Qamkunacho alli kaway kaykullätsun. 2 (3.32) Munayyuq Tayta Diosmi mantsakaypä kaqkunata rurar shumaq tantiyatsimashqa. Tsaytami kushishqa willayta munaykä. 3 (3.33) ¡Pay ruranqanqa mantsakaypämi kaykan! ¡Milagru ruranqanqa kushikuypämi! ¡Paymi imayyaqpis mandaq kaykan! ¡Munayyuq kanqanqa imaypis manami ushakantsu!

4 (1) Noqa Nabucodonosormi yarpanqänö llapanpis alli kaptin palaciücho kushishqa kawarqä. 5 (2) Juk paqas punuykarmi mana allita suëñuskir pasaypa mantsakarqä. 6 (3) Tsaymi Babiloniacho taq llapan yachaq runakunata qayatsimurqä suëñunqä imapä kanqantapis tantiyatsiyämänanpä. 7 (4) Adivïnukuna, brüjukuna, qoyllur estudiaqkuna y suerti qatiqkuna chäyämuptinmi suëñunqäta willarqä. Tsaynö willaptïpis manami tantiyatsimayta kamäpakuyarqantsu.

8 (5) Tsaypitanami Daniel chämurqan. Paypa jukaq jutinmi Beltsasar. Tsaynö jutinta churarqä adoranqä diospa jutin kanqannö kananpämi. Payta llapan dioskuna yanapaptinmi imata suëñunqätapis willar nirqä: 9 (6) “Beltsasar, yachaq runakunapa mandaqnin kaptikimi musyä llapan dioskuna yanapayäshunqaykita. Tsaymi qampäqa imapis ajatsu imata suëñunqäta y suëñunqä imapä kanqantapis willamänaykipä.

10 (7) “Cämächo punuykarmi suëñuynïcho rikashqä kay patsa chawpincho jatunkaray jacha ichiraykaqta. 11 (8) Tsay jacha wiñayllanta rakuyar llimllasapayaptinmi ñükankunapis ciëluyaq chashqa. Tsaymi maytsaymanpis rikakashqa. 12 (9) Tsay jachapaqa raprankunapis kuyayllapämi kashqa. Llapan runakuna mikuyänanpämi wayuyninpis atska kashqa. Llapan jirka uywakunapis jachapa chakinchömi llantukuyashqa. Tsaynöpis llimllankunachömi qeshunta pishqukuna rurayashqa. Tsay jachapa wayuynintami llapan uywakunapis mikuyashqa.

13 (10) “Cämächo punuykarmi suëñuynïcho rikashqä ciëlupita juk ángel uraykämuqta. 14 (11) Tsay angelmi jinchi nimurqan: ‘Tsay jachata mutuskir llapan llimllankunata llawmayay. Nirkur raprankunatapis chipyaq rachiyay. Wayuyninkunatapis tapsiriyay. Llantuynincho llantukuykaq uywakunatapis llapanta qarquyay. Pishqukunapis qeshunta jaqiskir aywakuyätsun. 15 (12) Troncunta itsanqa michintinta^a patsallancho fiërru y bronci cadinakunawan watayay. Qewakunapa chawpillancho uywakunawan iwal kawatsun. Shullyapis patsallancho ushmatsun. 16 (13) Yarpaynin alli kanqanpita uywapa yarpayninnö tikratsun. Tsaynö katsun qanchis watayaq’.

17 (14) “Tsaynö kananpä kaqtami angelkuna willakuyashqa. Tsaynö päsaptinmi pïmaypis musyayanqa llapan mandaqkunapitapis Tayta Dios mas munayyuq kanqanta. Paymi nacionta mandananpä pitapis munanqanta churan. Munarqa mas qollmi shonqu kaqtapis mandaq kananpämi churan.

18 (15) “Tsaytami noqa Nabucodonosor suëñuynïcho rikashqä. Beltsasar, kanan willamay imapä tsay suëñu kanqantapis. Kay mandanqä nacioncho manami mayqan musyaqkunapis tantiyatsimayta kamäpakuyantsu. Llapan dioskuna yanapashuptiki musyämi qam tantiyatsimänaykipä kanqanta”.

19 (16) Tsaynö willanqä mantsariypä kaptinmi Beltsasar jutiyuq Daniel juk höranö pasaypa yarpachakur wiyaräkurqan. Tsaymi nirqä: “Beltsasar, tsay suëñunqäpita ama mantsariytsu”.

