Norti kaqlächo Israel trïbukunapa herenciankuna kayänanpä ninqan
48
“Kanan tantiyatsishayki Israel trïbukunapa herenciankuna mayninpa kayänanpä kanqantapis. Dan trïbu runakuna chaskiyanqan herenciaqa Israel nacionpa norti kaqlächömi kanqa. Paykunapa lindërunmi Hetlón markaman aywaq nänipa aywaranqa Hamat partiyaq. Nirkurmi chanqa Hazar-enányaq. Tsay kaykan Damascupa y Hamatpa sur kaq lindërun tinkuqchömi. Dan trïbu runakuna chaskiyanqan herencianpa largun Israel nacionpa anchun kanqannöllami kanqa. Tsaymi rupay yarqamunan kaq lindërupita qallaykur hasta rupay jeqanan kaq lindëruyaq kanqa.2 “Dan trïbu runakuna chaskiyanqan herenciapita sur kaqlächömi Aser trïbu runakuna chaskiyanqan herencia kanqa. Tsay herenciapa lindërunmi kanqa nacionninpa lindërun kanqannö rupay yarqamunan kaqläpita rupay jeqanan kaqläyaq.
3 “Aser trïbu runakuna chaskiyanqan herenciapita sur kaqlächömi Neftalí trïbu runakuna chaskiyanqan herencia kanqa. Tsay herenciapa lindërunmi kanqa nacionninpa lindërun kanqannö rupay yarqamunan kaqläpita rupay jeqanan kaqläyaq.
4 “Neftalí trïbu runakuna chaskiyanqan herenciapita sur kaqlächömi Manasés trïbu runakuna chaskiyanqan herencia kanqa. Tsay herenciapa lindërunmi kanqa nacionninpa lindërun kanqannö rupay yarqamunan kaqläpita rupay jeqanan kaqläyaq.
5 “Manasés trïbu runakuna chaskiyanqan herenciapita sur kaqlächömi Efraín trïbu runakuna chaskiyanqan herencia kanqa. Tsay herenciapa lindërunmi kanqa nacionninpa lindërun kanqannö rupay yarqamunan kaqläpita rupay jeqanan kaqläyaq.
6 “Efraín trïbu runakuna chaskiyanqan herenciapita sur kaqlächömi Rubén trïbu runakuna chaskiyanqan herencia kanqa. Tsay herenciapa lindërunmi kanqa nacionninpa lindërun kanqannö rupay yarqamunan kaqläpita rupay jeqanan kaqläyaq.
7 “Rubén trïbu runakuna chaskiyanqan herenciapita sur kaqlächömi Judá trïbu runakuna chaskiyanqan herencia kanqa. Tsay herenciapa lindërunmi kanqa nacionninpa lindërun kanqannö rupay yarqamunan kaqläpita rupay jeqanan kaqläyaq.
Judá trïbupa herencianpita sur kaqlächo kaykaq parti imanö kananpä ninqan
8 “Judá trïbu runakuna chaskiyanqan herenciapita sur kaqlächo juk partitami rakiyanki. Anchunmi kanqa chunka ishkay lëwa pullan. Largunnami kanqa rupay yarqamunan kaqläpita rupay jeqanan kaqläyaq. Tsaymi ñöpan trïbukuna chaskiyanqan herenciapa largunnölla kanqa. Tsay parti chawpinchömi templu kanqa.
9 “Tsaycho noqapä rakiyanqayki partipa largunmi kanqa ishkay lëwa pullan y anchunnami kanqa juk lëwa. 10 Tsay partiqa sacerdötikunapämi kanqa. Norti kaqläpami largun kanqa ishkay lëwa pullan. Rupay jeqanan kaqläpami anchun kanqa juk lëwa. Tsaynöllami rupay yarqamunan kaqläpa anchun kanqa juk lëwa. Sur kaqläpami largun kanqa ishkay lëwa pullan. Tsay partipa chawpinchömi templü kanqa.
11 “Sacerdötikunapä rakiyanqayki partiqa kanqa sirvimaq Sadoc sacerdötipita aywaraq sacerdötikuna täyänanpämi. Israel runakuna y levitakuna mana wiyayämaptinpis paykunaqa wiyayämarqanmi. 12 Noqapä rakiyanqayki particho sacerdötikunapä rakiyanqaykiqa mas sagrädumi kanqa. Levitakunapa herencian kaqläpami kanqa.
13 “Sacerdötikunapa herencian kaqläpami levitakunapa herencian kanqa. Largunmi kanqa ishkay lëwa pullan y anchunmi kanqa juk lëwa. 14 Tsay herenciata manami rantikuyanqatsu, trukakuyanqatsu ni jukpa makinman churayanqatsu. Tsay herenciaqa noqapä karmi sagrädu kaykan.
15 “Sobraq kaq partipa largun kanqa ishkay lëwa pullan y anchun kanqa pullan lëwa. Tsay partiqa manami sagrädutsu kanqa, sinöqa wakin runakuna täyänanpä y uywankunata mitsikuyänanpämi kanqa.
“Tsay parti chawpichönami marka kanqa. 16 Tsay markapa largunpis anchunpis tsay tamäñullami kanqa. Cada lädupa largunmi kanqa ishkay waranqa ishkay pachak pitsqa chunka (2,250) metru. 17 Markapa ñöpankunapanami uywaykikunata mitsikuyänaykipä jiruruypa qewa kanqa. Tsay qewa kanqanpami anchunpis largunpis juk pachak ishkay chunka pitsqa (125) metru kanqa.
