Templupita pashtaykaq yaku imanö kanqan
47
Tsaypitanami templu punkuman tsay runa kutitsimarqan. Tsaychömi rikarqä kikin punku chakin numbralnin jawanpita yaku pashtaykämuqta.† Altarpa sur kaqlä ñöpanpa päsar rupay yarqamunan kaqläpa yaku aywaykaqtami rikarqä. 2 Tsaypitanami ruri kaq patiupita y jatun kaq patiupita norti kaqlä punkupa waqtayaq jipiskamar rupay yarqamunan kaqlä punkuman pushamarqan. Tsaychömi punkupita sur kaqläpa yaku yarqaykämuqta rikarqä.3 Tsaypitami cordelta aptakurkur rupay yarqamunan kaqläpa aywar pitsqa pachak (500) metruta tsay runa tupurqan. Tsay tupunqan kaqpa päsatsimaptinmi utsuputüyaqlla yaku tsarimarqan. 4 Yapay pitsqa pachak (500) metruta tupuskir päsatsimaptinmi qonqurnïyaqna yaku tsarimarqan. Tsaypita yapay pitsqa pachak (500) metruyaq tupuskir päsatsimaptinmi tseqlläyaqna yaku tsarimarqan. 5 Yapay pitsqa pachak (500) metruta tupuptinqa chakillapa päsayta manami kamäpakurqänatsu. Yaku atskayashqa kaptinmi nädayparä päsarqä. 6 Nirkurnami nimarqan: “Llapan rikanqaykita shumaq tantiyakuy”.
Tsaypitanami mayu kuchullanpa kutitsimarqan. 7 Kutirmi mayupa ishkan kuchunkunacho atska jachakunata rikarqä. 8 Tsaymi nimarqan: “Kay yaku rupay yarqamunan kaqläpami aywaykan. Arabá pampapa päsarmi Kachi Lamarman chaykan. Tsayman charmi pochquq yakuta alli yakuman tikratsinqa. 9 Kay yaku maymanpis chanqan kaqchöqa tukuyläya uywakunami kawayanqa. Pochquq yakuta mishkiqman tikratsiptinmi atska pescädukunapis kanqa. Kay yaku maymanpis chanqanchöqa llapanmi kawayanqa.
10 “En-gadi partipita En-eglaim partiyaqmi kay mayu aywanqan kuchunkunacho pescaqkunapis mällankunata majakuyanqa. Mediterráneo Lamarchönörämi imaykaläya pescädukuna tsaytsika kanqa. 11 Sinigankuna y qochankunami itsanqa kanqannölla pochquq kanqa.
12 “Kay mayupa ishkan kuchunchömi imaykaläya früta jachakuna wiñayanqa. Raprankuna mana shushuptinmi imayyaqpis wayunqa. Templupita yarqamuq yaku kuchuncho karmi wayuyninpis tiempullancho poqunqa. Tsay wayuyninmi mikunapä kanqa y raprankunanami jampipä kanqa”.†
Israel nacionpa lindërunkuna imanö kanqan
13 Tayta Diosmi nin: “Kananmi tantiyatsishayki chunka ishkay trïbu Israel runakuna herenciata chaskiyaptin lindërunkuna maypa kananpä kanqanta.† Josépita aywaraqkunaqa ishkay trïbupä kaqtanömi herenciata chaskiyanqa.a 14 Wakin trïbukunaqa iwal iwalmi herenciata chaskiyanqa. Unay castaykikunata kay nacionta rikatsishqa kaptïmi kay nación qamkunapä kanqa.
15 “Norti kaqläpami Israel nacionpa lindërun Mediterráneo jatun lamarpita qallaykur Hetlón markapa aywaq nänipa aywaranqa Zedad partiyaq. 16 Tsaypitami aywaranqa Hamat, Berota y Sibraim partikunapa. Sibraim parti kaykan Damascupita Hamatman aywaqchömi. Tsaypitanami aywaranqa Hazar-haticón partipa. Tsay partimi tinkuykan Haurán partiwan. 17 Tsaymi norti kaqläpa tinkuq lindëru aywaranqa Mediterráneo Lamarpita Hazar-enán partiyaq. Tsay kanqa Damasco norti kaqlächo y Hamat sur kaqlächömi.
18 “Rupay yarqamunan kaqläpanami Israel nacionpa lindërun Haurán partipa y Damasco partiman aywaranqa. Tsaypita Jordán mayupa aywararmi rupay jeqamunan kaqlä lamarb ñöpan Tamar markayaq chanqa. Jordán mayu kay tsimpanchömi Israel nación kanqa y wak tsimpanchönami Galaad kanqa.
19 “Sur kaqläpanami Israel nacionpa lindërun kanqa Tamar markapita qallaykur Cadescho kaykaq Meriba yakupa päsar Mediterráneo jatun lamaryaq. Tsaynöllami sur kaqläpapis lindërun kanqa.
20 “Rupay jeqanan kaqläpanami Mediterráneo Lamar kuchullanpa Israel nacionpa lindërun kanqa. Tsay kuchunpa aywararmi norti kaqlä Hamat partiman chanqa. Tsaynömi rupay jeqanan kaqläpa lindërun kanqa.
Herenciata aypunakuyanqan
21 “Nacionnikita chunka ishkay Israel trïbupura aypunakuyanki. 22 Cada trïbu chaskinqancho runakuna herenciata chaskiyänanpä sortiyaypa aypunakuyanki. Qamkunacho yuriq jäpa runakunatapis tsurinkuna kaptinqa tsaynö aypuyanki. Markaykicho yuriq jäpa runakunata Israel runatanöna rikayanki. Tsaymi marka mayikikunata chakrata aypuyanqaykinölla paykunatapis aypuyanki. 23 Maychöpis täyanqan trïbuchömi jäpa runakunapis herenciankunata chaskiyanqa”. Tayta Diosmi tsaynö nin.