Tsaynö niptïmi Daniel nimarqan: “Taytay, tsay suëñuynikicho rikanqaykiqa chikishuqnikikunata päsananpä kaykullätsun. 20-22 (17-19) Suëñuynikicho rikanqayki jachaqa kikikimi kaykanki. Tsay jacha wiñayllanta rakuyanqannömi qampis munayyuq tikrashqayki. Llimllasapayaptin llimllankuna ciëluyaq chanqannömi qampis munayyuq rikakur ciëlucho kaykaq angelnö kaykanki. Jachapa raprankuna kuyayllapä kanqannö y wayuyninkuna llapan runakuna mikuyänanpä kanqannömi qampis atska runakunata yanapanki. Jirka uywakuna jachapa llantuynincho llantukuyanqannö y llimllankunacho pishqukunapis qeshunkunata rurayanqannömi llapan runakunapis munaynikicho kaykäyan. Tsay jacha kay patsacho maytsaymanpis rikakanqannömi llapan nacionkunapis makikicho kaykäyan.

23 (20) “Tsaynöllami suëñuynikicho rikashqayki ciëlupita willakuq ángel uraykämuqta. Paymi nirqan: ‘Tsay jachata mutuskir llapanta ushakätsiyay. Troncunta itsanqa michintinta patsallancho kachaykuyay. Nirkur fiërru y bronci cadinakunawan watarkur jirkacho qewakunapa chawpillancho kachaykuyay. Shullyapis patsallancho ushmatsun. Qanchis wata päsanqanyaq uywakunawan iwal kawatsun’.

24 (21) “Tayta rey, munayyuq Tayta Dios suëñuynikicho rikatsishunqaykiqa qamta päsashunaykipämi kaykan. Kanan willashayki tsay suëñunqayki imapä kanqantapis. 25 (22) Runakuna täyanqanpita qarquyäshuptikimi uywakunawan juntu kawanki. Törunömi qewata mikunki y shullyami ushmashunki. Qanchis watami tsaynö kanki Tayta Dios llapanpä munayyuq kanqanta tantiyakunqaykiyaq. Paymi pitapis munanqan kaqta churan mandaq kananpä.

26 (23) “Jawantin troncu patsallancho quëdanqanqa mandaq kayman kutinaykipä kanqanmi kaykan. Tsaynö kutinki Tayta Dios llapanpä munayyuq kanqanta tantiyakunqayki hörami.

27 (24) “Tayta rey, tsaynö mana päsashunaykipä kanan yätsishayki. Jutsa ruraykunata kacharir runa mayikita shumaq rikay. Mana alli kayta kacharir muchuqkunata yanapay. Tsaynö rurarqa capazchi alli kawayta tariykunkimanpis”.

28 (25) Daniel willamanqannöllami llapanpis päsamarqan. 29 (26) Tsay suëñunqäpita juk wata päsaskiptinnami Babilonia palaciücho puriykar 30 (27) nirqä: “¡Noqami munayyuq kar kay jatunkaray Babilonia markata shäritsishqä mandanqä nacionkunapa capitalnin kananpä! Tsaynöpami maytsay nacioncho munayyuq kanqäta musyayanqa”.

31 (28) Parlaytapis manarä ushaptïmi ciëlupita nimunqan wiyakämurqan: “Rey Nabucodonosor, ninqäta shumaq wiyamay. Kananpitaqa mananami reynatsu kanki. 32 (29) Runakuna täyanqanpita qarquyäshuptikimi uywakunawan juntu kawanki. Törunömi qewata mikunki. Qanchis watami tsaynö kanki Tayta Dios llapanpä munayyuq kanqanta tantiyakunqaykiyaq. Paymi mandaq kananpä pitapis munanqanta churan”.

33 (30) Jinan hörami nimunqannö yarpaynï illakaskirqan. Tsaymi runakuna täyanqanpita qarqamaptin törukunanö qewata mikur qallaykurqä. Cuerpütanami shullya ushmamarqan. Aqtsäpis ankapa plümannö y shillüpis ankapa shillunnömi wiñarqan.

34 (31) Qanchis wata päsaskiptinmi noqa Nabucodonosor ciëlupa ñukiykur Tayta Diosta perdonta mañakurqä. Tsaymi yapay juiciüman kutirkur imayyaqpis kawaq munayyuq Tayta Diosta alabarqä y agradëcikurqä.

36 (33) Tsay hörami ñöpata kanqä juiciüman kutirkurqä. Mandaq kayman yapay kutir ñöpata munayyuq kanqänömi yapay munayyuq karqä. Tsaypitanami ñöpata mandar yanapamaqkunapis yanapayämänanpä yapay kutiyämurqan. Trönüman kutirmi punta kanqäpita mas munayyuq karqä. 37 (34) Tsaymi noqa Nabucodonosor ciëlucho kaykaq Tayta Diosta alabä. Pay ruranqanqa llapanpis allimi. Yachaq tukuqkunataqa penqakuymanmi churan.