18 “Markapa ishkan ñöpanpa sobraq kaqnami rakiyanqayki sagrädu partipa ñöpancho kanqa. Rupay yarqamunan kaqläpami largun juk lëwa kanqa y rupay jeqanan kaqläpapis largun juk lëwami kanqa. Markacho taq runakuna mikuyänanpä tsay ishkanlächömi murukuyanqa. 19 Markacho taq Israel runakuna mayqan trïbu karpis tsay chakrakunachömi murupakuyanqa.
20 “Sacerdötikunapä, levitakunapä, markata shäritsiyänanpä y chakrakunata murupakuyänanpä rakiyanqayki partiqa llapanrämi anchunpis largunpis ishkay lëwa pullan kanqa.
Mandaq autoridäpä rakiyanqan parti imanö kananpä ninqan
21 “Mandaq autoridäpa herencianpis kanqami. Paypa herencianpa chawpinchömi sagrädu partikuna y markapä rakiyanqayki partikuna kanqa. Tsaymi mandaq autoridäpa herencianpa anchun ishkay lëwa pullan kanqa. Largunnami kanqa Israel nacionpa jukaq lindërun kuchunpita hasta jukaq lindërun kuchunyaq.
“Tsay herenciapa chawpinchömi sagrädu parti kanqa. Tsaychömi templupis kanqa. 22 Tsay chawpi kaq partichömi Leví trïbu runakunapa herencianpis y markapä rakiyanqayki partipis kanqa. Norti kaqlächömi Judá trïbu runakunapa herencian kanqa. Sur kaqlächönami Benjamín trïbu runakunapa herencian kanqa.
Sur kaqlächo Israel trïbukunapa herenciankuna kananpä ninqan
23 “Tsaypita sur kaqläpami wakin trïbukunapa herenciankunapis kanqa. Benjamín trïbu runakuna chaskiyanqan herenciapa lindërunmi kanqa nacionninpa lindërun kanqannö rupay yarqamunan kaqläpita rupay jeqanan kaqläyaq.
24 “Benjamín trïbu runakuna chaskiyanqan herenciapita sur kaqlächömi Simeón trïbu runakuna chaskiyanqan herencia kanqa. Tsay herenciapa lindërunmi kanqa nacionninpa lindërun kanqannö rupay yarqamunan kaqläpita rupay jeqanan kaqläyaq.
25 “Simeón trïbu runakuna chaskiyanqan herenciapita sur kaqlächömi Isacar trïbu runakuna chaskiyanqan herencia kanqa. Tsay herenciapa lindërunmi kanqa nacionninpa lindërun kanqannö rupay yarqamunan kaqläpita rupay jeqanan kaqläyaq.
26 “Isacar trïbu runakuna chaskiyanqan herenciapita sur kaqlächömi Zabulón trïbu runakuna chaskiyanqan herencia kanqa. Tsay herenciapa lindërunmi kanqa nacionninpa lindërun kanqannö rupay yarqamunan kaqläpita rupay jeqanan kaqläyaq.
27 “Zabulón trïbu runakuna chaskiyanqan herenciapita sur kaqlächömi Gad trïbu runakuna chaskiyanqan herencia kanqa. Tsay herenciapa lindërunmi kanqa nacionninpa lindërun kanqannö rupay yarqamunan kaqläpita rupay jeqanan kaqläyaq. 28 Gad trïbu runakuna chaskiyanqan herenciapa sur kaq lindërunmi Tamarpita qallaykur Meriba-cadescho yaku kaykaqpa aywaranqa. Tsaypita Egipto raqrayaq päsarmi jatun Mediterráneo Lamaryaq chanqa.
29 “Tsaynömi Israel runakunata trïbunpa trïbunpa herencian rakiyanki”. Tayta Diosmi tsaynö nin.
Markapa punkunkunapä ninqan
30 “Kanan tantiyatsishayki markapa punkunkuna imanö kananpä kanqanta. Nortiläpami largun kanqa ishkay waranqa ishkay pachak pitsqa chunka (2,250) metru. 31 Cada punkupa jutinmi kanqa Israel trïbukunapa jutin. Norti kaqläpami kanqa Rubén punku, Judá punku y Leví punku.
32 “Rupay yarqamunan kaqlächöpis markapa largun ishkay waranqa ishkay pachak pitsqa chunka (2,250) metrumi kanqa. Tsaylächömi kanqa José punku, Benjamín punku y Dan punku.
33 “Sur kaqlächöpis markapa largun ishkay waranqa ishkay pachak pitsqa chunka (2,250) metrumi kanqa. Tsaylächömi kanqa Simeón punku, Isacar punku y Zabulón punku.
34 “Rupay jeqanan kaqlächöpis markapa largun ishkay waranqa ishkay pachak pitsqa chunka (2,250) metrumi kanqa. Tsaylächömi kanqa Gad punku, Aser punku y Neftalí punku. 35 Markata tumaypa tsaparaq murällami isqun waranqa (9,000) metru kanqa. Tsay markapa jutinmi imayyaqpis kanqa Tayta Diosmi Tsaycho Tana”.