Templuman Tayta Dios kutinqan
43
Tsaypitanami pushamaq runa kutitsimarqan rupay yarqamunan kaqläpa kaykaq punkuman. 2 Tsaypitami rikarqä Israel runakunata kuyaq Tayta Diospa chipipiynin rupay yarqamunan kaqläpita shamuykaqta. Atskayar mayu qayaranqannörämi shamunqan wiyakämurqan. Chipipiyninwanmi kay patsapis pasaypa atsikyarqan.† 3 Tsay rikaykanqämi karqan Jerusalénta ushakätsinanpä Tayta Dios aywanqanta rikanqänö. Tsaynöpis Quebar mayu ñöpancho ñöpata rikanqänöllami karqan. Tsaymi patsaman juklla lätakaykurqä.4 Nirkurnami rupay yarqamunan kaqlä punkupa Tayta Diospa chipipiyninpis qoshnipis templuman yaykurqan. 5 Tsaynö rikaykaptïmi Tayta Diospa Espïritun joqarkamar ruri patiuman yaykatsimarqan. Tsaychömi rikarqä tsay qoshni templucho junta kaykaqta.†
Templucho imanö kananpä
6 Pushamaq runapa ñöpancho kaykarmi wiyarqä templu rurinpita 7 nimaqta: “Runapa tsurin, kay wayichöqa jamakunä trönümi. Chakï ichiräkunä kaptinmi imayyaqpis Israel runakunawan kay templucho täshä.† Paykunapis ni mandaqnin reykunapis manami ïdulukunata yapay adorayanqanatsu. Mandaqnin reykuna wanuyaptinpis reträtunta rurar manami adorayanqanatsu. Tsaynöpami santu jutïta manakaqman churayanqanatsu.
8 “Punta kaq templüpita reykunapa palaciunman juk pirqallami rakirqan. Tsaynö amänulla kaptinmi palaciuncho ïdulukunata adorar santu jutïta manakaqman churayarqan. Tsaymi pasaypa ajanar paykunata ushakätsishqä.
9 “Kananqa ïdulukunata amana adorayätsunnatsu. Unay reykuna pamparäyanqan kaqman aywar tsay reykunatapis amana adorayätsunnatsu. Tsaykunata kachariyaptinqa imayyaqpis paykunawanmi kaykäshä.
10 “Runapa tsurin, rikanqayki templu imanö kanqanta y ima tamäñu kanqantapis Israel runakunata willay. Tsayta musyarqa capazchi jutsata rurayanqanpita penqakuyanmanpis. 11 Penqakuyaptinqa templu y punkunkuna imanö kayanqanta rikanqaykita llapanta tantiyatsiy. Tsaynölla willanki templucho imanö sirviyämänanpä yachatsinqä leykunata. Tsay leykuna ninqannölla shumaq rurayänanpä y cumpliyänanpä llapanta qellqay. 12 Jirkan janancho templu kaykanqan pampakuna llapanmi sagrädu kanqa. Tsayta musyarqa templucho imanö sirviyämänanpä llapan leykunatami cumpliyanqa”.
Templucho altar imanö kananpä
13 Kaychömi qellqaraykan altarpa† tamäñun. Altarpa llapan kuchunpami jiruruypa pullan metru jondu zanja karqan. Anchunpis pullan metrumi karqan. Zanjapa kuchunnami juk cuartapita masllan karqan.
14 Altar jamaränanmi juk metru altu karqan. Anchunnami pullan metru karqan. Altarpa chawpi kaq partinmi ishkay metru altu karqan. Tsaychömi pullan metru anchu juk gräda karqan. 15 Altarpa janannami ishkay metru altu karqan. Chuskun esquïnankunachömi waqrankuna karqan.
16 Altar jananqa chuskun lädun tsay tamäñullami karqan. Soqta metru largun y soqta metru anchun kaptinmi cuadrädu karqan. 17 Altarpa jana kuchuncho canalëtanpis qanchis metrumi cada läduncho karqan. Tsay canalëtapa anchunmi pullan metru karqan. Jondunnami cuarta maslla karqan. Altarman yarkuna grädankunapis rupay yarqamunan kaqläpami karqan.
18 Nirkurmi pushamaq runa nimarqan: “Runapa tsurin, Tayta Diosmi nin: ‘Sacrificiuta rupatsiyänaykipä y yawarta tsaqtsupäyänaykipä altarta rurar ushaskiyaptin purificayanki. Kanan tantiyatsishayki imanö purificayänaykipäpis.† 19 Sadocpita aywaraq Leví casta sacerdötikuna purificatsina sacrificiuta rupatsiyänanpä juk torïtuta kamaripanki. Tsay sacerdötikunallami altarnïcho sirviyämanqa. Noqa Tayta Diosmi tsaynö nï.
20 “ ‘Tsay torïtuta pishtarmi yawarninwan altarpa chuskun waqrankunata, waqran uralänin chuskun esquïnankunata y altarpa kuchuncho kaykaq canalëtakunata jiruruypa tsaqtsupanki. Tsaynöpami tsay altarta purificanki. 21 Tsaypitana purificatsina sacrificiupä pishtayanqan torïtupa aytsanta templupita jipiskir rupatsiyänanpä kaq particho rupatsinki.
22 “ ‘Waraynin junaqnami sänu chïvuta purificatsina sacrificiupä rupatsiyanqa. Tsaypa yawarninwanpis torïtupa yawarninwan ruranqaykinölla altarta purificanki. 23 Tsaynö purificaskir sänu torïtuta y sänu carnëruta 24 ñöpäman apamunki.a Tsaykunata pishtaskirmi sacerdötikuna kachitsarkur noqa Tayta Diospä sacrificiuta rupatsiyanqa.
25 “ ‘Qanchis junaqyaqmi purificatsina sacrificiupä juk chïvuta, juk torïtuta y juk carnërutapis sänun kaqta cada junaq rupatsiyanqa. 26 Tsaynö sacrificiuta rupatsirmi sacerdötikuna qoyay qoyay qanchis junaqyaq altarta purificayanqa.
27 “ ‘Qanchis junaqyaq tsaynö ruraskirnami puwaq junaqpitaqa rupatsina sacrificiupä y alli päsakuy sacrificiupä apayämunqanta sacerdötikuna rupatsir qallaykuyanqa. Tsaynö rurayaptinmi kushishqa chaskishä’. Tayta Diosmi tsaynö nin”.