Mandaq autoridä fiestakunacho imata rurananpä ninqan
46
“ ‘Tayta Diosmi nin: Ruri kaq patiucho rupay yarqamunan kaqlä punkuqa aruykuna junaqcho wichqaräkunqami. Jamay junaqkunacho y llullu killakunachömi itsanqa kicharanqa. 2 Tsay junaqkunachömi mandaq autoridä jatun kaq patiupita tsay punkupa yaykunqa. Nirkurnami rupatsina sacrificiuta y alli päsakuy sacrificiuta sacerdötikuna rupatsiyanqanyaq punku yaykunallacho urkunpis patsaman töpanqanyaq qonquriykur adoramar ichiranqa. Nirkurmi jatun patiuman kutinqa. Tsay punkuqa patsa tsakanqanyaqmi kicharanqa. 3 Tsaynöllami común runakunapis jamay junaqkunacho y llullu killakunacho tsay punku ñöpallanpita adorayämanqa.4 “ ‘Cada jamay junaqmi mandaq autoridä noqapä rupatsinanpä apamunqa soqta carnishkunata y allinnin kaq carnëruta. Llapanpis tsaykuna sänullami kayanqa. 5 Carnëruta apamurqa ishkay chunka (20) kïlu tsaki mikuytami apamunqa. Carnishkunata apamurqa kapunqallanpitami tsaki mikuy ofrendata apamunqa. Cada ishkay chunka (20) kïlu tsaki mikuy ofrendata apamurqa kimsa litru pullan aceititapis apamunqa.
6 “ ‘Llullu killachöqa juk torïtuta, soqta carnishkunata y juk carnërutami sänuta apamunqa. 7 Torïtuta apamurqa ishkay chunka (20) kïlu tsaki mikuytami apamunqa. Tsaynöllami carnëruta apamurpis ishkay chunka (20) kïlu tsaki mikuyta apamunqa. Carnishkunata apamurmi itsanqa kapunqallanman tsaki mikuy ofrendata apamunqa. Cada ishkay chunka (20) kïlu tsaki mikuyta apamunqan jananmanmi kimsa litru pullan aceititapis apamunqa.
8 “ ‘Templu patiuman mandaq autoridä yaykurqa punkucho kaykaq cuartupami yaykunqa y tsayllapami yarqunqapis. 9 Fiestakunacho adorayämänanpä shamuq común runakunami itsanqa norti kaqlä punkupa yaykurqa sur kaqlä punkupana yarquyanqa. Sur kaqlä punkupa yaykuqkunaqa norti kaqlä punkupanami yarquyanqa. Yaykuyanqan punkullapa ama kutiyanqatsu, tsaypa trokinqa defrenti päsayanqa. 10 Común runakuna yaykuyaptinmi mandaq autoridäpis paykunallawan yaykunqa. Común runakuna yarquyaptinmi paykunallawan yarqunqa.
11 “ ‘Fiestakuna kaptin cada torïtuta y cada carnëruta pishtar ishkay chunka (20) kïlu tsaki mikuy ofrendatami mandaq autoridä apamunqa. Carnishkunata apamurqa kapunqanman tupumi tsaki mikuytapis apamunqa. Cada ishkay chunka (20) kïlu tsaki mikuy ofrenda jananmanmi kimsa litru pullan aceititapis apamunqa.
12 “ ‘Mandaq autoridä voluntäninpita rupatsina sacrificiuta o alli päsakuy sacrificiuta noqapä apamuptinqa rupay yarqamunan kaqlä punkutami kichapanqa. Tsaypa yaykuptinmi rupatsina sacrificiuta y alli päsakuy sacrificiuta jamay junaqkunacho rupatsiyanqannölla sacerdötikuna rupatsinqa. Yarquskiptinnami tsay punkuta wichqayanqa.
Qoyay qoyay sacrificiuta rupatsinanpä ninqan
13 “ ‘Cada tuta noqapä sacrificiuta rupatsiyänaykipämi juk watayuq sänu carnishta pishtatsiyanki. 14 Tsaynölla cada tuta noqapä apayämunki qanchis kïlu tsaki mikuyta y jarinawan talluyänaykipä juk litru aceitita. Mana kachaypa imayyaqpis tsayta rurayanki. Tsay ninqäqa imayyaqpis leymi qamkunapä kanqa. 15 Rupatsina sacrificiupä carnishta pishtarqa tsaki mikuyta y aceititapis cada tutami imaypis apayämunki.†
Mandaq autoridä chakrankunata imanö rakipänanpä ninqan
16 “ ‘Tayta Diosmi nin: Mandaq autoridä tsurinkunata chakrata rakipaptinqa tsay chakrakuna imaypis tsurinkunapa herencianmi kanqa. 17 Chakranpita wätayninta rakipaptinqa Jubileo watayaqllami wätaynin tsay chakrata tsararanqa.† Tsaypita mandaq autoridätami kutitsiyanqa. Tsaynö kutitsiyanqa mandaq autoridäpa tsurinkunapa herencian tsay chakra kaptinmi.
18 “ ‘Wakin runakunapa kaqchöqa mandaq autoridä manami ima herenciatapis chaskinqatsu ni runakunapa chakrantapis qechunqatsu. Tsurinkunata herenciata kachapayta munarqa kikinpa kaqtami rakinqa’ ”.
Templucho kusinakuna imanö kanqan
19 Tsaypitanami norti kaqlä kaykaq punkupa pushamar sacerdötikunapa cuartunkuna kanqanman tsay runa chätsimarqan. Tsay cuartukuna norti kaqläpami rikararqan. Tsayman chaykatsimaptinmi rupay jeqanan kaqlächo juk cuartuta rikarqä. 20 Tsaychömi nimarqan: “Kaychömi sacerdötikuna kusinakuyanqa consagratsina sacrificiuta, purificatsina sacrificiuta y tsaki mikuy ofrendatapis. Kaycho kusinakuyanqanta manami jatun patiuman jipiyanqatsu. Jipiyaptinqa tsaycho kaykaq runakunatami ima desgraciapis päsanqa”.
21 Nirkurmi jatun patiuman yaykatsimar kuchu kuchu rikapakur puritsimarqan. Cada kuchuchömi juk taksha alar karqan. 22 Tsay alarkunaqa tsay tamäñullami corralashqa karqan. Largunmi ishkay chunka (20) metru y anchunnami chunka pitsqa metru karqan. 23 Tsay corralaraq pirqapa chakinpami tullpakuna karqan. 24 Tsaychömi nimarqan: “Kay tullpakunachömi runakuna apayämunqanta templucho aruqkuna kusinayanqa”.