tsay jornuman cäpantinta, llanqintinta, uma wankukunantinta y llapan jatiranqan latsapantinta qaykuyarqan. 22 Ras qaykuyänanpä rey ordenaptinmi pasaypa wayllashqa jornu kar qaykuq soldädukunata rupaskirqan. Tsaymi Sadracta, Mesacta y Abed-neguta qaykuq soldädukuna jinan höra wanuyarqan. 23 Qaykuyaptinmi tsay chölukunaqa makin chakin pankashqa jornu rurincho rikakuyarqan.
24 Tsayta rikaykurmi jamaraykanqanpita shärirkur Nabucodonosor pasaypa mantsakashqa yätsiqninkunata nirqan: “¿Manaku kimsan chölukunata pankarkur jornuman qaykatsishqantsik?”
Tsaynö niptinmi paykuna niyarqan: “Awmi, tayta rey”.
25 Tsaymi nirqan: “¡Jornu rurincho chusku runakuna kachaylla y mana rupakuypa puriykaqtami rikaykä! ¡Paykunawan kaykaq runaqa juk dios niraqmi kaykan!”
26 Nirkurnami Nabucodonosor jornu kaqman aywaykur qayarqan: “¡Munayyuq Diosta adoraq Sadrac, Mesac y Abed-nego! ¡Yarqaskamur shayämuy!”
Tsaymi kimsan chölukuna jornupita yarqayämurqan. 27 Yarqayämuptinmi paykuna kaqman nación mandashiqninkuna, prefectukuna, gobernadorkuna y yätsikuqkuna rikayänanpä qorikäyarqan. Tsaychömi rikayarqan tsay chölukunata ichikllapis nina mana rupanqanta. Aqtsallanpis ni latsapallanpis mana rupashqa kaptinmi ni rupashqanöpis asyäyarqantsu.
28 Tsaymi Nabucodonosor nirqan: “Sadrac, Mesac y Abed-nego adorayanqan Dios alabashqa kaykullätsun. Paymi angelninta kachamushqa salvananpä. Diosninman yärakurmi noqa ordenanqätapis cäsukuyashqatsu. Paykunaqa juk dioskunata adorayänanpa trokinmi wanuyänanpäpis listu kayashqa. 29 Manami ima diospis tsaynöqa salvantsu. Pï runatapis Sadrac, Mesac y Abed-nego adorayanqan Diospa contran parlaq kaqtaqa ichik ichiklla roquyätsun. Wayinkunapis kayashqa katsun. Tsaynö katsun may nacionpita kaptinpis y ima idiömata parlaptinpis”.
30 Tsaypitanami Sadracta, Mesacta y Abed-neguta Nabucodonosor churarqan Babilonia provinciacho mandaq autoridä kayänanpä.