2 Tsaychömi Tayta Dios nimarqan: “Kay punkuqa imaypis wichqaranqami. Israel runakunata kuyaq Tayta Dios kar kay punkupa yaykushqa kaptïmi pipis yaykunanpä kichanqatsu. Tsaymi imaypis wichqaräkunqa. 3 Mandaq autoridämi itsanqa ruri cuartuman kay punkupa yaykuskir ñöpächo mikunqa. Tsay cuartuman yaykunanpä y tsaypita yarqunanpäqa patiuparämi päsanqa”.

4 Nirkurmi norti kaqlä yaykuna punkupa päsatsimar templu ruri kaq patiuman pushamar templu frentinyaq chätsimarqan. Tsaypita rikaskinäpämi Tayta Diospa chipipiynin templucho junta kaykänä. Tsaymi patsaman juklla lätakaykurqä. 5 Tsaychömi Tayta Dios nimarqan: “Runapa tsurin, shumaq wiyamay. Templücho imanö kayänanpä kaqtapis ninqäkunata shumaq tantiyakuy. Tsaynölla templuman pï yaykunanpä y pï mana yaykunanpä kaqtapis tantiyakuy.

6 “Mana wiyakuq Israel runakunata niy: ‘Tayta Diosmi nin: Israel runakuna, melananqäkunata ama rurayaynatsu. 7 Señalanni^† mana cäsukamaq jäpa runakunata templüman amana yaykatsiyaynatsu. Paykunata yaykatsirqa tsaki mikuy ofrendakunata, uywakunapa wiranta y yawarninta altarnïman churarpis templütami impüruyätsiyanki. Tsaynö rurarqa pactu ruranqantsikta manakaqmanmi churaykäyanki.

8 “ ‘Ninqänö rurayänaykipa trokinmi jäpa runakunata templücho sirviyämänanpä churayashqayki. 9 Israel markakunacho taykarpis señalanni mana cäsukamaq jäpa runakuna manami templüman yaykuyanqatsu’. Tayta Diosmi tsaynö nin.

10 “ ‘Israel runakuna mana wiyamaypa ïdulukunata adorayanqannöllami levitakunapis ïdulukunata adorayashqa. Tsaymi levitakunaqa 11 templu punku täpaqllana kayanqa. Tsaynöpis runakuna apayämunqan uywakunata rupatsina sacrificiupä y wakin sacrificiukunapäpis pishtaqllanami kayanqa. Runakunata templucho yanapayänallanpämi listu kaykäyanqa. 12 Tsaynö kayanqa ïdulukunata adorar Israel runakunata jutsata ruratsiyanqanpitami’. Tayta Diosmi tsaynö nin.

13 “ ‘Levitakunaqa manami sacerdöti kayanqanatsu ni ñöpäman witiyämunqanatsu.^a Sagrädu ofrendakunata ni templucho wakin sagrädu kaqkunatapis manami yatayllapis yatayanqanatsu. Llutanta rurayanqanpitami pasaypa penqakuyanqa. 14 Paykunataqa churashä templuta täpayänanpä y tsaycho ruraypä kaqkunata rurayänallanpänami.

15 “ ‘Israel runakuna mana cäsukamar ïdulukunata adorayaptinpis Sadocpita^† aywaraq sacerdötikunami itsanqa ninqäkunata cäsukur templucho sirviyämashqa. Tsaymi paykunaqa ñöpächo sirvimar wiratapis yawartapis altarnïman churayanqa’. Tayta Diosmi tsaynö nin. 16 ‘Paykunallami templüman yaykuyanqa y altarnïcho sirviyämanqa. Paykunaqa llapan ninqätami wiyakayämanqa.

17 “ ‘Ruri kaq patiupa yaykurmi lïnupita rurashqa latsapata sacerdötikuna jatikuyanqa.^† Manami millwapita awashqa latsapan jatishqaqa patiuchöpis ni templu rurinchöpis sirviyämanqatsu. 18 Umankunatapis lïnupita awashqa pañuelëtawanmi watakuyanqa. Lïnupita awashqa calzoncïllutami jatikuyanqa. Jumpitsikuqtaqa manami imatapis jatikuyanqatsu. 19 Jatun patiuman manarä yarqur y runakunawan manarä tinkurmi jatiräyanqan lïnu latsapankunata trukakuyanqa. Trukakuyanqan latsapankunata templupa ñöpancho kaykaq cuartukunamanmi churaykuyanqa.^† Tsaynöpami jatun patiucho kaykaq runakunata ima desgraciapis päsanqatsu.

20 “ ‘Sacerdötikunaqa aqtsankunatapis manami qara putuypaqa rututsiyanqatsu^† ni alläpapis wiñatsiyanqatsu. Tsaypa trokinqa shumaq kayänanpämi rututsikuyanqa. 21 Altar kanqan patiuman yaykuyänanpä kaptinqa vïnuta manami upuyanqatsu.^† 22 Viüda warmiwan ni runan jaqirishqa warmiwanpis manami täyanqatsu. Tsaypa trokinqa Israel casta piwanpis manarä kakushqa jipashllawan o sacerdötipa viüdallanwanmi täyanqa.^†

23 “ ‘Sacerdötikunami qamkunata tantiyatsiyäshunki imapis sagrädu kanqanta y mana sagrädu kanqanta, imapis püru kanqanta y imapis impüru kanqanta.^† 24 Demandukunachöpis leynïkuna ninqannömi juzgayäshunki. Fiestakunachöpis imanö rurayänaykipä ninqänömi cumplitsiyäshunki. Jamay junaqnïkunatapis paykunami respitatsiyanqa.

25 “ ‘Impüru mana rikakuyänanpä ayatapis manami yatayanqatsu.^† Taytan, maman, ollqu tsurin, warmi tsurin, wawqin o jipashllarä panin wanuptinmi itsanqa yatayanqa. 26 Ayata yatar impüruyanqanpita bäñakuskirmi qanchis junaqyaq shuyaräyanqa purificakuyänanpä. 27 Tsaypitarämi altar kanqan kaq patiuman kutiskir yapay sirviyämänanpä purificatsina sacrificiuta apayämunqa’. Tayta Diosmi tsaynö nin.

28 “ ‘Sacerdötikunapaqa manami ima chakranpis kanqatsu. Chakran kananpa trokinqa noqami herencian kashä. Israelcho herencian ni chakran mana kaptinpis noqami paykunata wätashä.^† 29 Apayämunqayki tsaki mikuy ofrendakunata, purificatsina sacrificiukunata y consagratsina sacrificiukunatami paykuna mikuyanqa. Noqapä apayämunqaykikuna llapanpis paykunapämi kanqa. 30 Punta wayuqkunapita primiciata apayämunqaykita y llapan ofrendaykikunatapis sacerdötikunami chaskiyanqa. Tsaynöllami tantata masarar puntata jornupita jipinqaykitapis paykunata entregayanki. Tsaynö rurayaptikiqa bendicionnïtami qamkunaman churamushä.^†

31 “ ‘Kikillan wanushqa o chucaru uywa wanutsishqa aytsata sacerdötikuna manami mikuyanqatsu. Uywapa o pishqupa kaptinpis tsay aytsata manami mikuyanqatsu.^†